Ntchakuzirwa Chomene Kuyaniska Ivyo Mukugomezga Na Ivyo Baibolo Likuyowoya

KASI mukujiwona kuti ndimwe Mkhristu? Usange ni nthena, ndikuti muli pakati pa ŵanthu ŵakujumpha 2 biliyoni pa charu chose awo ŵakuti ŵakulondezga Khristu. Mazuŵa ghano, pali mipingo yinandi chomene iyo yikujichema Yachikhristu. Kweni yikupambana visambizgo na vigomezgo. Ntheura ivyo imwe mukugomezga vingapambana chomene na vya ŵanyake awo ŵakuti Mbakhristu. Kasi ivyo mukugomezga vili na ntchito yiliyose? Enya, chomene usange mukukhumba kuŵa mu Chikhristu icho chikuyowoyeka mu Baibolo.

Ŵanthu ŵakwambilira awo ŵakalondezganga Yesu Khristu ŵakachemekanga “Ŵakhristu.” (Milimo 11:26) Pakaŵavya chifukwa chakuti ŵaŵireso na mazina ghanyake, chifukwa gulu la Ŵakhristu likaŵa limoza. Ŵakhristu wose ŵakalondezganga visambizgo na ulongozgi wa Yesu Khristu, uyo wakambiska Chikhristu. Kasi imwe tchalitchi linu likuchita wuli? Kasi mukugomezga kuti likusambizga ivyo Khristu wakasambizganga kweniso ivyo ŵanthu ŵakwambilira awo ŵakalondezganga Khristu ŵakagomezganga? Kasi mungamanya wuli? Pali nthowa yimoza pera iyo mungamanyira. Zomerezgani Baibolo kuti limovwirani kumanya unenesko.

Wonani fundo iyi: Yesu Khristu wakachindikanga chomene Mazgu gha Chiuta. Wakakwiyanga chomene na awo ŵakasukuluskanga visambizgo vya mu Baibolo na kusambizga maluso gha ŵanthu. (Mariko 7:9-13) Ntheura tingati ŵanthu awo ŵakulondezga nadi Khristu ŵakwenera kwendera fundo za mu Baibolo. Waliyose uyo wakuti ni Mkhristu wangachita makora kujifumba kuti, ‘Kasi ivyo tchalitchi lane likusambizga vikukolerana na Baibolo?’ Kuti musange zgoro la fumbo ili, muyaniske ivyo tchalitchi linu likusambizga na ivyo Baibolo likuyowoya.

Yesu wakati awo ŵakusopa Chiuta ŵakwenera kumusopa mu unenesko, ndipo unenesko uwu ukusangika mu Baibolo. (Yohane 4:24; 17:17) Mpositole Paulosi wakayowoya kuti tingazakapona pekha para tamanya “makora unenesko.” (1 Timote 2:4) Ntheura ntchakukhumbikwa kuti ivyo tikugomezga vikoleranenge na unenesko wa mu Baibolo. Nkhani iyi njamaseŵera yayi, mbumoyo panji nyifwa.

KASI TINGAYANISKA WULI IVYO TIKUGOMEZGA NA BAIBOLO?

Tikumupemphani kuti muŵazge mafumbo 6 agho ghali panthazi na kuwona ivyo Baibolo likuyowoya. Wonani mavesi agho ghalembeka mu Baibolo linu, ndipo ghanaghanirani pa mazgoro ghake. Kufuma apo, jifumbani kuti, ‘Kasi ivyo tchalitchi lane likusambizga vikukolerana na ivyo Baibolo likuyowoya?’

Mafumbo agha ghamovwiraninge kuti mumanye usange ivyo mukugomezga vikukolerana na ivyo Baibolo likuyowoya. Kasi mwanozgeka kuyaniska ivyo tchalitchi linu likusambizga na ivyo Baibolo likuyowoya? Ŵakaboni ŵa Yehova ŵangamovwirani kuti mumanye unenesko wa mu Baibolo. Mungapempha Kaboni wa Yehova kuti wamusambizgani Baibolo kwaulere. Panji mungaluta pa webusayiti ya jw.org.

FUMBO 1: Kasi Chiuta ni njani?

ZGORO: Yehova, Dada wa Yesu, ni Chiuta wamuyirayira kweniso Mlengi wa vinthu vyose.

