Kasi Mujipelekenge Cifukwa Ca Ufumu?

1. Kasi ŵanthu ŵanandi ŵakusida vici, ndipo cifukwa wuli?

ŴANTHU ŵakusida vinthu vinyake kuti ŵacite vinthu ivyo ni vyakuzirwa comene kwa iwo. Ŵapapi ŵakugwiliskira nchito nyengo, ndalama na nkhongono zawo kuti ŵawovwire ŵana ŵawo. Apo ŵanyawo ŵakuseŵera na kusangwa, ŵawukirano awo ŵakukhumba kwimira caru cawo pa viphalizgano, ŵakufwilirapo kumalira maora ghanandi zuŵa lililose pakunozgekera viphalizgano ivi. Yesu nayo wakasida vinthu vinyake kuti wacite vinthu ivyo vikaŵa vyakuzirwa kwa iyo. Wakakhumbanga yayi kukhala umoyo wapacanya, ndipo wakaŵavya ŵana. M’malo mwake, wakaŵika mtima wake wose pa kupharazga Ufumu. (Mat. 4:17; Luka 9:58) Ŵalondezgi ŵake nawo ŵakasida vinthu vinandi kuti ŵapharazgenge Ufumu wa Ciuta. Kupharazga Ufumu ndico cikaŵa cinthu cakuzirwa comene kwa iwo, ndipo ŵakasida vinthu vinyake kuti ŵacite vinandi pa mulimo uwu. (Mat. 4:18-22; 19:27) Ntheura, tingajifumba kuti, ‘Kasi pa umoyo wane cakuzirwa comene nchivici?’

2. (a) Kasi Ŵakhristu wose ŵaunenesko ŵakwenera kujipeleka kuti ŵacite vici? (b) Kasi ŵanji ŵakujipeleka kuti ŵacite milimo wuli yinyake yakusazgikira?

² Ŵakhristu wose ŵaunenesko ŵakwenera kusida vinthu vinyake kuti ŵaŵe paubwezi na Yehova. Ŵakwenera kupatura nyengo kuti ŵalombenge, ŵaŵazgenge Baibolo, ŵaŵenge na Nyengo ya Yakusopera ya Mbumba, ŵalutenge ku maungano, ndiposo kuti ŵanjirenge mu uteŵeti wa m’munda.a (Josh. 1:8; Mat. 28:19, 20; Heb. 10:24, 25) Cifukwa cakuti tikufwilirapo kweniso cifukwa cakuti Yehova wakutumbika mulimo withu wa kupharazga, mulimo uwu ukwenda makora, ndipo ŵanthu ŵanandi ŵakulutilira kuthilimukira ku “lupiri lwa nyumba ya Yehova.” (Yes. 2:2) Kuti ŵakhozgere mulimo wa Ufumu, ŵanandi ŵakujipeleka kuti ŵakateŵetere pa Beteli, kovwira pa mulimo wa kuzenga Nyumba za Ufumu na Malo gha Ungano, kunozga maungano ghakurughakuru, kweniso kovwira para kwacitika masoka gha cilengiwa. Tizamusanga umoyo cifukwa ca kucita milimo yakusazgikira iyi yayi, kweni milimo iyi yikovwira kuti mulimo wa kupharazga Ufumu wende makora.

3. (a) Kasi tikusanga vyandulo wuli para tikujipeleka cifukwa ca Ufumu? (b) Kasi tikwenera kujifumba mafumbo wuli?

³ Mazuŵa ghano ndipo nchakukhumbikwa comene kukhozgera Ufumu kuluska kumasinda kose. Nchakukondweska comene kuwona kuti ŵanthu ŵanandi ŵakujipeleka na mtima wose pakuteŵetera Yehova. (Ŵazgani Salmo 54:6.) Para tikuŵa na mtima wa kujipeleka uwu, tikuŵa na cimwemwe cikuru apo tikulindilira kuti Ufumu wa Ciuta wize. (Dute. 16:15; Mil. 20:35) Ndipouli, tose tikwenera kujisanda mwakupwelelera. Kasi pali vinthu vinyake ivyo tingasida kuti ticite vinandi pakukhozgera Ufumu? Kasi tikucita wuli na nyengo yithu, ndalama zithu, nkhongono zithu ndiposo maluso ghithu? Kasi ni vinthu wuli ivyo tikwenera kuŵa navyo maso? Tiyeni tiwone umo ŵanji ŵakajipelekeranga na mtima wose, ivyo nase tikwenera kutolerako kuti tisazgireko cimwemwe cithu.

