Vinthu Vyose Ni Vyamachitiko kwa Yehova

KUGWIRA NTCHITO KWAMBIRA KUMATANDAKUCHA M’PAKA MISE

Nkhababika mu 1937 ku famu, kufupi na Tokmok, Kyrgyzstan. Mbumba yithu Njachikyrgyz, ndipo ndichoso ntchiyowoyero chithu. Ŵapapi ŵane ŵakagwiranga ntchito ya kulima, ndipo ŵakagwiranga ntchito iyi kwamba kumatandakucha m’paka mise. Ŵantchito ŵakaŵapanga chakurya zuŵa lililose kweni ndalama ŵakaŵapanga kamoza pa chaka. Amama ŵakasuzgikanga chomene kupwelelera ine na mudumbu wane. Nati nasambira sukulu kwa vyaka vinkhondi pera, nane nkhamba kugwira ntchito ku minda.

Mu chigaŵa icho nkhakhalanga, ŵanthu ŵanandi ŵakaŵa ŵakavu, ndipo kusanga vinthu vyakukhumbikwa pa umoyo chikaŵanga chakusuzga chomene. Pakuti nkhaŵa munyamata, nkhaghanaghanirangako viŵi yayi chifukwa icho ŵanthu ŵakalengekera panji umo vinthu vizamuŵira munthazi. Nkhamanyanga yayi kuti unenesko wakuyowoya za Yehova Chiuta na khumbo lake vingasintha umoyo wane. Umo unenesko ukafikira ku Kyrgyzstan na kuthandazgika, ni nkhani yakukondweska chomene. Vyose vikambira kukwithu, kumpoto kwa Kyrgyzstan.

ŴANTHU AWO ŴAKAKAKIKA ŴAKIZA NA UNENESKO KU KYRGYZSTAN

Unenesko wakukhwaskana na Yehova Chiuta ukathandazgika ku Kyrgyzstan m’ma 1950. Kuti ivi vichitike, unenesko ukathereska dankha fundo izo ŵanthu ŵakazigomezganga chomene. Chifukwa wuli vikaŵa nthena? Charu icho sono ni Kyrgyzstan, panyengo iyo chikaŵa pasi pa Union of Soviet Socialist Republics (USSR). Mu vyaru vyose ivyo vikaŵa pasi pa USSR, namo Ŵakaboni ŵa Yehova ŵakanjilirangapo yayi pa ndyali. (Yoh. 18:36) Ntheura ŵakatambuzgikanga, ŵakatenge mbalwani ŵa Chikomyunizimu. Kweni palije fundo izo zingatondeska Mazgu gha Chiuta kufika ku ŵanthu ŵa mitima yiwemi. Sambiro linyake lakuzirwa chomene ilo nasambira pa umoyo wane ndakuti kwa Yehova “vinthu vyose ni vyamachitiko.”—Mrk. 10:27.

Ŵakaboni ŵa Yehova ŵakasazgikira chomene mu Kyrgyzstan chifukwa cha nthambuzgo. Chifukwa wuli vikaŵa nthena? Ku Siberia uko ŵakasungangako ŵanthu awo ŵakatenge mbakuwukira, nako chikaŵa chigaŵa cha USSR. Ŵanthu aŵa ŵakati ŵafwatulika, ŵanandi ŵakiza ku Kyrgyzstan, ndipo ŵanji ŵa iwo ŵakiza na unenesko. Yumoza wawo wakaŵa Emil Yantzen, uyo wakababikira ku Kyrgyzstan mu 1919. Emil wakatumizgika ku msasa wakusuzgirako ŵanthu ndipo kura wakakumana na Ŵakaboni. Wakazomera unenesko na kuwelera kukaya mu 1956. Emil wakiza na kukhala kufupi na Sokuluk, mu chigaŵa cha kukwithu. Mpingo wakwamba mu Kyrgyzstan ukapangika ku Sokuluk mu 1958.

