Mu muwuso wa Chiuta, vilengiwa vyake vyose vikaŵa vyakukolerana kweniso vikaŵa pa mtende

Chifukwa Wuli Tikukhumbikwira Ufumu wa Chiuta?

Kufuma waka apo ŵanthu ŵakwamba ŵakalengekera, Chiuta uyo zina lake ni Yehova ndiyo yekha uyo wakalamuliranga. Iyo wakalamuliranga mwachitemwa. Wakapanga chikaya chakutowa, uwo ukaŵa munda wa Edeni kuti ŵanthu ŵakhalengemo, ndipo mukaŵa vyakurya vinandi. Kweniso ŵanthu wakaŵapa ntchito yiwemi. (Genizesi 1:28, 29; 2:8, 15) Ŵanthu ŵalutilirenge kupulikira Chiuta mphanyi wakukhala mwamtende m’paka sono.

Adamu wakolera chipaso chakukanizgika icho Eva wamupa. — Ŵanthu ŵakwamba ŵakakana kuti Chiuta ndiyo waŵalamulirenge

Baibolo likulongora kuti mungelo wakugaluka, uyo pamanyuma wakachemeka kuti Satana Dyabulosi, wakasuska muwuso wa Chiuta. Wakati ŵanthu ŵangaŵa ŵakukondwa kwambura kulongozgeka na Chiuta. Chachitima ntchakuti ŵapapi ŵithu ŵakwamba, Adamu na Eva, nawo ŵakagalukira Chiuta na muwuso wake.—Genizesi 3:1-6; Chivumbuzi 12:9.

Pakuti ŵakakana kuti Chiuta ndiyo waŵe Muwusi wawo, Adamu na Eva ŵakataya chikaya chawo cha Paradiso kweniso chigomezgo cha kukhala na umoyo wamuyirayira. (Genizesi 3:17-19) Ivyo ŵakasankha vikakhwaskaso ŵana awo ŵakababa. Baibolo likuti Adamu wakananga. Ntheura “kwananga kukanjira mu charu . . . ndipo nyifwa yikiza chifukwa cha kwananga.” (Ŵaroma 5:12) Paliso masuzgo ghanyake agho ghiza chifukwa cha kwananga. Baibolo likuti: “Munthu wakuwusa munyake na kumupweteka.” (Mupharazgi 8:9) Apa fundo njakuti, pakuŵa masuzgo ghanandi para munthu wakuwusa ŵanyake.

ŴANTHU ŴAKAMBA KUWUSA ŴANYAWO

Nimurodi wimilira mwakujitukumura. Kumanyuma kuli ŵanthu ŵakuzenga chigongwe. — Nimurodi wakagalukira Yehova

Baibolo likuti munthu wakwamba kulamulira ŵanthu wakaŵa Nimurodi. Iyo wakagalukira muwuso wa Yehova. Kufuma waka nyengo yira, ŵanthu ŵamazaza ŵakugwiliskira ntchito uheni mazaza ghawo. Vyaka 3,000 ivyo vyajumpha, Themba lavinjeru Solomoni likati: “Nkhawona masozi gha ŵakuyuzgika, ndipo ŵakaŵavya wakuŵasanguluska. Awo ŵakaŵayuzganga ŵakaŵa na nkhongono.”—Mupharazgi 4:1.

Nase mazuŵa ghano tili na suzgo lakuyana waka. Mu 2009 buku linyake la United Nations likati: “Masuzgo ghanandi agho ghakuchitika mu charu, ntchifukwa cha ŵanthu awo ŵakuwusa uheni.”

CHIUTA WACHITENGEPO KANTHU!

Ŵanthu pa charu chose ŵakukhumba boma liwemi ilo lingaŵawusa makora. Ivi ndivyo Mlengi withu walayizga kuti wachitenge.

Vithuzi: Ivyo vyachitika chifukwa cha muwuso wa ŵanthu. 1. Mwanakazi wa ku Asia wali mu tawuni yakubinkha ndipo wakolera mwana uyo wakulira. 2. Mwanalume muchekuru wali mu chipatala ni mulwari. 3. Ŵasilikari ŵali ku nkhondo. 4. Ŵanthu ŵakuchita viwoneskero. 5. Mwanakazi na mwana wake ŵasanga gilasi la nyumba yawo lasweka. 6. Tawuni yili na josi linandi kweniso nthambo za magesi. — Nanga ni maboma ghawemi gha ŵanthu ghatondeka kumazga masuzgo gha ŵanthu

Chiuta wali kukhazikiska boma panji kuti Ufumu wake uwo uzamuwuskapo maboma ghose gha ŵanthu, ndipo “iwo wekha ndiwo uzamuŵako kwamuyirayira.” (Daniyeli 2:44) Ufumu uwu ndiwo ŵanthu ŵanandi ŵakulomba. (Mateyu 6:9, 10) Kweni Chiuta iyomwene ndiyo wazamuwusa yayi mu Ufumu uwu. M’malo mwake iyo wali kusankha munyake kuti ndiyo wazakalamulire. Kasi wali kusankha njani?