“Mahara Ghako Ghatumbikike”

MAZGU agha wakayowoya ni Davide apo wakalumbanga mwanakazi munyake uyo wakiza kwa iyo. Mwanakazi uyu zina lake ni Abigelu. Chifukwa wuli Davide wakamulumba ndipo tingasambirako vichi kwa Abigelu?

Abigelu wakaŵa wakutengwa, ndipo Davide wakakumana nayo apo wakachimbiranga Fumu Sauli. Mfumu wa Abigelu wakaŵa Nabala. Iyo wakaŵa musambazi chomene. Wakaŵa na viŵeto vinandi ivyo ŵakaliskanga ku mapiri gha kumwera kwa Yuda. Davide na ŵanalume ŵake “ŵakaŵa nga ni linga” ku ŵaliska ŵa Nabala na viŵeto vyawo. Iyo wakatuma ŵateŵeti ŵake kwa Nabala kuti wamupeko chakurya ‘chilichose icho wangaŵa nacho.’ (1 Sam. 25:8, 15, 16) Ivyo Davide wakapempha vikaŵa vichoko chomene para tingayaniska na umo iyo na ŵateŵeti ŵake ŵakapwelelera vinthu vya Nabala.

Kweni Nabala, uyo zina lake likung’anamura “Wambura Mahara” panji kuti “Muzereza,” wakachita mwakuyana na zina lake. Nabala wakazgora mwaukali kweniso mwamsinjiro ndipo wakamunora Davide ivyo wakapempha. Ntheura Davide wakanozga ulendo wakuti wakalange Nabala chifukwa cha msinjiro wake kweniso zgoro lake lambura mahara. Nabala na ŵa munyumba yake ŵakate ŵapwetekekenge chifukwa cha uzeleza wake.—1 Sam. 25:2-13, 21, 22.

Abigelu wakati waghanaghanirapo ivyo Davide wangachita chifukwa cha ivyo mfumu wake wakachita, iyo wakachitapo kanthu mwaluŵiro ndiposo mwachikanga. Mwantchindi wakapempha Davide kuti waghanaghanirepo umo ivyo wakakhumbanga kuchita, vikhwaskirenge ubwezi wake na Yehova. Kweniso wakapeleka chakurya chakukwana kwa Davide na ku ŵateŵeti ŵake. Iyo wakawona kuti ni Yehova wakatuma Abigelu kuti wamuwezge kuti waleke kuchita vinthu ivyo vikate vikwiyiskenge Chiuta. Davide wakati kwa Abigelu: “Mahara ghako ghatumbikike. Utumbikike chifukwa cha kuniwezga muhanya uno ku mulandu wa ndopa.”—1 Sam. 25:18, 19, 23-35.

Apa tawona kuti tikwenera yayi kuŵa nga ni Nabala na kuleka kuwonga viwemi ivyo Yehova na ŵanyithu ŵakutichitira. Kweniso ntchiwemi kuchitapo kanthu mwaluŵiro para tikuwona kuti vinthu vinyake viheni vingachitika. Para tachita nthena, nase tingayowoya nga ni wamasalimo uyo wakaphalira Chiuta kuti: “Nisambizgani mahara na umanyi.”—Sal. 119:66.

Ŵanthu ŵanyake ŵangawona usange tikuchita vinthu mwamahara ndiposo mwaumanyi. Kwali ŵangayowoya panji yayi, kweni ŵangajipulika nga ni Davide, uyo wakati: “Mahara ghako ghatumbikike.”