NKHANI YA PA CHIKOPI | BAIBOLO LAPONA KU VINANDI
Nkhani Yakukhumbikwira Kuyiwona Makora
Baibolo likupambana chomene na mabuku ghanyake ghose gha visopa. Palije buku linyake ilo, kwa nyengo yitali chomene, lawovwira ŵanthu ŵanandi kusintha vigomezgo vyawo kuluska Baibolo. Kweniso palije buku linyake, padera pa Baibolo, ilo ŵanthu ŵayezga kulisanga vifukwa na kulikayikira.
Ŵanthu ŵanyake ŵakusambira chomene ŵakukayikira usange ivyo vili mu Mabaibolo gha mazuŵa ghano ndivyo vikaŵa nadi mu malemba ghakwambilira. Pulofesa munyake wa vyachisopa wakayowoya kuti: “Tikumanya makora yayi usange ivyo vikulembeka mu Mabaibolo agho tili nagho sono ndivyo vikaŵako pakwambilira. Mu Mabaibolo gha mazuŵa ghano muli vinthu vinandi vyakubudika, ndipo ghanyake ghakalembeka pakati pajumpha vyaka vinandi chomene kufuma pa ghakwambilira. Kweniso ghakupambana nkhanira na Mabaibolo ghakwambilira munthowa zinandi.”
Ŵanyake ŵakulikayikira Baibolo, chifukwa cha ivyo ŵakuphalirika uko ŵakusopa. Chiyelezgero ni Faizal, uyo wakakulira mu banja ilo ndachikhristu yayi. Apo wakaŵa mwana, ŵapapi ŵake ŵakamuphaliranga kuti Baibolo ni buku lituŵa kweni lili kusinthika. Iyo wakuti: “Ndicho chifukwa nkhakayikiranga apo ŵanthu ŵanyake ŵakakhumbanga kuniphalira vya Baibolo. Nkhaghanaghananga kuti iwo ŵakaŵavya Baibolo lenecho ilo likalembeka pakwambilira. Nkhatenge ŵakaŵa na ilo lili kusinthika!”
Kwali Baibolo lili kusinthika panji yayi, ni nkhani iyo tikwenera kuyiwona makora. Tiyeni tiwone mafumbo agha: Kasi mungagomezga kuti munthazi vinthu vizamuŵa makora usange mukumanya yayi usange vinthu ivi vikaŵamo nadi mu Baibolo lakwambilira? (Rom. 15:4) Kasi mungalondezga fundo za mu Baibolo pakusankha vyakuchita pa nkhani ya ntchito, banja, panji kusopa usange mu Mabaibolo gha mazuŵa ghano muli vyakubudika vinandi?
Nangauli mabuku gha Baibolo agho ghakalembeka pakwambilira pasono kulije, kweni pali mabuku ghanyake ghakale chomene agho ghangatovwira kumanya unenesko. Pa mabuku agha paliso mipukutu masauzandi ghanandi ya Baibolo. Kasi mipukutu iyi yikapona wuli kuvunda, ku ŵakususka, kweniso ku awo ŵakakhumbanga kusintha uthenga wake? Kasi umo mipukutu iyi yaponera vingamovwirani wuli kuti mwambe kugomezga kuti Baibolo ilo muli nalo ndaunenesko? Wonani mazgoro gha mafumbo agha mu nkhani yapanthazi.