UMO ŴAISRAYELI ŴAKAJIPELEKERANGA

4. Kasi Ŵaisrayeli ŵakasanganga candulo wuli cifukwa cakupeleka sembe?

⁴ Ŵaisrayeli ŵakeneranga kupeleka sembe kuti zakwananga zawo zigowokereke. Sembe izi zikaŵa zakukhumbikwa kuti ŵaŵe paubwezi na Yehova. Sembe zinyake ŵakacitanga kulangurika kuti ŵapeleke, kweni zinyake ŵakapelekanga mwakujikhumbira. (Lev. 23:37, 38) Sembe zakocha zikapelekekangaso nga nchawanangwa kwa Yehova. Sembe zantheura zikapelekeka apo ŵakapatuliranga tempile mu nyengo ya Solomoni.—2 Mid. 7:4-6.

5. Kasi Yehova wakapeleka mwaŵi wuli ku ŵakavu?

⁵ Yehova wakamanyanga kuti wose ŵangapeleka sembe zakuyana yayi, ndipo wakakhumbanga kuti waliyose wapelekenge iyo wangafiska. Dango la Yehova likayowoya kuti ndopa za nyama zithiskikenge cifukwa zikaŵa “muzgezge . . . wa vinthu viwemi” ivyo vikizanga kwizira mwa Mwana wake, Yesu. (Heb. 10:1-4) Ndipouli, pakulondezga dango ili, Yehova wakaŵakhwimiskiranga vinthu yayi. Mwaciyelezgero, Ciuta wakapokeranga sembe ya nkhunda usange munthu wangakwaniska yayi kupeleka mberere panji ng’ombe. Ntheura, nanga mbakavu ŵakapelekanga sembe kwa Yehova mwakukondwa. (Lev. 1:3, 10, 14; 5:7) Nangauli nyama izo ŵakapelekanga sembe zikapambananga, kweni pakaŵa vinthu viŵiri ivyo vikakhumbikwanga kwa waliyose uyo wakupeleka sembe zakupelekeka mwawanangwa.

6. Kasi ni vinthu wuli ivyo vikakhumbikwanga kwa munthu waliyose uyo wakupeleka sembe, ndipo cifukwa wuli cikaŵa cakuzirwa kulondezga vinthu ivi?

⁶ Cakwamba, munthu wakeneranga kupeleka sembe iyo njiwemi comene. Yehova wakaphalira Ŵaisrayeli kuti sembe yiliyose yikeneranga kuŵa yambura kalema kuti ‘wayipokelere.’ (Lev. 22:18-20) Usange nyama yili na kalema, yikaŵanga yambura kwenelera kupelekeka sembe kwa Yehova. Caciŵiri, munthu uyo wakapelekanga sembe wakeneranga kuŵa wakutowa na wambura kufipirwa. Usange munthu ngwakufipirwa, wakeneranga kupeleka sembe ya kwananga panji ya majuvyo kuti wawezgerepo ubwezi wake na Yehova pambere wandapeleke sembe yakupelekeka mwawanangwa. (Lev. 5:5, 6, 15) Iyi yikaŵa nkhani yikuru. Yehova wakalangura kuti usange munthu wakufipirwa wakuryako nyama ya sembe ya cimango, wakeneranga kuphatika mu ŵanthu ŵa Ciuta. Pa sembe za cimango pakaŵangaso sembe yakupelekeka mwawanangwa. (Lev. 7:20, 21) Kweni usange munthu uyo wakupeleka sembe wali paubwezi uwemi na Yehova ndipo sembe nayo njambura kalema, wakaŵanga wakukondwa.—Ŵazgani 1 Midauko 29:9.

