3 Likutovwira Kuzizipizga Masuzgo

Pali masuzgo ghanyake agho pasono tingaghagega yayi panji kughamazga. Mwachiyelezgero, palije icho mungachitapo para mubali winu wafwa panji mukulwara nthenda yambura kukonda munkhwala. Mukwenera kusanga nthowa za umo mungazizipizgira. Kasi panthena apa napo Baibolo lingatovwira?

NTHENDA YAMBURA KUKONDA MUNKHWARA

Rose wakati: “Nili kubabika na suzgo linyake ilo likunipangiska kuti nipulikenge vyakuŵinya vikuru chomene. Pasono umoyo wane ngwakusuzga chomene, nakuti nilije nkhongono.” Chinthu chimoza icho Rose wakufipa nacho mtima ntchakuti nyengo zinyake wakutondeka kuŵazga Baibolo kweniso kuchita milimo yinyake yakusopa Chiuta. Kweni mazgu agho Yesu wakayowoya pa Mateyu 19:26 ghakamovwira chomene. Mazgu agha ghakuti: “Kwa Chiuta vinthu vyose ni vyamachitiko.” Rose wakamanya kuti pali nthowa zinandi zakusambilira. Pakuti nyengo zinyake wakupulika vyakuŵinya chomene mwakuti wakutondeka kuŵerenga, iyo wakamba kutegherezga Baibolo lakuchita kujambura kweniso mabuku ghanyake ghakulongosora vya Baibolo.a Iyo wakati: “Kuŵavyenge Baibolo lakujambura kweniso mabuku agha, mphanyi nkhumanya yayi umo nati nichitirenge kuti nikhozge ubwezi wane na Chiuta.”

Para Rose wali na chitima chifukwa chakuti pasono wangachita yayi ivyo kale wakachitanga, wakupembuzgika na mazgu gha pa 2 Ŵakorinte 8:12 agho ghakuti: “Chawanangwa icho munthu wakupeleka kufumira pasi pa mtima ndicho Chiuta wakukondwa nacho, chifukwa Chiuta wakukhumba kuti munthu wapelekenge ivyo wangafiska, ivyo wangatondeka kufiska yayi.” Mazgu agha ghakumukumbuska Rose kuti Chiuta wakukondwa nayo chifukwa wakuchita ivyo wangafiska kuyana na nkhongono zake.

CHITIMA

Delphine, uyo tamuzunura kukwambilira wakati: “Mwana wane msungwana wa vyaka 18 wati wafwa, nkhaŵa na chitima chomene mwakuti nkhamanyanga yayi usange ningalutilira kuŵa na umoyo. Vinthu vikasintha chomene.” Kweni wakapembuzgika na mazgu gha pa Salimo 94:19, apo wamasalimo wakaphalira Chiuta kuti: “Para vyenjezgo vyaninyekezga, imwe mukunisanguluska na kunizikiska mtima.” Iyo wakati: “Nkhamulombanga Chiuta kuti wanovwire kusanga vyakuchita ivyo vinganovwira kuchepeska chitima.”

Ntheura wakajipeleka kuchita milimo yinyake mu gulu la Yehova. Pamasinda wakajiyaniska na chekeni (kalala) wakuphyoka uyo mwana wakugwiliskira ntchito. Nangauli wangaŵa wakuphyoka kweni wakuŵa wakuzirwa kwa mwana chifukwa wakutoweskera vithuzi. Mwakuyana waka, nangauli Delphine wakajiwonanga kuŵa wambura kuzirwa, kweni wakawovwiranga ŵanthu ŵanyake. Iyo wakati: “Pamasinda nkhawona kuti para nkhapembuzganga ŵanthu kwizira mu Baibolo, vikaŵa nga kuti Yehova wakupembuzgaso ine.” Iyo wakalemba ŵanthu ŵanandi awo ŵakuzunulika mu Baibolo awo ŵakasangana na masuzgo ghakuru. Pamasinda wakawona kuti wose ŵakaŵa ŵanthu awo ŵakalombanga kwa Chiuta. Kweniso wakamanya kuti “wangasanga yayi mazgoro pa ivyo wakulomba usange wakuŵazga yayi Baibolo.”