Pakati pajumpha chaka, Victor Vinter wakasamukira ku Sokuluk. Mubali wakugomezgeka uyu wakatambuzgika kanandi waka. Kaŵiri kose wakakhalapo vyaka vitatu mu jele chifukwa cha kuleka kunjilirapo pa vya charu. Pamanyuma wakakhala vyaka 10 mu jele. Kweniso wakakhala vyaka vinkhondi ku msasa. Kweni nthambuzgo yikajandizga yayi unenesko.

UNENESKO UKIZA KUFUPI NA KUKAYA

Mu 1963 ku Kyrgyzstan kukaŵa Ŵakaboni 160, ndipo ŵanandi mwa iwo ŵakaŵa ŵa ku Germany, Ukraine, na Russia. Yumoza wawo wakaŵa Eduard Varter uyo wakabatizikira ku Germany mu 1924. M’ma 1940 chipani cha Nazi chikamutuma ku msasa wakusuzgirako ŵanthu, ndipo pakati pajumpha vyaka vichoko waka, ŵanthu ŵa Chikomyunizimu mu USSR ŵakatuma Eduard ku wuzga. Mu 1961 mubali wakugomezgeka uyu, wakaluta ku tawuni ya Kant iyo yili kufupi chomene na tawuni yakukwithu.

Elizabeth Fot, uyo wakaŵa muteŵeti wakugomezgeka wa Yehova, nayo wakakhalanga ku Kant. Kuti wasange ndalama kuti zimovwirenge pa umoyo wake, wakasonanga malaya. Chifukwa chakuti wakasonanga mwaluso, ŵanthu nga ni madokotala na ŵasambizgi ŵakaguranga malaya kwa iyo. Yumoza mwa makasitomara ghake wakaŵa Aksamai Sultanalieva. Mwanakazi uyu wakaŵa muwoli wa munthu uyo wakagwiranga ntchito mu ofesi ya loya wa boma. Aksamai wakaluta kwa Elizabeth kuti wakagure vyakuvwara, kweni wakafumba Elizabeth mafumbo ghanandi ghakukhwaskana na umoyo kweniso ŵakufwa. Elizabeth wakagwiliskira ntchito Baibolo pakuzgora mafumbo ghake. Pamanyuma, Aksamai wakaŵa mupharazgi uyo wakalimbikiranga chomene.

Panyengo iyo, Nikolai Chimpoesh wa ku Moldova, wakimikika kuŵa mulaŵiliri wa dera ndipo wakateŵetera vyaka pafupifupi 30. Padera pa kwendera mipingo, mubali Nikolai wakendeskangaso ntchito ya kukopera mabuku na kughatumizga ku mipingo. Ŵalara ŵa boma ŵakamanya ivyo mubali uyu wakachitanga. Ntheura Eduard Varter wakamupa ulongozgi uwemi Nikolai, wakati: “Para ŵaboma ŵakufumba, uŵaphalire mwambura kubisa kuti mabuku ghithu ghakufuma ku likuru lithu ku Brooklyn. Umulaŵiskenge kumaso wa KGB. Kopa yayi.”—Mat. 10:19.

Pakati pajumpha nyengo yichoko waka kufuma apo mubali wakamupira ulongozgi uwu, Nikolai wakachemeka ku likuru la KGB mu Kant. Nikolai wakalongosora ivyo vikachitika. Wakati: “Wa KGB wakanifumba uko tikutora mabuku ghithu. Nkhamuzgora kuti ghakufuma ku Brooklyn. Chakuyowoya chikamusoŵa. Wakaniphalira waka kuti nilutenge ndipo wakanichemaso yayi.” Ŵakaboni ŵachikanga aŵa ŵakalutilira kupharazga makani ghawemi mwakuchenjera ku mpoto kwa Kyrgyzstan, uko kukaŵa kukwithu. Apo unenesko wakukhwaskana na Yehova ukafikanga mu banja lane mu 1981, muwoli wane, Mairambubu, ndiyo wakamba kuwupulika.