UMO TINGAJIPELEKERA MAZUŴA GHANO

7, 8. (a) Kasi ŵanthu ŵanandi ŵakusanga vyandulo wuli cifukwa ca kujipeleka pakukhozgera Ufumu? (b) Kasi ni vinthu wuli ivyo tingagwiliskira nchito pakuteŵetera Ciuta?

⁷ Mazuŵa ghano napo, ŵanthu ŵanandi ŵakujipeleka pakuteŵetera Yehova, ndipo Yehova wakukondwa comene na ivyo ŵakucita. Tikusanga vyandulo vinandi para tikuteŵetera ŵabali ŵithu. Mubali munyake uyo wakuzengako Nyumba za Ufumu na kovwira awo masoka gha cilengiwa ghaŵawira, wakayowoya kuti wakuŵa na cimwemwe cikuru comene pakucita mauteŵeti agha. Iyo wakati: “Para nkhuwona ŵabali na ŵadumbu ŵakukondwa na kuwonga cifukwa ca Nyumba ya Ufumu yiphya panji cifukwa ca kovwirika pa nyengo ya soka la cilengiwa, nkhuwona kuti mulimo uwo nkhucita ngwakuzirwa comene.”

⁸ Nyengo zose gulu la Yehova likukhozgera mulimo wa Ufumu. Mu 1904, Mubali C. T. Russell wakalemba kuti: “Waliyose wakwenera kuwona kuti wali kwimikika na Fumu kuti waŵe muteŵeti mulara wa nyengo yake, udindo wake, ndalama zake na vinyake vyantheura, ndipo wakwenera kufwilirapo kuti wagwiliskire nchito vinthu ivi ku ucindami wa Fumu.” Nangauli tikusanga vitumbiko vinandi, kweni kuti tijipeleke pakuteŵetera Yehova tikusida vinthu vinyake. (2 Sam. 24:21-24) Mphanyi tagwiliskira nchito mwamahara vinthu ivyo tili navyo.

9. Pa nkhani ya umo tikucitira na nyengo yithu, kasi tikwenera kulondezga fundo wuli ya Yesu iyo yili pa Luka 10:2-4?

⁹ Nyengo yithu. Pakukhumbikwira nyengo na nkhongono kuti mulimo wa kung’anamura na kusindikizga mabuku ghithu ucitike. Ndimo viliriso na mulimo wa kuzenga malo ghakusoperapo, wa kunozga maungano ghakurughakuru, wa kovwira pa masoka gha cilengiwa, na milimo yinyake yakuzirwa. Pa zuŵa tikuŵa na maora ghacoko waka. Yesu wakayowoya fundo iyo yingatovwira. Apo Yesu wakatumanga ŵasambiri ŵake kuti ŵakapharazge, wakaŵaphalira kuti ‘ŵangavumbatiranga waliyose cara pakumutawuzga mu msewu.’ (Luka 10:2-4) Cifukwa wuli Yesu wakapeleka ulongozgi uwu? Munthu munyake wakusanda vya Baibolo wakati: “Pakutawuzgana, ŵanthu ŵa kumafumiro gha dazi ŵakasindamanga pacoko nga umo ise tikucitira yayi, nesi kukorana waka casa, kweni ŵakavumbatirananga [kanandi waka], ndiposo kusindama mutu pasi, nanga nkhuwa kavunama. Vyose ivi vikakhumbikwiranga nyengo yinandi.” Apa Yesu wakaciskanga ŵasambiri ŵake kuti ŵaŵenge ŵambura nchindi yayi. M’malo mwake, wakaŵawovwiranga kuti ŵamanye kuti ŵali na nyengo yicoko, ndipo nyengo iyi ŵakeneranga kucitira vinthu ivyo ni vyakuzirwa comene. (Efe. 5:16) Mphanyi nase talondezga fundo iyi kuti tiŵe na nyengo yinandi yakucitira mulimo wa Ufumu.

10, 11. (a) Kasi vyakupeleka vithu vya mulimo wa pa caru cose vikugwira nchito wuli? (b) Kasi pa 1 Ŵakorinte 16:1, 2 pali ulongozgi wuli wakovwira?