Delphine wasambiraso chinthu chinyake chifukwa cha kuŵerenga Baibolo. Wasambira kuti wakwenera kuŵika maghanoghano pa vinthu vyakunthazi m’malo mwa vyakumasinda. Mazgu gha chigomezgo gha pa Milimo 24:15 ghakumukhozga chomene. Lemba ili likuti: “Kuzamuŵa chiwuka cha ŵarunji na ŵambura urunji.” Kasi Delphine ngwakusimikizga wuli kuti wazamuwonanaso na mwana wake? Delphine wakuti: “Nili na chigomezgo chose kuti panyengo iyo Yehova wali kuŵika nizamuwonanaso na mwana wane ndipo nkhughanaghanira umo nizamukondwera nga umo vikaŵira apo wakababikanga.”

a Pa jw.org pali mabuku ghanandi ghakujambura agho munthu wangategherezga.

Baibolo lingamupembuzgani nanga ni apo muli na chitima chomene

KASI CHIUTA WANGATOVWIRA WULI?

Baibolo likuzgora fumbo ili mwakupulikikwa makora. Likuti: “Yehova wali pafupi na wose awo ŵakumuchema, wose awo ŵakumuchema mu unenesko. Wakukhorweska khumbo la awo ŵakumopa, wakupulika para ŵakulira kuti waŵavwire, ndipo wakuŵathaska.” (Salimo 145:18, 19) Agha ni mazgu ghakukhozga nadi. Kweni kasi Chiuta, wakuzgora wuli malurombo gha awo ŵakumupenja na mtima wose?

WAKUTIPA NKHONGONO:

Masuzgo ghangatihangayiska na kutigongoweska. (Zintharika 24:10) Kweni Yehova “wakuŵapa nkhongono ŵakuvuka, nkhongono zinandi ku awo ŵalije nkhongono.” (Yesaya 40:29) Mpositole Paulosi, uyo wakazizipizga masuzgo ghakuru, wakati: “Mu vinthu vyose, nkhusanga nkhongono mwa uyo wakunipa nkhongono.” (Ŵafilipi 4:13) Chiuta wakamupa Paulosi nkhongono kwizira mu mzimu wake utuŵa. Namwe mungalomba kwa Chiuta kuti wamupani mzimu wake utuŵa.—Luka 11:13.

WAKUTIPA MAHARA:

Kasi mungachita wuli kuti mupulikiskenge na kulondezga ivyo Baibolo likuyowoya? Yakobe wakalemba kuti: “Ntheura, usange yumoza wa imwe wakupeleŵera vinjeru, walombenge Chiuta, pakuti iyo wakupeleka mwawanangwa ku wose, nakuti wakutombozga yayi, ndipo vipikenge kwa iyo.” (Yakobe 1:5) Mukwenera kuchita vinthu kuyana na malurombo ghinu, kweniso mulondezgenge ivyo mukuŵazga mu Baibolo. (Yakobe 1:23-25) Para mungachita nthena muwonenge kuti Baibolo ndakovwira nadi.

WAKUTIPA MTENDE:

Nanga ni para tasuzgika chomene maghanoghano, Yehova wangatovwira kuti mtima ukhazikike. Mazgu ghake ghakuti: “Lekani kwenjerwa na chinthu chilichose, kweni mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu kwizira mwa Khristu Yesu.” (Ŵafilipi 4:6, 7) Tingachita makora kulomba Yehova kuti watipe mtende.

Kasi tingachita wuli usange suzgo lithu likumara luŵiro yayi? Kuchimbilira kuyowoya kuti Chiuta wamutayani yayi. Nanga masuzgo ghinu ghangalutilira, kweni Chiuta wangamupani nkhongono kuti muzizipizge. (1 Ŵakorinte 10:13) Baibolo likutilayizgaso kuti nyengo yikwiza apo masuzgo ghazamumalirathu!