MUWOLI WANE WAKAMANYA LUŴIRO KUTI UWU MBUNENESKO

Mairambubu ngwa ku Naryn, ku Kyrgyzstan. Zuŵa linyake mu Ogasiti 1974, wakaluta ku nyumba ya mudumbu wane, ndipo ndiko tikawonerana kakwamba. Nati namuwona waka Mairambubu, nkhamutemwa. Tikatorana zuŵa leneliro.

Mu Janyuwale 1981 Mairambubu wakalutanga ku msika ndipo wakakwera basi. Wali mu basi, wakapulikako ivyo ŵanthu ŵakadumbiskananga nga umo nanguyowoyera kukwambilira kwa nkhani iyi. Muwoli wane wakakhumbanga kumanya vinandi. Ntheura wakamufumba zina na adiresi mwanakazi uyo wakayowoya mazgu ghara mu basi. Mwanakazi uyu wakaphalira Mairambubu kuti zina lake ni Apun, kweni wakachita mwakuchenjera chifukwa nanga ni m’ma 1980 milimo ya Ŵakaboni yikaŵa yakukanizgika. M’malo mwa kumupa adiresi muwoli wane, Apun wakapempha adiresi yithu. Muwoli wane wakiza ku nyumba uku wali mwee!

Mairambubu wakati: “Napulika vinthu vyakukondweska chomene. Mwanakazi munyake waniphalira kuti sonosono apa ŵanthu ŵazamufwaso yayi. Tizamuwopananga yayi na vinyama vyamuthondo.” Kwa ine, nkhani iyi yikaŵa nga ntchidokoni waka. Nkhati: “Tiye tilindilire m’paka apo mwanakazi uyu wizirenge kuti wazakatilongosolere makora.”

Pakati pajumpha myezi yitatu Apun wakiza nadi. Wakiza kanandi waka, ndipo tikakumana na ŵanyake mwa Ŵakaboni ŵakwamba Ŵachikyrgyz. Ŵadumbu aŵa ŵakatiphalira unenesko wakukhwaskana na Yehova na ivyo wakukhumba kuchitira ŵanthu. Ŵakatisambizganga na buku la Kufuma ku Paradiso Wakutayika Kuya ku Paradiso Wakusangikaso.a Pakuti buku ili likaŵapo limoza pera mu chiyowoyero cha Tokmok, tikakopera tekha mabuku ghanyake pa mawoko.

Chimoza mwa vinthu vyakwamba ivyo tikasambira, ukaŵa uchimi wa pa Genizesi 3:15. Uchimi uwu uzamufiskika kwizira mwa Yesu uyo ni Mesiya kweniso Fumu. Uwu ni uthenga uwemi nadi uwo waliyose wakwenera kuwupulika. Ichi ntchifukwa chinyake icho tikambira kupharazga makani ghawemi. (Mat. 24:14) Nyengo yichoko waka, unenesko ukamba kusintha umoyo withu.

UMO MAUNGANO NA UBATIZO VIKACHITIKIRANGA MU NYENGO YA BANI

Mubali munyake ku Tokmok wakatichemera ku ukwati. Tikati tafika ku ukwati, ine na muwoli wane tikawona kuti Ŵakaboni ŵakachitanga vinthu mwakupambana na ŵanthu ŵanyake. Pa ukwati pakaŵavya moŵa, ndipo vyose vikenda mu ndondomeko yiwemi. Ivi vikapambana chomene na maukwati ghanyake agho tikalutako chifukwa kanandi awo ŵachemeka ŵakaloŵeranga, ŵakaŵanga na nkharo ziheni, na kutuka.