¹⁰ Ndalama zithu. Mulimo wa Ufumu ukukhumba ndalama zinandi kuti wende makora. Caka cilicose ndalama zakukwana madola mamiliyoni ghanandi zikugwira nchito pakovwira ŵalaŵiliri ŵakwendakwenda, ŵapayiniya ŵapadera, na ŵamishonale. Kwambira waka mu 1999, Nyumba za Ufumu zakujumpha 24,500 zazengeka mu vyaru vikavu. Ndipouli, pakukhumbikwa Nyumba za Ufumu zinyake pafupifupi 6,400. Mwezi uliwose, magazini gha Gongwe la Mulinda na Galamukani! ghakukwana 100 miliyoni ghakusindikizgika. Kuti vyose ivi vicitike vikuthemba pa vyakupeleka vithu.

¹¹ Mpositole Paulosi wakapeleka ulongozgi pa nkhani ya vyakupeleka. (Ŵazgani 1 Ŵakorinte 16:1, 2.) Mwakuciskika na mzimu, iyo wakaphalira ŵabali ŵake ŵa mu Korinte kuti ŵakwenera yayi kupeleka ndalama izo zacita kukhalapo paumaliro wa sabata, kweni kuti waŵikenge ndalama padera kukwambilira kwa sabata mwakuyana na umo vinthu viliri kwa iwo. Nga umo vikaŵira mu nyengo ya Ŵakhristu ŵakwambilira, ŵabali na ŵadumbu mazuŵa ghano ŵakunozgerathu vyakupeleka mwakuyana na umo vinthu viliri kwa iwo. (Luka 21:1-4; Mil. 4:32-35) Yehova wakuzirwiska mtima wa kupeleka uwu.

12, 13. Cifukwa wuli ŵanji ŵangatondeka kucita vinthu na nkhongono zawo zose ndiposo maluso ghawo ghose, kweni Yehova waŵawovwirenge wuli?

¹² Nkhongono na maluso ghithu. Yehova wakutovwira apo tikugwiliskira nchito nkhongono na maluso ghithu kuti tikhozgere vinthu vya Ufumu. Wakutilayizga kuti watovwirenge para tavuka. (Yes. 40:29-31) Kasi tikujiwona kuti tilije maluso ghakucitira mulimo uwu? Kasi tikughanaghana kuti ŵanji ndiwo mbakwenelera kucita mulimo uwu? Kumbukani kuti Yehova wangasazgirako maluso gha waliyose, nga umo wakacitira na Bezalelu na Oholiyabu.—Ex. 31:1-6; wonani cithuzithuzi cakwamba.

¹³ Yehova wakuticiska kuti tipelekenge viwemi comene, kukanilira cara. (Zinth. 3:27) Pa nyengo ya kuzengaso tempile, Yehova wakaphalira Ŵayuda mu Yerusalemu kuti ŵaghanaghanirepo comene pa umo ŵakucitira mulimo wa kuzenga. (Hag. 1:2-5) Ŵakatimbanizgikanga na vinthu vinyake ndipo ŵakaleka kuŵikapo mtima pa mulimo uwu. Nase tikwenera kusanda ivyo tikuŵika pakwamba na kuwona usange vikukolerana na khumbo la Yehova. Mphanyi ‘talanguluka umo tikukhalira’ kuti ticite vinandi pakukhozgera mulimo wa Ufumu mu mazuŵa gha umaliro agha.

KUPELEKA MWAKUYANA NA IVYO TILI NAVYO

14, 15. (a) Kasi tikukhozgeka wuli na ŵabali ŵithu ŵakavu? (b) Kasi tikwenera kuŵa na khumbo lakucita vici?

¹⁴ Ŵanthu ŵanandi ŵakukhala mu vyaru vikavu. Gulu lithu likuyezgayezga kovwira ŵabali awo ŵakukhala mu vyaru ivi. (2 Kor. 8:14) Ndipouli, ŵabali ŵakavu nawo ŵakuzirwiska mwaŵi wa kupeleka vyawanangwa. Yehova wakukondwa para ŵakavu ŵakupeleka mwakukondwa.—2 Kor. 9:7.

