Minda Yaca Kale Mwakuti Yivunike
1. Ni mulimo wuli wakuzirwa uwo ukucitika sono?
1 Wakati wapharazgira mwanakazi Musamariya, Yesu wakaphalira ŵasambiri ŵake kuti: “Inuskani maso ghinu na kuwona minda, kuti yaca kale mwakuti yivunike.” (Yoh. 4:35, 36) Mulimo wa kuvuna ukaŵa mukati, ndipo Yesu wakawonerathu kuti uzamucitika pa caru cose. Kucanya uko wali, Yesu wakulutilira kucitako mulimo uwu. (Mat. 28:19, 20) Kasi nchivici cikulongora kuti mulimo uwu ukulutilira kusazgikira apo ukufika kuumaliro?
2. Ni vinthu wuli vikulongora kuti mulimo wa kuvuna uwo ukucitika pa caru cose ukukulirakulira?
2 Mulimo wa Kuvuna pa Caru Cose: Mu cilimika ca uteŵeti ca 2009, pa caru cose capasi pakasazgikira ŵapharazgi ŵakujumpha ŵatatu pa ŵapharazgi 100 ŵaliwose. Mu vyaru ivyo mulimo uwu ukukanizgika, pa ŵapharazgi 100 ŵaliwose pakasazgikira ŵapharazgi 14. Masambiro gha Baibolo ghakujumpha 7,619,000 ghakacitiskikanga mwezi uliwose. Unandi wa masambiro gha Baibolo agha ukajumpha wa ŵapharazgi ndiposo ukajumpha na hafu miliyoni pakuyaniska na unandi wa masambiro gha Baibolo agho ghakacitiskika mu 2008. Apo mulimo ukukulirakulira mu vigaŵa vinandi, vyaru vinandi vikupempha kuti ŵavitumizgire ŵamishonale. Mu vyaru vinandi, mipingo panji magulu agho ghakuyowoya ciyowoyero cinyake ghakovwira ŵanthu ŵanandi. Nchakuwonekerathu kuti Yehova wakupangiska kuti mulimo wende luŵiro apo vuna yili pafupi kumara. (Yes. 60:22) Kasi cigaŵa cinu mukuciwona mwakwenelera?
3. Kasi ŵanji ŵangaghanaghana vici za mulimo wa kuvuna mu cigaŵa cawo?
3 Mulimo wa Kuvuna mu Cigaŵa Cinu: Ŵanji ŵangayowoya kuti, “Mu cigaŵa cane ŵanthu ŵakupulika yayi.” Mbunenesko kuti mu vigaŵa vinyake ŵanthu ŵakupulika yayi panji ŵakupulika nga umo ŵakapulikiranga kale yayi. Ŵakaboni ŵanji mu vigaŵa ivi ŵangaghanaghana kuti mulimo wa kuvuna wamara ndipo mulimo uwo wakhala ngwakuvulura ŵacoko waka awo ŵakhalako. Kasi ndimo viliri nadi?
4. Kasi tikwenera kuwuwona wuli mulimo wa kuvuna, ndipo cifukwa wuli?
4 Kwamba pakwamba mpaka paumaliro, mulimo wa kuvuna ukuŵa wamaseŵera yayi. Wonani umo Yesu wakayowoyera, kulongora kuti mulimo uwu ukwenera kucitika mwaluŵiro. Wakati: “Vuna njinandi, kweni ŵanchito mbacoko. Ntheura lombani Mweneco wa vuna kuti watume ŵanchito ku vuna yake.” (Mat. 9:37, 38) Yehova, uyo ni Mweneco wa vuna, ndiyo wali na mazaza gha kuwona nyengo iyo vuna yikwenera kucitika na uko yingacitikira. (Yoh. 6:44; 1 Kor. 3:6-8) Kasi mulimo withu ngwakuti wuli? Baibolo likuzgora kuti: “Seŵa mbuto yako namacerocero ndipo namise ungapumuzganga woko lako.” (Muph. 11:4-6) Enya, apo mulimo wa kuvuna ukuluta kuumaliro ni nyengo yakupumuzgira mawoko ghithu yayi.
5. Cifukwa wuli tikwenera kulutilira kupharazga mwamwamphu mu vigaŵa ivyo tingawona nga ŵanthu ŵakupulika yayi?
5 Lutilirani Kuvuna: Nanga ni para mu cigaŵa cithu tapharazgamo mwakuwerezgawerezga ndipo cikuwoneka kuti ŵanthu ŵakupulika yayi, pali cifukwa ciwemi cakupharazgira mwamwamphu ndiposo mwaluŵiro. (2 Tim. 4:2) Vinthu viheni ivyo vikucitika mu caru vikupangiska ŵanthu kuti ŵasinthe maghanoghano na kwamba kughanaghanira comene za umoyo wawo wa munthazi. Apo ŵawukirano ŵakukura, ŵangawona kuti ŵakukhumbikwira civikiliro ndiposo mtende wa mu mtima. Ŵanthu ŵangasinthaso cifukwa ca kuwona citatata cithu. Enya, awo pakwamba ŵakakananga uthenga withu ŵangazomera kuŵapharazgira. Nanga ni awo ŵakukanirathu uthenga withu ŵakukhumbikwira kuŵacenjezga.—Ezek. 2:4, 5; 3:19.
6. Para cigaŵa cithu nchakusuzga, kasi nchivici cingatovwira kuti tilutilire kuŵa ŵamwamphu?
6 Para cigaŵa cithu nchakusuzga, kasi nchivici cingatovwira kuti tilutilire kuŵa ŵamwamphu? Mutepanji tingacita maupharazgi ghanyake padera pa upharazgi wa kunyumba na nyumba nga nkhupharazga ku musika panji pa telefoni. Panji tingasintha upharazgi withu na kupharazga mu nthowa yiphya. Tingasintha ndondomeko yithu na kuluta mu uteŵeti nyengo ya kumise panji pa nyengo zinyake apo ŵanthu ŵakusangika pa nyumba. Mutepanji tingasambira ciyowoyero cinyake mwakuti tipharazge makani ghawemi ku ŵanthu ŵanandi. Tingasazgirako uteŵeti withu mwa kucita upayiniya wanyengozose. Panji tingasamira ku cigaŵa ico ŵapharazgi mbacoko. Para mulimo wa vuna tikuwuwona mwakwenelera, tiyezgeyezgenge kuwucita mwakukwana.
7. Kasi tikwenera kucita mulimo wa kuvuna mpaka pawuli?
7 Ŵalimi ŵakuŵa na nyengo yicoko comene yakuvunira mbuto zawo, ntheura ŵakucita mwaukata yayi mpaka ŵamalizge kuvuna. Vuna yauzimu nayo yikukhumbikwira kucitika mwaluŵiro. Kasi tikwenera kucita mulimo uwu mpaka pawuli? Mu nyengo yose ya “umaliro wa mgonezi” ndiposo mpaka “umaliro” wize. (Mat. 24:14; 28:20) Nga ni umo wakacitira Muteŵeti mulara wa Yehova, nase tikwenera kumalizga mulimo uwo tapika. (Yoh. 4:34; 17:14) Ntheura, tiyeni tilutilire kucita uteŵeti withu mwamwamphu, mwacimwemwe, ndiposo mwambura kunyunyuta mpaka kuumaliro. (Mat. 24:13) Mulimo wa kuvuna undamare.
[Mazgu Ghakukhozgera pa peji 2]
Kwamba pakwamba mpaka paumaliro, mulimo wa kuvuna ukuŵa wamaseŵera yayi.