Kasi Mungawovwira Mfumu Panji Muwoli wa Musopi Munyinu Kuti Wamanye Unenesko?
1 Kasi mu mpingo winu ŵalimo ŵapharazgi awo mfumu panji muwoli wawo ni Kaboni yayi? Para ni nthena, nchakuwonekerathu kuti ŵapharazgi aŵa ŵakukhumba kuti mfumu panji muwoli wawo wamanye unenesko. Kweni kuti ndiwo pera yayi ŵakukhumba. Mpingo wose ukukhumba kuti “ŵanthu ŵa mitundu yose ŵafike pa kumanya makora unenesko” nga umo Ciuta wakukhumbira. (1 Tim. 2:4) Kasi tingawovwira wuli ŵafumu panji ŵawoli ŵa ŵapharazgi aŵa?
2 Cakwamba, tikwenera kuyezgayezga kuwona vinthu nga umo mfumu panji muwoli uyo ni Kaboni yayi wakuviwonera. Ŵanandi awo Mbakaboni yayi ŵakutemwa mbumba zawo ndipo ŵakuyezgayezga kuŵa mfumu panji muwoli muwemi ndiposo mupapi muwemi. Kuti waka vigomezgo vyawo vyacisopa vikupambana na vithu. Nyengo zinyake ŵakumanya vicoko waka vyakukhwaskana na Ŵakaboni ŵa Yehova padera pa viheni ivyo ŵali kuphalirika na ŵabwezi ŵawo. Ŵanji mbakali cifukwa cakuti nyengo iyo kale munyawo wakacezgeranga nawo, lero wakucitira vinthu vyakukhwaskana na kusopa. Umanyi utovwirenge kuti ticitenge vinthu mwalusungu ndiposo mwanchindi na munthu uyo ni Kaboni yayi, ndiposo kufwatuka nayo.—Zinth. 16:20-23.
3 Tikwenera Kuŵatemwa: Nthowa yiwemi ndiposo yakwamba yakuwojera mfumu panji muwoli uyo ni Kaboni yayi kuti wamanye unenesko nkhwizira mu vyakucita vithu, kuti kudumbiskana nayo vya Baibolo yayi. (1 Pet. 3:1, 2) Cakuzirwa comene pa nkhani iyi nchakuti tilongorenge kuti tikuŵatemwa. Ŵadumbu mu mpingo ŵangalongora citemwa kwa muwoli uyo ni Kaboni yayi, ndipo ŵabali nawoso ŵangacita mwakuyana waka ku mfumu uyo ni Kaboni yayi. Mwawuli?
4 Para mundakumanepo na mfumu panji muwoli uyo ni Kaboni yayi, mutepanji mungakakumana nayo pamasinda pa kudumbiskana na mfumu panji muwoli uyo ni Kaboni. Mungakhuŵaranga yayi para munthu uyo ni Kaboni yayi wandamupokelerani panji kumuzgorani makora. Para tikufwatuka nayo na kulongora kuti tikumutemwa, mbwenu wawonenge kuti Ŵakaboni ŵa Yehova mbawemi comene. (Rom. 12:20) Ŵakhristu ŵanji ŵakukhwima ŵakucema mfumu panji muwoli uyo ni Kaboni yayi pamoza na mbumba yake kuti ŵalyere lumoza cakurya, mwakuti ŵamanyane nayo na kumazga thinkho lililose ilo wangaŵa nalo. Ŵakuyowoya nkhani izo zikumukondweska m’malo mwa kumucicizga kuti ŵadumbiskanenge nkhani zauzimu. Kunthazi, para munthu uyu wamba kufwatuka comene, cingaŵa camacitiko kudumbiskana nayo vya mu Malemba. Cifukwa cakuti wakumanyapo kale ŵanji mu mpingo, panji wangazomera para wangacemekera ku ghanyake mwa maungano ghithu kuti wakawone ivyo muwoli wake wakusambira. Nanga wangaŵa kuti wakukhumba yayi kumanya unenesko, mungamuwonga cifukwa ca wovwiri uwo wakupeleka ku munyake uyo ni Kaboni.
5 Ŵalara ŵakwenera kufwilirapo kovwira mfumu panji muwoli uyo ni Kaboni yayi, ndipo ŵakwenera kuŵa maso kusanga mipata yakuti ŵamupharazgire. Munthu uyo ni Kaboni yayi, uyo pakwamba wakakhumbanga yayi kudumbiskana nayo vya mu Baibolo wangategherezga para wakulwara. Para mu mbumba iyo mwacitika suzgo yinyake nga ni nyifwa, ŵalara ŵangapempha kuti mfumu panji muwoli uyo ni Kaboni yayi waŵepo apo ŵakupembuzga mbumba iyo.
6 Ghanaghanirani za cimwemwe ico Mkhristu wa mu mpingo withu wangaŵa naco para mfumu panji muwoli wake wangazomera kusambira na kumanya unenesko. Yehova, ŵangelo, ndiposo ŵanthu wose mu mpingo nawoso ŵangaŵa ŵakukondwa comene. (Luka 15:7, 10) Ndipouli, para mfumu panji muwoli wakukanirathu unenesko, tingaŵa ŵakukondwa nipera cifukwa kuyezgayezga uko tikucita kukukondweska Yehova, uyo “wakukhumba cara kuti munyake waparanyike, kweni wakukhumba kuti wose ŵafike pa kupera.”—2 Pet. 3:9
[Mafumbo]
1. Cifukwa wuli Ŵakhristu awo ŵafumu panji ŵawoli ŵawo Mbakaboni yayi ndiwo pera yayi ŵakukhumba kovwira ŵafumu panji ŵawoli ŵawo kumanya unenesko?
2. Kasi umanyi ungatovwira wuli kuti tovwire mfumu panji muwoli uyo ni Kaboni yayi?
3. Kasi nthowa yiwemi yakuwojera mfumu panji muwoli uyo ni Kaboni yayi njakuti wuli?
4. Kasi tingalongora wuli kuti tikuŵatemwa?
5. Kasi ŵalara ŵangawovwira wuli mfumu panji muwoli uyo ni Kaboni yayi?
6. Ni vinthu wuli ivyo vingatipangiska kuti tovwire mfumu panji muwoli uyo ni Kaboni yayi kuti wamanye unenesko?
[Mazgu Ghakukhozgera pa peji 6]
Nthowa yiwemi ndiposo yakwamba yakuwojera mfumu panji muwoli uyo ni Kaboni yayi kuti wamanye unenesko nkhwizira mu vyakucita vithu, kuti kudumbiskana nayo vya Baibolo yayi.