¹⁵ Mu caru cinyake cikavu comene ku Africa, ŵabali ŵanyake ŵakupatura kacigaŵa kacoko ka munda wawo, kuti ndalama izo ŵasangenge para ŵaguliska vinthu vya pa kacigaŵa aka zikhozgere mulimo wa Ufumu. Mu caru ici, mukaŵa mulimo wa kuzenga Nyumba ya Ufumu iyo ŵakayilindilira kwa nyengo yitali. Ŵabali na ŵadumbu ŵa mu mpingo uwu ŵakakhumbanga kovwira pakuzenga. Kweni mulimo uwu ukeneranga kucitika mu nyengo yakupandira mbuto. Ndipouli, cifukwa cakuti ŵakaŵikapo mtima kuti ŵaciteko mulimo uwu, muhanya ŵakagwiranga nchito ya kuzenga Nyumba ya Ufumu, ndipo mise ŵakalutanga ku minda kuti ŵakapande mbuto zawo. Ŵabali aŵa ŵakaŵa na mtima wa kujipeleka comene. Ivyo ŵakacita vikutikumbuska ivyo ŵabali ŵa ku Makedoniya mu nyengo ya Ŵakhristu ŵakwambilira ŵakacita. Nangauli “ŵakaŵa ŵakavu comene” kweni ŵakalomba kuti nawo ŵaŵe na mwaŵi wa kupeleka vyawanangwa. (2 Kor. 8:1-4) Mphanyi nase tapeleka ‘kwakulingana na thumbiko ilo Yehova watipa.’—Ŵazgani Duteronome 16:17.

16. Kasi tikwenera kucita wuli kuti sembe zithu ziŵe zakuzomerezgeka kwa Yehova?

¹⁶ Ndipouli, tikwenera kuŵa maso. Nga umo vikaŵira na Ŵaisrayeli, tikwenera kuwoneseska kuti sembe zithu zakupelekeka mwawanangwa ni zakuzomerezgeka kwa Ciuta. Nyengo zose tikwenera kuŵa ŵamahara kuti mbumba yithu na kusopa Yehova, viŵenge pa malo ghakwamba. Tikwenera yayi kuzomerezga kuti kuteŵetera ŵanji na nyengo yithu ndiposo cuma cithu vititondeske kupwelelera mbumba yithu mwauzimu na mwakuthupi. Para tingacita nthena, tingaŵa kuti tikupeleka mwakuyana na ivyo tilije. (Ŵazgani 2 Ŵakorinte 8:12.) Kweniso tikwenera kulutilira kukhozga umoyo withu wauzimu. (1 Kor. 9:26, 27) Ndipouli, tikwenera kumanya kuti para tikujipeleka kuteŵetera Ciuta ndiposo kucita vinthu mwakuyana na fundo za mu Baibolo, tikuŵa ŵacimwemwe ndiposo ŵakukhorwa. Ndipo uteŵeti withu ukuŵa ‘wakuzomerezgeka comene’ kwa Yehova.

KUJIPELEKA NKHWAKUZIRWA COMENE

17, 18. Kasi tikwenera kuŵawona wuli ŵanthu wose awo ŵakujipeleka cifukwa ca Ufumu, ndipo tose tikwenera kughanaghanirapo vici?

¹⁷ Ŵabali na ŵadumbu ŵithu ŵanandi ‘ŵajipungula nga nchakumwa pa sembe’ kwizira mu milimo iyo ŵakucita kuti ŵakhozgere vinthu vya Ufumu. (Fil. 2:17) Tikuŵawonga comene awo ŵakulongora mzimu wa kupeleka uwu. Ŵawoli na ŵana ŵa ŵabali awo ŵakudangilira pa vinthu vya Ufumu, nawo ŵakwenera kuwongeka comene cifukwa ca mzimu wa kupeleka na mtima wa kujipeleka uwo ŵakulongora.

¹⁸ Tikwenera kufwilirapo comene kuti tikhozgere vinthu vya Ufumu. Mphanyi tose talomba na kughanaghanirapo comene kuti ticite vyose ivyo tingafiska pakukhozgera vinthu vya Ufumu. Tikwenera kumanya kuti para ticitenge nthena, tisangenge vitumbiko vinandi sono, ndipo tizamusanga vinandi comene “mu mgonezi uwo ukwiza.”—Mrk. 10:28-30.