“Mungakwaniska Kucita Upayiniya”
1. Kasi mudumbu munyake wakajipulika wuli apo wakacitanga upayiniya?
1 Kathe B. Palm wakati: “Palije mulimo uwo uli kunipapo cimwemwe cikuru panji vyandulo vinandi vyauzimu kuluska upayiniya.” Wakacita upayiniya mwakujipeleka kwa vilimika vinandi mu caru ca Chile ku South America. Pakuwona vyandulo ivyo awo ŵali mu uteŵeti wanyengozose ŵakusanga, mutepanji munyake wali kumuphaliranipo kuti: “Mungakwaniska kucita upayiniya.”
2. Cifukwa wuli vinthu vyauzimu ndivyo vikupangiska munthu kuŵa wakukhorwa? Longosorani.
2 Ni Uteŵeti Wakukhorweska: Yesu, uyo nchakuwonerapo cithu, wakakondwanga comene kucita khumbo la Ŵawiske. (Yoh. 4:34) Ntheura, apo wakasambizganga ŵasambiri ŵake kuti munthu wakukhorwa para wakucita vinthu vyauzimu, wakamanyanga ico wakuyowoya. Tikuŵa ŵakukhorwa usange tikucita milimo iyo Yehova wakukondwa nayo. Kweniso, tikuŵa ŵakukondwa comene para tikumalira nyengo yithu, nkhongono zithu, na cuma cithu pakovwira ŵanji.—Mil. 20:31, 35.
3. Kasi tingasanga cimwemwe ca mtundu wuli para tikumalira nyengo yinandi mu uteŵeti?
3 Para timalirenge nyengo yinandi mu uteŵeti, mipata yakwambiskira na kucitiska masambiro gha Baibolo yiŵenge yinandi. Nanga cigaŵa cithu cingaŵa na ŵanthu ŵanandi ŵambura kunweka, tingasambira Baibolo na ŵanthu ŵanandi kuluska umo tikaghanaghaniranga cifukwa tikuŵa na maluso ghanandi. Ŵapayiniya ŵangagwiliskira nchito vyose ivyo ŵakusambira ku Sukulu ya Uteŵeti wa Upayiniya, iyo ŵakulutako para ŵacita upayiniya kwa cilimika cimoza. (2 Tim. 2:15) Para tikufwilirapo, tingapanda mbuto zaunenesko izo mukuluta kwa nyengo zingapambika.—Muph. 11:6.
4. Kasi ŵawukirano awo ŵali pafupi kumalizga sukulu ŵakwenera kughanaghanira vici?
4 Ŵawukirano: Apo muli pafupi kumalizga masambiro ghinu gha ku sekondare, kasi mukughanaghana kuti muzakacite vici? Pasono, mukumalira nyengo yinandi ku sukulu. Kasi para mwamalizga sukulu, muzamucita nayo vici nyengo iyo mukamaliranga ku sukulu? M’malo mwa kwamba nchito yakulembeka, mwalekeraci kulomba na kughanaghanirapo kuti mucite upayiniya wanyengozose? Maluso agho muzamusambira gha umo mungapharazgira ŵanthu ŵa mafuko ghanyake, umo mungamazgira vyakujandizga, kuŵa ŵakujikora, ndiposo kuŵa na luso pa kusambizga ghazamuŵa ghacandulo umoyo winu wose.
5. Kasi ŵapapi ndiposo ŵanthu mu mpingo ŵangakhozga wuli ŵapayiniya?
5 Ŵapapi, kasi mukuciska ŵana ŵinu kuti ŵaghanaghanire kucita uteŵeti wanyengozose? Mazgu ghinu ndiposo vinthu viwemi ivyo mukucita vingaŵawovwira comene kuti ŵaŵikenge Ufumu panthazi. (Mat. 6:33) Ray, uyo wakayamba upayiniya apo wakati wamalizga sukulu, wakati: “Nyengo zose amama ŵakaniphaliranga kuti upayiniya ni uteŵeti wakukhorweska.” Ŵanthu wose mu mpingo ŵangakhozga ŵapayiniya na mazgu ghawo ndiposo kuŵawovwira. Jose, wa ku Spain, wakati: “Ŵanthu ŵa mu mpingo wakwithu ŵakawonanga kuti upayiniya ni mulimo uwemi comene uwo ŵawukirano ŵangacita. Fundo zawo ndiposo vinthu viwemi ivyo ŵakayowoyanga vyakukhwaskana na uteŵeti wa upayiniya pamoza na wovwiri wawo vikanipangiska kuti niyambe kucita upayiniya kwambura kucicizgika.”
