Kasi Jiso Linu Likulata pa Cimoza?
1. Kasi kuŵa na ‘jiso lakulata pa cimoza’ kukung’anamuraci?
1 Tikucita vinthu mwakuyana na ivyo maso ghithu ghakuwona. Mazgu gha Yesu ngaunenesko, ghakuti: “Ipo usange jiso lako likulata pa cimoza, thupi lako lose liŵenge lakungweluka.” (Mat. 6:22) Para jiso lithu “likulata pa cimoza” nga umo Yesu wakayowoyera, likulaŵiska pa cinthu cimoza, ico nkhucita khumbo la Ciuta. Tikuŵika Ufumu pa malo ghakwamba kwambura kutimbanizgika na vinthu vyambura candulo panji vyakucitika ivyo vingananga uteŵeti withu.
2. Kasi ni vinthu wuli ivyo vingatitimbanizga kuti tileke kuwona vinthu mwakwenelera, kweni citovwirenge nchivici?
2 Tikwenera Kujisanda: Tingatondeka kuwona vinthu mwakwenelera cifukwa ca kudokera vinthu ivyo ŵanji ŵali navyo panji vinthu ivyo ŵakusaska malonda ŵangatiphalira kuti ni vyakukhumbikwa kwa ise. Pambere mundagure cinthu ciphya ico cingamutolerani nyengo yitali ndiposo ndalama zinandi kuti mucigure panji ico mungamalirapo nkhongono zinu, cingaŵa ciwemi kuti “mupendesere mtengo” wake mwa kujifumba kuti, ‘Kasi cinthu ici cinovwirenge kuti niteŵetere makora Yehova panji kunitondeska?’ (Luka 14:28; Fil. 1:9-11) Nchamahara kujisanda nyengo na nyengo umo tingacepeskera vinthu mu umoyo withu mwakuti ticite vinandi mu uteŵeti.—2 Kor. 13:5; Efe. 5:10.
3. Kasi tingasambiraci kwa mudumbu munyake uyo wakasintha vinthu vinyake mu umoyo wake?
3 Apo mudumbu munyake wakamba upayiniya wanyengozose, wakasankha kuti wagwirenge nchito yake yakulembeka nangauli pakaŵa nchito zinyake izo wangagwira kwa maora ghacoko na kusanga ndalama zakukwana zakuti zingamovwira kusanga ivyo wakusoŵerwa. Paumaliro wakayowoya mazgu agha: “Palije uyo wangateŵetera nga ni muzga wa ŵeneco ŵaŵiri. Nkhenera kuŵika mtima pa ivyo ni vyakukhumbikwa nadi pa umoyo na kuleka kukhumba vinandi. Nkhawona kuti vinthu vyakuthupi vikuchujuka na kumara ndipo para nilutilirenge kupenja vinthu ivyo nkhakhumbanga mbwenu nijivuskenge waka.” Mudumbu uyu wakafiska kusintha vinthu vinyake mu umoyo wake ndipo wakasintha nchito na kwamba yinyake iyo yikamupanga nyengo yakuti wacitire upayiniya.
4. Cifukwa wuli nchakuzirwa comene sono kuti tilutilire kuŵa na jiso lakulata pa cimoza?
4 Nchakuzirwa comene mu nyengo yithu yino kuti tilutilire kuŵa na jiso lakulata pa cimoza. Zuŵa lililose para lajumpha likutisendezgera ku umaliro wa mgonezi uno ndiposo kwamba kwa caru ciphya ca Ciuta. (1 Kor. 7:29, 31) Para tikuŵika mtima withu pa mulimo wa kupharazga, mbwenu tijiponoskenge ise tekha na awo ŵakutipulika.—1 Tim. 4:16.