IVYO BAIBOLO LIKUYOWOYA:

“Nyengo zose para tikumulomberani, tikuwonga Chiuta, Awiske ŵa Fumu yithu Yesu Khristu.”—Ŵakolose 1:3.

“Ndimwe ŵakwenelera Yehova Chiuta withu, kupokera uchindami, ntchindi na nkhongono, chifukwa mukalenga vinthu vyose.”—Chivumbuzi 4:11.

Wonaniso Ŵaroma 10:13; 1 Timote 1:17.

FUMBO 2: Kasi Yesu Khristu ni njani?

ZGORO: Yesu ni Mwana wa Chiuta, wakwamba kubabika. Yesu wakachita kulengeka, ntheura wakaŵa na pakwambira. Yesu wali pasi pa Chiuta ndipo wakuchita khumbo la Chiuta.

IVYO BAIBOLO LIKUYOWOYA:

“Adada mbakuru kuluska ine.”—Yohane 14:28.

“[Yesu] ntchikozgo cha Chiuta wambura kuwoneka, wakwamba kubabika wa chilengiwa chose.”—Ŵakolose 1:15.

Wonaniso Mateyu 26:39; 1 Ŵakorinte 15:28.

FUMBO 3: Kasi mzimu utuŵa ni vichi?

ZGORO: Mzimu utuŵa ni nkhongono iyo Chiuta wakugwiliskira ntchito pakufiska khumbo lake. Ni munthu yayi. Ŵanthu ŵangazuzgika na mzimu utuŵa ndipo ungaŵapa nkhongono.

IVYO BAIBOLO LIKUYOWOYA:

“Elizabeti wakati wapulika kutawuzga kwa Mariya, bonda mu nthumbo yake wakabwalanthuka. Ndipo mzimu utuŵa ukiza pa Elizabeti.”—Luka 1:41.

“Muzamupokera nkhongono para mzimu utuŵa wiza pa imwe.”—Milimo 1:8.

Wonaniso Genizesi 1:2; Milimo 2:1-4; 10:38.

FUMBO 4: Kasi Ufumu wa Chiuta ni vichi?

ZGORO:Ufumu wa Chiuta ni boma lakuchanya. Yesu ndiyo ni Fumu ya Ufumu wa Chiuta. Sonosono apa, Ufumu uwu upangiskenge kuti khumbo la Chiuta lichitike pano pasi.

IVYO BAIBOLO LIKUYOWOYA:

“Mungelo wa 7 wakalizga mbata yake. Ndipo mazgu ghakuru ghakapulikikwa kuchanya, kuti: ‘Ufumu wa charu wazgoka Ufumu wa Fumu yithu na wa Khristu wake, ndipo iyo walamulirenge nga ni themba muyirayira swii.’”—Chivumbuzi 11:15.

Wonaniso Daniyeli 2:44; Mateyu 6:9, 10.

FUMBO 5: Kasi ŵanthu wose ŵawemi ŵakuluta kuchanya?

ZGORO: Yayi. Ŵanthu ŵachoko waka ŵakugomezgeka, awo ŵakuchemeka “ŵakamskambo kachoko,” ndiwo Chiuta wali kuŵasora kuti ŵalute kuchanya. Ŵamuwusa pamoza na Yesu nga ni mafumu pa ŵanthu.

IVYO BAIBOLO LIKUYOWOYA:

“Kopa chara imwe ŵakamskambo kachoko, chifukwa Awiskemwe ŵazomerezga kumupani Ufumu.”—Luka 12:32.

“Ŵazamuŵa ŵasembe ŵa Chiuta na Khristu, ndipo ŵazamuwusa nga ni mathemba pamoza na iyo.”—Chivumbuzi 20:6.

Wonaniso Chivumbuzi 14:1, 3.

FUMBO 6: Kasi Chiuta wakukhumba kuŵachitira vichi ŵanthu na charu chapasi?

ZGORO: Mu Ufumu wa Chiuta, charu chapasi chizamuŵa paradiso ndipo ŵanthu ŵakugomezgeka ŵazamukondwa na umoyo uwemi, mtende, kweniso umoyo wambura kumara.

IVYO BAIBOLO LIKUYOWOYA:

“Ŵakuzika ŵazamuhara charu chapasi, ŵazamukondwa chomene na mtende ukuru.”—Salimo 37:10, 11.

“Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:3, 4.

Wonaniso Salimo 37:29; 2 Petrosi 3:13.