6. Kasi tingacita wuli para sono tilije khumbo la kucita upayiniya?
6 Kumazga Ivyo Vikutitondeska: Wuli usange mukuti, ‘Nilije khumbo la kucita upayiniya.’ Usange ndimo mukuwonera, muphalirani Yehova umo mukujipulikira. Mungamuphalira kuti, ‘Nkhumanya yayi usange ningakwaniska upayiniya, kweni nkhukhumba kucita ico cingamukondweskani.’ (Sal. 62:8; Zinth. 23:26) Pamanyuma, penjani ulongozgi mu Mazgu ghake ndiposo gulu lake. Ŵapayiniya ŵanyengozose ŵanandi ŵakadankha ‘kuceta’ upayiniya wakanyengo, ndipo cimwemwe ico ŵakasanga cikaŵaciska kuti ŵambe uteŵeti wanyengozose.—Sal. 34:8.
7. Kasi tingamazga wuli suzgo la kujikayikira kuti tingafiska maora 70 pa mwezi?
7 Wuli usange mukujikayikira kuti mungafiska maora 70 pa mwezi? Mwalekeraci kuyowoya na ŵapayiniya awo vinthu pa umoyo wawo vikuyana na vinu? (Zinth. 15:22) Lembani ndondomeko zakupambanapambana za umo mungagaŵira nyengo. Muwonenge kuti kuleka kucita vinthu vyambura kuzirwa na kujigulira nyengo yakucitira uteŵeti nkhupusu kuluska umo mukaghanaghaniranga.—Efe. 5:15, 16.
8. Cifukwa wuli nyengo zose tikwenera kusanda umo vinthu viliri kwa ise?
8 Sandaniso Umo Vinthu Viliri kwa Imwe: Kanandi vinthu vikusintha pa umoyo. Nchiwemi kuti nyengo na nyengo musandenge umo vinthu viliri kwa imwe. Mwaciyelezgero, kasi muli pafupi kupumura pa nchito? Randy, uyo wakapumura luŵiro pa nchito, wakati: “Ivyo nkhasankha vikanovwira kuti nambe upayiniya wanyengozose pamoza na muwoli wane, kweniso vyatipa mwaŵi wakuti tikateŵetere ku cigaŵa uko kukukhumbikwira ŵapharazgi ŵanandi. Nasanga vitumbiko vinandi cifukwa ca ivyo nkhasankha, kweni thumbiko likuru ndakuti nili na njuŵi yiwemi.”
9. Kasi ŵakutorana ŵakwenera kughanaghanira vici?
9 Ŵakutorana ŵanyake ŵajisanda mwakupwelelera ndipo ŵawona kuti nchakukhumbikwa yayi kuti wose ŵagwirenge nchito yakulembeka. Mbunenesko kuti kucita nthena kungakhumba kuti mbumba zisinthe vinthu vinyake pa umoyo wawo, kweni nkhwacandulo comene. John, uyo muwoli wake wali kuleka nchito mwakuti wasazgireko uteŵeti wake, wakati: “Nchakukondweska comene kuwona kuti muwoli wane wakutangwanika na vinthu vyauzimu zuŵa lililose.”
10. Nchivici cikuciska Ŵakhristu kucita upayiniya?
10 Ukulongora Kuti Muli na Citemwa Ndiposo Cipulikano: Yehova wasankha mulimo wa kupharazga kuŵa wakuzirwa comene kuluska mulimo uliwose uwo tingacita. Sonosono apa mgonezi uwu umalenge, ndipo awo ŵakucema pa zina la Yehova ŵazamuponoskeka. (Rom. 10:13) Kutemwa Ciuta ndiposo kuwonga ivyo wakuticitira kutipangiskenge kuti tipulikire languro la Mwana lakuti tipharazgenge mwamwamphu. (Mat. 28:19, 20; 1 Yoh. 5:3) Kweniso, kugomezga kuti tikukhala mu mazuŵa ghaumaliro kutipangiskenge kuti tileke kugwiliskira nchito caru mwakufikapo kweni ticitenge vyose ivyo tingafiska apo nyengo yicalipo.—1 Kor. 7:29-31.
11. Para mbali panji mudumbu watiphalira kuti tingakwaniska kucita upayiniya, kasi tikwenera kumuwona wuli?
11 Tikucita upayiniya wanyengozose cifukwa ca kulondezga waka ivyo gulu likutiphalira yayi, kweni kuti tikondweske Ciuta. Ntheura usange mbali panji mudumbu wakumuphalirani kuti mungakwaniska kucita upayiniya, ndikuti wakumukhumbirani viwemi. Ndipo lombani na kughanaghanira kuŵa mu gulu la ŵanthu awo ŵakucita mulimo wakukhorweska uwu.
[Mazgu Ghakukhozgera pa peji 4]
Ŵapapi, kasi mukuciska ŵana ŵinu kuti ŵaghanaghanire kucita uteŵeti wanyengozose?
[Mazgu Ghakukhozgera pa peji 5]
Yehova wasankha mulimo wa kupharazga kuŵa wakuzirwa comene kuluska mulimo uliwose uwo tingacita.