“Vinjeru Vikurunjiskika na Milimo Yake”
1. Kasi ŵanthu ŵanyake ŵakuwuwona wuli mulimo withu?
1 Nyengo zinyake awo tikuŵapharazgira ŵangatizgora uheni cifukwa ca kuleka kutipulikiska panji cifukwa cakuti ŵakuphalirika mautesi ghakukhwaskana na Ŵakaboni ŵa Yehova. Mutepanji ŵakucita nthena cifukwa ca kupulika nkhani zautesi pa wayilesi panji mu nyuzipepara. Ku malo ghanyake ŵakutiwona kuti ndise kagulu kakugaluka. Kasi tikwenera kuzgora wuli para takumana na ŵanthu ŵanthena aŵa?
2. Kasi nchivici citovwirenge kuti tileke kukhuŵara para tikususkika mu uteŵeti?
2 Lekani Kukhuŵara: Mu nyengo iyo Cikhristu cikambiranga waka, ŵanthu ŵakasuskanga ivyo Yesu na ŵateŵeti ŵanyake ŵa Yehova ŵakayowoyanga ndipo ŵakaŵapulikiskanga yayi. (Mil. 28:22) Kweni, ŵakacita soni yayi na uteŵeti wawo nangauli ŵakanenekanga. Yesu wakati: “Vinjeru vikurunjiskika na milimo yake.” (Mat. 11:18, 19) Yesu wakalutilira kucita khumbo la Ŵawiske na mwamphu cifukwa wakaŵa na cigomezgo kuti awo ŵakukhumba kumanya unenesko ŵawonenge kuti makani ghawemi ngakuzirwa. Tingakhuŵara yayi para tingakumbukira kuti Mwana wa Ciuta nayo wakasuskikanga.
3. Cifukwa wuli tikwenera kuzizwa yayi para ŵakutiyowoyera mautesi ndiposo kutisuska?
3 Yesu wakayowoyerathu kuti ŵalondezgi ŵake ŵatinkhikenge na caru nga umo cikatinkhira iyo. (Yoh. 15:18-20) Ntheura, tingazizwanga yayi para mazuŵa ghano ŵakutiyowoyera mautesi ndiposo kutisuska. Nakuti, tikwenera kulindizga kuti vinthu ivi vizarenge comene peneapo tili mu mazuŵa ghaumaliro ndipo Satana ni mukali comene. (Uvu. 12:12) Tingaŵa ŵakukondwa cifukwa vinthu ivi mbukaboni wakuti sonosono apa caru ca Satana ciparanyikenge.
4. Kasi tikwenera kucita wuli para ŵanthu ŵatizgora uheni pakupharazga makani ghawemi?
4 Zgorani Mwakuzika: Para tikususkika, nyengo zose tikwenera kuzgora mwakwenelera ndiposo mwakuzika. (Zinth. 15:1; Kol. 4:5, 6) Para mphakwenelera, tingamulongosolera munthu uyo tikumupharazgira kuti pali nkhani zinandi zautesi zakukhwaskana na Ŵakaboni ŵa Yehova panji tingamufumba cifukwa ico wakugomezgera kuti nkhani izi ni zaunenesko. Kuzgora mwakuzika kungapangiska kuti wajifumbe usange nkhani izo ni zaunenesko nadi ndipo ulendo unyake wangazakategherezga uthenga withu. Ndipouli, para munthu wakwiya comene, cingaŵa ciwemi kuwukapo makora pa nyumba yake. Tingaŵa na cigomezgo kuti mwambura kupwelerako umo ŵanthu ŵakutiwonera, Yehova wakuzirwiska uteŵeti withu.—Yes. 52:7.