MAFUMBO AGHO BAIBOLO LIKUZGORA
Kasi vingachitika kuti timanye unenesko wakukhwaskana na Chiuta?
Chifukwa wuli Chiuta wakukhumba kuti timanye unenesko? Ŵazgani Yohane 17:3
Kwamba kale, Chiuta wakuyowoya na ŵanthu. Wakatuma mzimu wake utuŵa kovwira awo ŵakalembanga Baibolo kuti ŵalembe maghanoghano ghake. (2 Petrosi 1:20, 21) Tingamanya unenesko wakukhwaskana na Chiuta para tikuŵazga Baibolo.—Ŵazgani Yohane 17:17; 2 Timote 3:16.
Chiuta wakuyowoya vinandi mu Baibolo. Wakulongosora chifukwa icho wali kulengera ŵanthu, ivyo wazamuchitira ŵanthu, kweniso umo wakukhumbira kuti tikhalirenge. (Milimo 17:24-27) Nadi, Yehova Chiuta wakukhumba kuti timanye unenesko.—Ŵazgani 1 Timote 2:3, 4.
Chifukwa wuli Chiuta wakupokelera awo ŵakutemwa unenesko?
Yehova ni Chiuta wa unenesko, ndipo wakatuma Mwana wake Yesu kuzakasambizga ŵanthu unenesko. Ntheura awo ŵakutemwa unenesko Chiuta wakuŵaguzira kwa Yesu. (Yohane 18:37) Chiuta wakukhumba kuti awo ŵakutemwa unenesko ndiwo ŵamusopenge.—Ŵazgani Yohane 4:23, 24.
Satana Dyabulosi watondeska ŵanthu ŵanandi kuti ŵamanye Chiuta. Wakusambizga vinthu vyautesi. (2 Ŵakorinte 4:3, 4) Ŵanthu awo unenesko ŵakuwutemwa yayi ndiwo ŵakupulikira visambizgo vyautesi ivi. (Ŵaroma 1:25) Kweni ŵanthu mamiliyoni ghanandi ŵakusambira Baibolo, ndipo ŵakumanya unenesko wakukhwaskana na Chiuta.—Ŵazgani Milimo 17:11.