NKHANI ZAKWAMBILIRA | MAUTESI AGHO GHAKUTONDESKA ŴANTHU KUTEMWA CIUTA
Cifukwa Wuli Ŵanji Vikuŵasuzga Kutemwa Ciuta?
Yesu Khristu wakati: “‘Utemwenge Yehova Ciuta wako na mtima wako wose na umoyo wako wose na maghanoghano ghako ghose.’ Ili ndilo ni languro likuru comene na lakwamba.”a
Ŵanji ŵakuwona kuti nchakusuzga kumutemwa Ciuta. Iwo ŵakuti Ciuta wakumanyikwa makora yayi, wali kutali comene, kweniso ngwankhaza. Wonani ivyo ŵanji ŵakuyowoya.
Marco wakati: “Nkhalombanga kwa Ciuta kuti wanovwire, kweni nkhawonanga kuti wali kutali comene, mwakuti wangapulika yayi. Nakuti nkhakayikanga kuti waliko.”—Italy
Rosa wakati: “Nkhakhumbisiskanga kuteŵetera Ciuta, kweni nkhawonanga nga wali kutali. Nkhaghanaghananga kuti ni mukali ndipo cilato cake nchakuti watilangenge waka. Nkhagomezganga yayi kuti ngwalusungu.”—Guatemala.
Raymonde wakati: “Apo nkhaŵa mwana, nkhaghanaghananga kuti Ciuta wakukhalira waka kupenja vifukwa mwa ise, kuti watilange. Pamasinda, nkhamba kuwona kuti wakutighanaghanira yayi. Nkhamuyaniskanga na nduna iyo yikovwira ŵanthu ŵake, kweni yikuŵatemwa viŵi yayi.”—Canada.
Kasi imwe mukuti wuli? Kasi nchamacitiko kumutemwa Ciuta? Kwa vyaka vinandi, nanga ni ŵanthu awo ŵakusopa ŵafumbapo fumbo ili. Nakuti mu vilimika vyapakati pa 500 na 1500 C.E., ŵanthu ŵanandi mu machalichi ŵakalombanga kwa Ciuta Wankhongonozose yayi. Cifukwa wuli? Ŵakamuwopanga comene. Munthu munyake wakusanda mdauko wakati: “Munthu wakwananga wangaŵa wuli na cikanga kulomba kwa Ciuta wakofya uyo wali kutali na ŵanthu?”
Kweni kasi vikenda wuli kuti ŵanthu ŵambe kuwona Ciuta kuti “ngwakofya kweniso kuti wali kutali”? Kasi Baibolo likusambizgaci za Ciuta? Kasi para mungamanya unenesko, mungamba kumutemwa?