“Mulimo Ngukuru”

ZUŴA linyake ku Yerusalemu kukachitika ungano wakuzirwa chomene. Themba Davide wakachema ‘ŵakaronga ŵa mafuko, ŵantchito ŵa pa nyumba ya themba kweniso ŵanalume wose ŵankhongono.’ Ŵanthu wose aŵa ŵakaŵa ŵakukondwa ndipo ŵakakhazganga kupulika chipharazgo chapadera. Yehova wakaŵa kuti wasankha Solomoni, mwana wa Davide, kuti ndiyo wazengenge nyumba yikuru panji kuti tempile lakusoperamo Chiuta waunenesko. Yehova wakaphalira themba la Israyeli, Davide, ilo pa nyengo iyi likaŵa lichekuru chomene, umo nyumba yake yikwenera kuzakazengekera. Davide wakapeleka pulani yose ya nyumba iyi kwa Solomoni. Davide wakati: “Mulimo ngukuru. Pakuti ni tempile la munthu chara, kweni la Yehova Chiuta.”—1 Mid. 28:1, 2, 6, 11, 12; 29:1.

Pamanyuma Davide wakafumba kuti: “Sono kasi ni njani uyo wajipeleka muhanya uno kuti wizenge na chawanangwa mu woko lake kwa Yehova?” (1 Mid. 29:5) Kasi imwe muŵengepo pa nyengo iyi, mphanyi mukachita wuli? Kasi mukate mukhozgerenge mulimo uwu? Ŵaisrayeli ŵakajipeleka chomene pa mulimo uwu. Nadi, Ŵaisrayeli “ŵakasekelera pakupeleka vinthu . . . pakuti ŵakapeleka vyawanangwa . . . kwa Yehova na mtima wakufikapo.”—1 Mid. 29:9.

Pakati pajumpha vyaka, Yehova wakakhazikiska chinthu chakuzirwa chomene kuluska tempile. Wakakhazikiska tempile lauzimu, kung’anamura nthowa yiphya yakusopera Yehova kwizira mu sembe ya Yesu. (Heb. 9:11, 12) Kasi Yehova wakovwira wuli ŵanthu kuti ŵaphemane nayo mazuŵa ghano? Kwizira mu ntchito yakusambizga na kupanga ŵasambiri. (Mat. 28:19, 20) Ntchito iyi yawovwira ŵanthu mamiliyoni kuti ŵaŵe na mwaŵi wakusambira Baibolo, ndipo ŵanthu ŵanandi ŵakubatizika. Kweniso mipingo yinandi yikupangika.

Ivi vyapangiska kuti mulimo wakupanga mabuku ghakulongosora Baibolo, kuzenga na kunozga Nyumba za Ufumu, kweniso mulimo wakupenja malo gha maungano gha dera na gha chigaŵa usazgikire chomene. Kasi walipo munthu uyo wangakana kuti mulimo wakuthandazga makani ghawemi ndiwo ngwakuzirwa chomene mazuŵa ghano?—Mat. 24:14.

Ŵateŵeti ŵa Chiuta ŵakutemwa chomene Yehova na ŵazengezgani ŵawo ndipo ŵakumanya kuti mulimo wakupharazga ukwenera kuchitika mwaluŵiro. Lekani iwo ŵakwiza na ‘chawanangwa mu woko lawo kwa Yehova’ mwakupeleka vyawanangwa kuti viwovwire pa mulimo wa Ufumu. Ntchakukondweska nadi ‘kuchindika Yehova na vinthu vithu vyakuzirwa,’ kweniso kuti vyawanangwa vithu vikugwiliskirika ntchito makora kuti viwovwire pa mulimo ukuru uwu uwo ukuluta panthazi chomene kuluska kumasinda kose.—Zinth. 3:9.

Umo Ŵanyake Ŵakupelekera Vyawanangwa Vyakovwira Pa Ntchito Ya Pa Charu Chose

Nga umo vikaŵiranga mu nyengo ya mpositole Paulosi, ŵanandi mazuŵa ghano ‘ŵakuŵika kanthu padera,’ panji kupangirathu bajeti ya ndalama zakuti ŵakaponye mu bokosi la mpingo la vyawanangwa, lakulembeka kuti, “Vyakupeleka vya Mulimo wa pa Charu Chose.” (1 Kor. 16:2) Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova ya mu charu chawo. Kweniso mungatuma mwekha vyawanangwa vinu ku wupu wakuzomerezgeka na dango uwo Ŵakaboni ŵa Yehova mu charu chinu ŵakugwiliskira ntchito. Kuti mumanye zina la wupu uwo Ŵakaboni ŵa Yehova mu charu chinu ŵakugwiliskira ntchito, fumbani ofesi ya munthavi. Adiresi ya ofesi ya munthavi mungayisanga pa www.jw.org. Vyawanangwa ivyo mungatumizga mwekha ni ivi:

VYAWANANGWA IVYO VIKUWEZGEKA YAYI

Vyawanangwa ivi ni ivyo vikupelekeka kwizira pa makina gha ku banki ghakutumizgira ndalama, ndiposo pa makadi gha ku banki. Kweniso ku maofesi ghanyake gha munthavi, vyawanangwa vikupelekeka kwizira pa jw.org, panji pa webusayiti yinyake yakusoleka.
Mungapeleka ndalama, majuda, panji katundu munyake. Pakupeleka vinthu ivi, lembani kalata yakulongosora kuti vyawanangwa ivi kuzakaniwezgera yayi.