Kweniso tikalutanga ku maungano gha mpingo ku Tokmok. Maungano agha ghakachitikiranga mu nkhorongo para kwacha makora. Ŵabali na ŵadumbu ŵakamanyanga kuti ŵapolisi ŵakatilondalondanga. Ntheura ŵakaŵika mulinda kuti wawonenge usange ŵapolisi ŵafika. Mu nyengo yakuzizima, tikachitiranga maungano mu nyumba. Ŵapolisi ŵakizapo kanandi waka ku nyumba iyo tikawunganangako ndipo ŵakakhumbanga kumanya ivyo tikachitanga. Mu Julayi 1982, ine na Mairambubu tikabatizika mu Dambo la Chüy. Kweni tikeneranga kuchita vinthu mwakuchenjera chomene. (Mat. 10:16) Ŵabali ŵakizanga mu tumagulu tuchokotuchoko na kuwungana mu nkhorongo. Tikimba sumu ya Ufumu na kutegherezga nkhani ya ubatizo.

M’PATA UKAJULIKA KUTI TISAZGIREKO UTEŴETI WITHU

Mu 1987, mubali munyake wakanipempha kuti nilute kwa munthu wakunweka uyo wakakhalanga mu tawuni ya Balykchy. Kufuma ku nyumba kukafika kwa munthu uyu nkhenda maora ghanayi pa sitima yapamtunda. Tati talutako kanandi waka kukapharazga ku Balykchy, tikasanga kuti kuli ŵanthu ŵanandi awo ŵakakhumbanga kumanya unenesko. Uwu ukaŵa mwaŵi wakuti tisazgireko uteŵeti withu.

Kanandi ine na Mairambubu tikalutanga ku Balykchy. Kanandi tikakhalanga kwenekuko pa Chisulo na Sabata. Tikalutanga mu upharazgi, kweniso kuchitiska maungano. Mwaluŵiro ŵanthu awo ŵakakhumbanga mabuku ghithu ŵakamba kuŵa ŵanandi. Kufuma ku Tokmok, tikayeghanga mabuku mu mishok, ilo ni thumba lakuyeghera mboholi. Mathumba ghaŵiri gha mabuku agho tikayeghanga mwezi uliwose ghakakwananga yayi ŵanthu. Kweniso tikaŵapharazgiranga aŵo takwera nawo sitima para tikuluta na kuwera ku Balykchy.

Mu 1995, mpingo ukapangika ku Balykchy pati pajumpha vyaka 8 kufuma apo tikambira kuluta ku tawuni iyi. Mu vyaka vyose ivyo tikalutanga ku Balykchy na kuwelera ku Tokmok tikamara ndalama zinandi. Pakuti tikaŵa ŵakavu, kasi tikafiska wuli kulipira ndalama izi? Nyengo na nyengo mubali munyake wakatipanga ndalama zakulipilira vyakukhumbikwa vyose. Yehova wakawona khumbo ilo tikaŵa nalo lakuti tisazgireko uteŵeti withu, ndipo wakatijulira “vipata vyakuchanya.” (Mal. 3:10) Nadi, vinthu vyose ni vyamachitiko kwa Yehova.

TIKATANGWANIKANGA NA BANJA KWENISO UTEŴETI

Mu 1992, nkhimikika kuŵa mulara. Nkhaŵa mulara wakwamba wa Chikyrgyz mu Kyrgyzstan. Ku mpingo withu ku Tokmok, milyango yinandi ya uteŵeti yikajulika. Tikasambiranga Baibolo na ŵachinyamata ŵanandi Ŵachikyrgyz awo ŵakasambiranga sukulu. Yumoza wawo wakuteŵetera mu Komiti ya Munthavi, ndipo ŵanyake ŵaŵiri mbapayiniya ŵapadera. Kweniso tikawovwirangaso ŵanji pa maungano ghithu. Kukwambilira kwa vyaka vya m’ma 1990, mabuku ghithu ghakaŵa mu Chirussia. Maungano nagho ghakachitikiranga mu chiyowoyero ichi. Kweni ŵanthu ŵanandi ŵakamba kwiza mu mpingo ndipo ŵakayowoyanga Chikirghiz. Ntheura nkhaŵang’anamuliranga kuti ŵapulike makora unenesko.

