Kasi Chiuta Wakumupulikiskani?

IVYO CHILENGIWA CHIKUTISAMBIZGA

Ghanaghanirani ubwezi uwo ukuŵapo pakati pa ŵamuleza (ŵamaphaska) awo ŵakukozgana chomene. Iwo ŵakukolerana chomene. Nancy Segal uyo ngwamuleza kweniso wakulaŵilira wupu wa Twin Studies Center wakayowoya kuti ŵamuleza ŵanyake “ŵakupulikiska makora ivyo wamuleza munyawo uyo ŵakababikira lumoza wakuyowoya ndipo ŵakumanya ivyo munyawo wakung’anamura nangauli wangalongosora vinandi yayi.” Mwanakazi munyake uyo nayo ngwamuleza ndipo wakukozgana chomene na munyake, wakalongosora ubali uwo ukuŵapo pa ŵanthu ŵaŵiri aŵa. Iyo wakati: “Ukumanya chilichose chakukhwaskana na munyako.”

Kasi ntchivichi chikovwira kuti ŵanthu aŵa ŵapulikiskanenge nthena? Awo ŵakufufuza ŵakusachizga kuti malo agho ŵamuleza ŵakulira, umo ŵamuleza ŵalelekera kweniso kuŵa na majini ghakuyana ndivyo vikovwira kuti ŵamuleza ŵapulikiskanenge chomene.

GHANAGHANIRANI FUNDO IYI: Mlengi uyo wali kulenga majini munthowa yakuziziswa iyi, wakumanya makora umo waliyose wa ise wali kulengekera. Wamasalimo Davide wakayowoya kuti: “Mukanivungilizga mu nthumbo ya amama. Viwangwa vyane vikabisika chara kwa imwe apo nkhapangikanga ku udesi. . . . Maso ghinu ghakaniwona nkhati namba waka kupangika mu nthumbo, viŵaro vyane vyose vikalembeka mu buku linu.” (Salimo 139:13, 15, 16) Ni Chiuta pera ndiyo wakumanya umo majini ghithu ghali kupangikira, kweniso wakumanya vinthu vyose ivyo vikutichitikira pa umoyo withu. Umo majini ghithu ghali kupangikira na umo Chiuta wakutimanyira makora, vikutisimikizgira nadi kuti wakutipulikiska pa chilichose.

IVYO BAIBOLO LIKUSAMBIZGA PA NKHANI YA VINJERU VYA CHIUTA

Davide wakalomba kuti: “A Yehova, mwanisanda ndipo mukunimanya. Mukumanya para nkhukhala pasi na para nkhuwuka. Maghanoghano ghane mukughamanyira patali. Pambere lulimi lwane lundayowoye mazgu, wonani, imwe mwaghamanya kale, A Yehova.” (Salimo 139:1, 2, 4) Yehova wakumanyaso umo tikujipulikira kweniso “wakumanya chilichose icho munthu wakughanaghana.” (1 Midauko 28:9; 1 Samuyeli 16:6, 7) Kasi malemba agha ghakuvumbura vichi za Chiuta?

Nangauli para tikulomba nyengo zinyake tingayowoya yayi maghanoghano ghithu ghose na kulongosora umo tikujipulikira, kweni Mlengi withu wakuwona ivyo tikuchita na kupulikiska chifukwa chake. Kweniso wakumanya viwemi ivyo takhumbanga kuchita, nangauli pangaŵa vinthu vinyake ivyo vingatitondeska kuti tichite ivyo tikukhumba. Pakuti Chiuta ndiyo wali kutilenga kuti titemwenge ŵanyithu, wakukhumbisiska kuwona na kumanya vinthu viwemi ivyo tikukhumba kuchita.—1 Yohane 4:7-10.

Malemba ghakutisimikizgira kuti

• “Maso gha Yehova ghali pa ŵarunji, ndipo makutu ghake ghakupulikizga maŵeyelero ghawo.”—1 PETROSI 3:12.

• Chiuta wakutilayizga kuti: “Nikupenge mahara na kukusambizga nthowa iyo ukwenera kwendamo. Nikulongozgenge na jiso lane.”—SALIMO 32:8.

CHIUTA NGWALUSUNGU CHOMENE

Kasi kumanya kuti Chiuta wakupulikiska masuzgo ghithu na umo tikujipulikira vingatovwira kuti tizizipizge? Ghanaghanirani ivyo vikachitikira Anna, wa ku Nigeria. Iyo wakati: “Nkhakayikiranga usange umoyo ngwakuzirwa chifukwa cha masuzgo agho nkhasangananga nagho. Nkhaŵa chokoro ndipo nkhapweleleranga nekha mwana wane msungwana uyo wakaŵa mu chipatala chifukwa cha nthenda yinyake ya ku wongo (hydrocephalus). Nyengo yinyake nkhasangika na kansa ya mu mabere ndipo nkhakhumbikwiranga kupimika, kuchitika opareshoni, na kupokera munkhwala. Chikaŵa chakusuzga chomene chifukwa nkhaŵa mu chipatala ndipo nyengo yeneyiyo nipwelelere mwana wane msungwana uyo wakaŵa mulwari.”

Ntchivichi chikawovwira Anna kuti wazizipizge? Iyo wakati: “Nkhaghanaghanirangapo lemba la Ŵafilipi 4:6, 7 ilo likuti ‘mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu.’ Nyengo yiliyose para naghanaghanirapo lemba ili, nkhajipulikanga kuti nili paubwezi na Yehova ndipo nkhamanyanga kuti wakunipulikiska kuluska umo ine nkhujipulikira. Kweniso ŵabali na ŵadumbu mu mpingo ŵakanikhozganga chomene.

“Nangauli nichali mulwari, kweni ine na mwana wane tiliko makora kuluska pakwamba. Chifukwa chakuti Yehova wali ku chigaŵa chithu, tasambira kuti ntchiwemi kughanaghanira viwemi para tikusangana na masuzgo. Lemba la Yakobe 5:11 likutisimikizgira kuti: ‘Tikuŵawona kuti mbakukondwa awo ŵazizipizga. Mwapulika umo Yobu wakazizipizgira ndipo mwawona umo Yehova wakamutumbikira paumaliro. Mwawona kuti Yehova ngwachitemwa chomene ndiposo ngwalusungu.’” Yehova wakapulikiska suzgo ilo Yobu wakasangana nalo, ndipo tili na chigomezgo chose kuti nase Chiuta wakutipulikiska para tikusangana na masuzgo.