NKHANI YA PA CHIKOPI | MUNGAŴA PAUBWEZI NA CHIUTA
Kasi Zina la Chiuta Mukulimanya?
Kasi vingachitika kuti muleke kumanya zina la mubwezi winu? Yayi. Irina, wa ku Bulgaria, wakati: “Kuti munthu waŵe paubwezi na Chiuta wakwenera kumanya zina lake.” Nga umo tawonera mu nkhani yakwamba, Chiuta wakukhumba kuti muŵe nayo paubwezi. Ntheura wakutiphalira zina lake mu Baibolo. Wakuti: “Ine ndine Yehova; ili ndilo zina lane.”—Yesaya 42:8.
Chiuta wakutiphalira zina lake mu Baibolo. Wakuti: “Ine ndine Yehova; ili ndilo zina lane.”—Yesaya 42:8
Kasi pangaŵa suzgo usange munthu wakulimanya yayi zina la Chiuta? Enya. Wonani fundo iyi: Mu Malemba Ghachihebere, zina la Chiuta likusangika mu malo pafupifupi 7,000. Palije zina linyake ilo likuzunulika kanandi kuluska ili mu Baibolo. Yehova wakukhumba kuti timanye zina lake na kulizunura.a
Kuti ŵanthu ŵaŵe paubwezi, ŵakuphalirana dankha mazina. Kasi imwe zina la Chiuta mukulimanya?
Ŵanthu ŵanyake ŵangawona nga ni muyuyuro kuzunura zina la Chiuta chifukwa ni mutuŵa kweniso ngwankhongonozose. Ntchiwemi nadi yayi kuzunura zina la Chiuta bwekabweka. Yehova wakukhumba kuti awo ŵakumutemwa ŵachindikenge zina lake na kuphalirako ŵanji. (Masalmo 69:30, 31; 96:2, 8) Kumbukani kuti Yesu wakati ŵasambiri ŵake ŵalombenge kuti: “Ŵadada ŵithu imwe muli kuchanya, zina linu lituŵiskike.” Nase tingatuŵiska zina la Chiuta para tikumanyiska ŵanthu zina ili. Para tichitenge nthena, tiŵenge nayo paubwezi.—Mateyu 6:9.
Baibolo likulongora kuti Yehova wakuŵategherezga chomene awo ‘ŵakughanaghanira pa zina lake.’ (Malaki 3:16) Yehova wakuŵalayizga kuti: ‘Nimuvikilirenge chifukwa wakumanya zina lane. Wanichemenge, ndipo nimuzgorenge. Niŵenge nayo mu suzgo.’ (Masalmo 91:14, 15) Para tikukhumba kuŵa paubwezi na Yehova, ntchakuzirwa chomene kumanya zina lake na kulizunura.
a Mu Malemba Ghachihebere, panji kuti Chipangano cha Kale, zina la Chiuta likusangika mu malo ghanandi. Kweni chachitima ntchakuti mu Mabaibolo ghanandi ŵali kuwuskamo zina ili. Ŵali kuŵikamo mazina ghavithokozo nga ndakuti “Fumu” panji “Chiuta.” Kuti mumanye vinandi, wonani peji 195-197 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.