Mungakhala na Umoyo Kwamuyirayira pa Charu Chapasi

NI MWAŴI UKURU! Mlengi withu wali kutilayizga umoyo wamuyirayira pa charu chapasi. Kweni ŵanandi vikuŵasuzga kugomezga. Ŵakuyowoya kuti ‘waliyose wakwenera kufwa chifukwa para wamunthu wababika ukulindizga waka nyifwa.’ Ŵanyake ŵakugomezga nadi kuti kuli umoyo wamuyirayira, kweni ŵakuti uzamuŵa pa charu chapasi yayi. Ŵakugomezga kuti munthu wangaŵa na umoyo wamuyirayira pekha para wafwa na kuluta kuchanya. Imwe mukuti wuli?

Pambere mundazgore, tiyeni tiwone dankha umo Baibolo likuzgolera mafumbo ghakulondezgapo agha: Kasi umo munthu waliri vikulongora wuli kuti wali kulengeka kuti wakhalenge kwamuyirayira? Chifukwa wuli Chiuta wakalenga charu kweniso ŵanthu? Kasi nyifwa yikamba wuli?

MUNTHU WALI KULENGEKA MWAPADERA

Pa vilengiwa vyose ivyo Chiuta wali kulenga pa charu, munthu ndiyo wali kulengeka mwapadera chomene. Chifukwa wuli? Baibolo likuti munthu wali kulengeka mu “chikozgo” cha Chiuta. (Genizesi 1:26, 27) Kasi ichi chikung’anamurachi? Chikung’anamura kuti munthu wali kulengeka na mikhaliro yakuyana na ya Chiuta, nga ntchitemwa ndiposo urunji.

Munthu wali kulengeka munthowa yakuti wapambaniskenge pakati pa chiwemi na chiheni, kweniso kuti waŵe na khumbo la kumanya vinandi vya Chiuta na kuŵa nayo paubwezi. Lekani taŵanthu tikuzizikika na vilengiwa, tikukondwa na sumu kweniso mapowemu. Chakuzirwa chomene ni khumbo ilo tili nalo lakuti tiŵe paubwezi na Mlengi withu. Mikhaliro iyi ndiyo yikupambaniska ŵanthu na vilengiwa vinyake vyose ivyo vili pa charu.

Ghanaghanirani fundo iyi: Chiuta walengenge ŵanthu kuti ŵakhalenge vyaka vichoko waka, kasi mphanyi wali kuŵalenga munthowa yapadera iyi kweniso na khumbo lakuti ŵakhalenge kwamuyirayira? Unenesko ngwakuti Chiuta wali kutilenga na mikhaliro yapadera iyi kuti tizakakondwe na umoyo wamuyirayira pa charu chapasi.

KHUMBO LA CHIUTA

Ŵanyake ŵakuti likaŵa khumbo la Chiuta yayi kuti ŵanthu ŵakhalenge kwamuyirayira pa charu chapasi. Iwo ŵakuti charu chikalengeka kuti tikhalemo kwa kanyengo kachoko waka. Ŵakugomezga kuti charu ni malo ghakuti ŵanthu ŵayezgekerepo usange ŵangaŵa ŵakwenelera kukakhala kuchanya. Viŵenge nthena, mphanyi tikuti Chiuta ndiyo wakuchitiska vinthu viheni ivyo vikuchitika pa charu. Kweni ivi vikususkana na ivyo Baibolo likuyowoya pa nkhani ya umo Chiuta waliri. Baibolo likuti: “Nthowa zake zose mburunji. Chiuta wakugomezgeka, wambura ubendezi. Iyo ni murunji na wakunyoloka.”—Dotoronome 32:4.

Baibolo likuyowoya mwakupulikikwa makora chifukwa icho Chiuta wakalengera charu. Likuti: “Kuchanya nkhwa Yehova, kweni charu chapasi wali kuchipeleka ku ŵana ŵa ŵanthu.” (Salimo 115:16) Chiuta wakalenga charu chakutowa kuti chiŵe chikaya cha ŵanthu kwamuyirayira ndipo wakachipanga na vyose vyakukhumbikwa kuti ŵanthu ŵakondwenge na umoyo kwamuyirayira.—Genizesi 2:8, 9.