Ine na Mairambubu tikalerangaso ŵana ŵithu. Tikalutanga na ŵana ŵithu ku maungano kweniso tikapharazganga nawo. Mwana withu msungwana zina lake Gulsayra, uyo panyengo iyo wakaŵa na vyaka 12, wakatemwanga chomene kuyowoyeskana na ŵanthu mu msewu na kuŵaphalirako vya Baibolo. Ŵana ŵithu ŵakatemwanga chomene kusunga pamtima mavesi gha mu Baibolo. Ivi vikawovwira ŵana ŵithu ndiposo pamanyuma ŵazukuru ŵithu kuti ŵatemwenge kuchitako milimo ya mpingo. Pa ŵana ŵithu 9 na ŵazukuru ŵithu 11 awo ŵachali ŵamoyo, 16 ŵakuteŵetera Yehova panji ŵakuluta ku maungano na ŵapapi ŵawo.

VINTHU VYAKUKONDWESKA IVYO VIKACHITIKA

Ŵabali na ŵadumbu ŵithu ŵakutemweka awo ŵakambiska ntchito ya Yehova mu chigaŵa chithu m’ma 1950, ŵangazizwa chomene kuwona umo vinthu vyasinthira. Mwachiyelezgero, kufuma m’ma 1990 tili na wanangwa kupharazga makani ghawemi na kuwungana pamoza mu unandi.

Mu 1991, ine na muwoli wane tikaŵapo pa ungano wa chigaŵa wakwamba uwo ukachitikira ku Alma-Ata, uko pasono kukumanyikwa kuti ku Almaty, Kazakhstan. Mu 1993, ŵabali ku Kyrgyzstan ŵakaŵa na ungano wa chigaŵa wakwamba uwo ukachitikira mu Spartak Stadium ku Bishkek. Pambere ungano undachitike, ŵabali na ŵadumbu ŵakanozga sitediyamu iyi kwa sabata yimoza. Bwana wa pa sitediyamu iyi wakakondwa chomene na umo tikachitira ndipo wakati tingachitiramo ungano kwambura kulipira.

Mu 1994, kukachitikaso chithu chinyake chakukondweska chomene. Buku lakwamba likafuma mu Chikirghiz. Pasono mabuku ghithu ghakung’anamulika mu Chikirghiz pa ofesi ya munthavi ku Bishkek. Mu 1998, boma likazomerezga ntchito ya Ŵakaboni ŵa Yehova ku Kyrgyzstan. Gulu lakura, ndipo pasono tilipo ŵapharazgi ŵakujumpha 5,000. Pasono, ku Kyrgyzstan kuli mipingo 83 na magulu 25 ghakuyowoya Chitchayinizi, Chingelezi, Chikirghiz, Chirussia, Chiyowoyero Chamawoko cha ku Russia, Chiturkish, Chiuighur, na Chiuzbek. Ŵabali na ŵadumbu wose aŵa, awo ŵali kufuma ku malo ghakupambanapambana, ŵakuteŵetera Yehova mwakukolerana. Yehova wawovwira kuti vinthu vyose ivi vichitike.

Kweniso Yehova wali kusintha umoyo wane. Nkhababikira mu banja likavu ilo likagwiranga ntchito ya kulima, ndipo nkhasambira sukulu vyaka vinkhondi pera. Kweni Yehova wanigwiliskira ntchito kuti niteŵetere nga mulara, na kusambizga ŵanthu ŵakusambira kuluska ine kuti ŵamanye unenesko wa mu Baibolo. Kuyowoya unenesko, Yehova wakuchita vinthu ivyo munthu wakhazganga yayi kuti vingachitika. Ivyo vyanichitikira pa umoyo wane vikunipa nkhongono kuti nilutilire kupharazga vya Yehova, uyo “vinthu vyose ni vyamachitiko” kwa iyo.—Mat. 19:26.