Kasi Nkhucita Uteŵeti Mwakukwana?
1. Ni vinthu wuli ivyo vingatondeska Mkhristu wakugomezgeka kuti wacite makora uteŵeti?
1 Kasi muli kujifumbapo fumbo ili? Mutepanji mukutondeka kucita uteŵeti nga umo mukacitiranga kale cifukwa ca ucekuru, ulwari panji kusazgikira kwa milimo ya mu mbumba. Panji vinthu ivi ndivyo vikumupangiskani kuti mugongowenge. Mudumbu munyake wa ŵana ŵatatu wakalemba kuti nyengo zinyake wakajipanga mulandu cifukwa cakuti wakamaliranga nyengo na nkhongono zake pa kupenja vyakusoŵa vya mbumba yake m’malo mwa kucita uteŵeti. Kasi nchivici citovwirenge kuti tiwonenge vinthu mwakwenelera?
2. Kasi Yehova wakukhumbaci kwa ise?
2 Ivyo Yehova Wakukhumba kwa Ise: Mwambura kukayika, tose tikukhumba kuti ticitenge vinandi mu uteŵeti. Kweni pali mphambano yikuru comene pakati pa ivyo tikukhumba kucita na ivyo tingakwaniska kucita. Fundo yakuti tikukhumba kucita vinandi yikulongora kuti tili ŵakata yayi. Tikwenera kukumbukira kuti Yehova wakumanya ivyo tingatondeka kufiska ndipo wakukhumba kuti ticitenge vinthu ivyo tingafiska. (Sal. 103:13, 14) Kasi Yehova wakukhumbaci kwa ise? Wakukhumba kuti timuteŵetere na mtima wose na kucita ivyo tingafiska.—Kol. 3:23.
3. Kasi tingamanya wuli umo tikucitira mu uteŵeti?
3 Kasi nchivici cingatovwira kuti timanye ivyo tingakwaniska kucita? Tingalomba kwa Yehova kuti watovwire kuwona ivyo tingakwaniska. (Sal. 26:2) Tingaphalira mubwezi withu uyo ni Mkhristu wakukhwima ndiposo wakugomezgeka uyo wakutimanya makora ndipo wakopa yayi kutiphalira usange tikukhumbikwira kuti tisinthe pa cigaŵa cinyake. (Zinth. 27:9) Kumbukiraniso kuti, pakuti mikhaliro yikusintha, nchakovwira kuti nyengo na nyengo tisandenge umo vinthu viliri kwa ise.—Efe. 5:10.
4. Kasi tikwenera kuwona wuli fundo za mu Baibolo zakukhwaskana na uteŵeti?
4 Umo Tikwenera Kuwonera Fundo Izo Tikukumbuskika: Ŵanthu awo ŵakukhumba kukhozga awo ŵakucimbira pa ciphalizgano ŵakuŵacemelera. Cilato cawo cikuŵa ca kuŵagongoweska yayi kweni kuŵakhozga kuti ŵamalizge ciphalizgano. Mwakuyana waka, fundo zakukhozga za mu Baibolo izo tikusambira pa maungano na izo zikuŵa mu mabuku ghithu zakuti ‘tipharazge mwaluŵiro,’ cilato cake nchakuti tisange nazo candulo. Zikung’anamura kuti tikutondeka kucita uteŵeti mwakukwana yayi. (2 Tim. 4:2) Tingaŵa na cigomezgo kuti para tikuyezgayezga kucita ivyo tingakwaniska, Yehova wazamukumbukira ‘mulimo withu na citemwa’ ico tikamulongora.—Heb. 6:10.