“Kuchanya nkhwa Yehova, kweni charu chapasi wali kuchipeleka ku ŵana ŵa ŵanthu.”—Salimo 115:16

Baibolo likutiphaliraso chifukwa icho Chiuta wakalengera ŵanthu. Chiuta wakaphalira ŵanthu ŵaŵiri ŵakwambilira kuti “babanani, mwandane muzuzge charu chapasi na kuchithereska. Muŵe na mazaza . . . pa vyamoyo vyose ivyo vikwenda pa charu chapasi.” (Genizesi 1:28) Ŵakaŵa na mwaŵi wakusanuzga chikaya chawo cha paradiso pa charu chose! Adamu na Eva pamoza na ŵana ŵawo ŵakate ŵakakhalenge na umoyo wamuyirayira pa charu chapasi, kuchanya yayi.

CHIFUKWA WULI TIKUFWA?

Chifukwa wuli pera tikufwa? Baibolo likulongora kuti yumoza wa ŵangelo ŵa Chiuta, uyo pamanyuma wakamba kumanyikwa kuti Satana Dyabulosi wakatimbanizga khumbo la Chiuta mu munda wa Edeni. Kasi wakachita wuli?

Satana wakapangiska ŵapapi ŵithu ŵakwamba, Adamu na Eva, kuti nawo ŵagalukire Chiuta. Satana wakayowoya kuti Chiuta wakuŵanora wanangwa wakuti ŵamanyenge ŵekha icho ntchiwemi na icho ntchiheni, ndipo pamasinda Adamu na Eva ŵakasankha kuŵa ku chigaŵa cha Satana. Kasi vikaŵamalira wuli? Pati pajumpha nyengo, ŵakafwa nga umo Chiuta wakayowoyera. Ŵakataya mwaŵi wakuŵa na umoyo wamuyirayira mu paradiso pa charu chapasi.—Genizesi 2:17; 3:1-6; 5:5.

Ivyo Adamu na Eva ŵakachita vikukhwaska waliyose. Baibolo likuti: “Kwananga kukanjira mu charu na munthu yumoza [Adamu] ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose.” (Ŵaroma 5:12) Tikufwa chifukwa tili kuhara kwananga na nyifwa kufuma ku ŵapapi ŵithu ŵakwamba, ntchifukwa chakuti ndimo Chiuta wakanozgera yayi.

MUNGAKHALA NA UMOYO KWAMUYIRAYIRA PA CHARU CHAPASI

Uchigaluka wa Adamu na Eva ukatimbanizgirathu yayi khumbo la Chiuta. Chifukwa chakuti Chiuta ngwachitemwa kweniso ngwaurunji, wakanozga vyakuti watifwature ku kwananga na nyifwa ivyo tili kuhara kufuma ku ŵapapi ŵithu ŵakwamba. Mpositole Paulosi wakati: “Pakuti malipiro gha kwananga ni nyifwa, kweni chawanangwa icho Chiuta wakupeleka mbumoyo wamuyirayira mwa Khristu Yesu Fumu yithu.” (Ŵaroma 6:23) Chifukwa cha chitemwa, Chiuta “wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yohane 3:16) Yesu wakati wajipeleka kuŵa sembe, wakawezgerapo vyose ivyo Adamu wakataya.a

Sonosono apa, Chiuta wafiskenge layizgo lake lakuti charu chose chiŵe paradiso. Namwe mungazakasanga vitumbiko ivi para mungapulikira chenjezgo la Yesu lakuti: “Njirani pa chipata chifinyi, chifukwa chipata chikuru chili na nthowa yisani iyo yikuya ku pharanyiko, ndipo mbanandi awo ŵakwendamo. Kweni chipata chifinyi chili na nthowa yichoko iyo yikuya ku umoyo, ndipo mbachoko awo ŵakuyisanga.” (Mateyu 7:13, 14) Vili kwa imwe kusankha. Kasi musankhenge vichi?