VYAWANANGWA IVYO VIKUWEZGEKA PARA MWENEKO WAVIKHUMBA

Ni ndalama izo munthu wakupeleka ndipo zingawezgeka usange mweneko wazikhumba.
Pakupeleka ndalama izi mulembe kalata yakulongosora kuti zizakawezgeke.

VYAWANANGWA VINYAKE IVYO MUNGAPELEKA

Padera pa kupeleka ndalama na katundu munyake, paliso nthowa zinyake izo mungawovwilirapo pa ntchito ya Ufumu ya pa charu chose. Nthowa izi zili pasi apa. Pa nthowa yiliyose iyo mungatemwa kupelekera vyawanangwa vinu, chakwamba fumbani ofesi ya munthavi iyo yikulaŵilira ntchito ya mu charu chinu kuti mumanye nthowa izo zilipo. Pakuti charu chilichose chili na malango ghake gha misonkho, ntchakuzirwa kuti mufumbenge dankha awo ŵakumanya malango gha misonkho na gha charu pambere mundasankhe nthowa yakupelekera vyawanangwa iyo yingaŵa yiwemi kwa imwe.

Inshuwalansi: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakapike ndalama zinu za inshuwalansi panji za penshoni.

Maakaunti gha ku Banki: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakatore ndalama zinu para mwafwa. Kweniso mungalembeska kuti para mwafwa ndiwo uzakapike ndalama zinu za penshoni izo mwasungiska ku banki. Pakuchita ivi, mukwenera kulondezga malango gha mabanki gha mu charu chinu.

Masheya: Mungapeleka masheya agho muli nagho ku kampani nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Kweniso mungalemba kuti para mwafwa wupu uwu ndiwo uzakatore masheya ghinu.

Malo na Nyumba: Mungapeleka malo panji nyumba nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo muchali ŵamoyo.

Kupeleka Ndalama Panji Katundu Munyake Kuti Viwezgekenge Pachokopachoko Chaka Chilichose: Pa ndondomeko iyi, munthu wangapeleka ndalama panji katundu munyake ku wupu uwo Ŵakaboni ŵa Yehova ŵakugwiliskira ntchito, na kupangana nawo kuti chaka chilichose umuwezgerenge pachokopachoko panji kwa munyake uyo mweneko wasankha. Munthu ŵakumukhizgirako msonkho mu chaka icho wapelekera vyawanangwa ivi.

Chuma Icho Chikhalenge Para Mwafwa: Mungalemba wilu yakuzomerezgeka na boma kuti wupu uwo Ŵakaboni ŵa Yehova ŵakugwiliskira ntchito uzakapike katundu panji ndalama zinu para mwafwa. Para wilu yinu mwalemba kuti wupu wa chisopa ndiwo uzakapokere chuma chinu, mukulipira msonkho ukuru yayi.

Mazgu ghakuti “vyawanangwa vinyake ivyo mungapeleka,” ghakulongora kuti uyo wapelekenge vyawanangwa ivi wakunozgekera. Awo ŵakukhumba kupeleka vyawanangwa ivi ku ntchito ya pa charu chose ya Ŵakaboni ŵa Yehova, ŵaŵerenge burosha la mutu wakuti, Charitable Planning to Benefit Kingdom Service Worldwide. Burosha ili lili mu Chingelezi na Chisipanishi. Ndipo likulongosora umo ŵanthu ŵangapelekera vyawanangwa mu nthowa zakupambanapambana, kwali apo ŵachali ŵamoyo panji kuti vizakapelekeke para ŵafwa. Nyengo zinyake, fundo izo zili mu burosha ili zingayana viŵi yayi na umo vinthu viliri mu charu chinu chifukwa malango gha misonkho ndiposo malango ghanyake ghakupambana. Pakulondezga nthowa izi, ŵanandi ŵawovwirapo pa ntchito yithu ndiposo ŵawovwira ŵanthu ŵakusoŵerwa pa charu chose ndipo ŵachepeskako msonkho uwo ŵakuŵadumura. Usange mu charu chinu burosha ili lilimo mungapempha kwa mulembi wa mpingo winu.

Kuti mumanye vinandi, “Mungapeleka Vyawanangwa Kuti Movwire pa Ntchito ya Pacharu Chose” pa webusayiti ya jw.org panji mungalemba kalata panji kwimba foni ku ofesi ya munthavi ya mu charu chinu.