Ŵateŵeti Ŵamwamphu Ŵakwenera Kulomba na Kulanguruka
1. Nchivici cikawovwira Yesu kuti waleke kutimbanizgika kucita mulimo wake ukuru?
1 Yesu wakacizga ŵalwari na kufumiska viŵanda usiku wose. Ŵasambiri ŵake ŵakati ŵamusanga namacero ghake, ŵakamuciska kuti walutilire kulongora milimo yake yankhongono, ŵakati: “Wose ŵakumupenjani.” Ndipouli, Yesu wakakana kuti ŵamutimbanizge kucita mulimo wake ukuru wa kupharazga makani ghawemi. Iyo wakazgora kuti: “Tiyeni tilute kunyake, mu vikaya vya pafupi, kuti nkhapharazge na kura wuwo, cifukwa ndico nkhizira.” Kasi nchivici cikawovwira Yesu kuti waleke kutimbanizgika? Pa zuŵa ili, wakawuka mulenjilenji kukalomba na kulanguruka. (Mrk. 1:32-39) Kasi nase kulomba na kulanguruka vingatovwira wuli kuti tiŵe ŵateŵeti ŵamwamphu?
2. Kasi tikwenera kulanguruka pa vici kuti tilutilire kuŵa ŵamwamphu mu Uteŵeti?
2 Kulanguruka pa Vici? Yesu wakawona kuti ŵanthu ŵakaŵa “ŵakufyopoka na kujowoleka nga ni mberere zambura muliska.” (Mat. 9:36) Mwakuyana waka, nase tingalanguruka za umo ŵanthu ŵakukhumbikwira makani ghawemi. Tingalanguruka pa ufupi wa nyengo iyo yakhalako. (1 Kor. 7:29) Tingalanguruka pa milimo ya Yehova na mikhaliro yake, mwaŵi withu wa kuŵa Ŵakaboni ŵa Yehova, ndiposo usambazi wauzimu uwo tili kusambira mu Mazgu gha Ciuta, uwo ŵanthu ŵa mu cigaŵa cithu ŵakuwumanya yayi.—Sal. 77:11-13; Yes. 43:10-12; Mat. 13:52.
3. Kasi tikwenera kulanguruka pawuli?
3 Tingalanguruka Pawuli? Nga umo wakacitira Yesu, ŵanji ŵakuwuka namlenji para kulije viwawa. Ŵanji ŵasanga kuti nchiwemi kulanguruka nausiku pambere ŵandagone. (Gen. 24:63) Nanga tingaŵa ŵakutangwanika, tingasanga nyengo yakulangurukira. Ŵanyake ŵakulanguruka para ŵakwera basi. Ŵanyake ŵakulanguruka namuhanya para ŵakupumura. Ŵanandi ŵasanga kuti kulanguruka pambere ŵandalute mu uteŵeti, nanga yingaŵa nyengo yicoko waka, kukuŵawovwira kuti ŵapharazgenge mwamwamphu ndiposo mwacikanga.
4. Cifukwa wuli tikwenera kulanguruka?
4 Kulomba ndiposo kulanguruka kutovwirenge kuti tikhumbenge comene kuteŵetera Yehova, tiwonenge kuti kusopa kwithu nkhwakuzirwa comene mu umoyo withu, ndipo kutikhozgenge kuti tilutilire kupharazga. Yesu, uyo ni Muteŵeti Mulara wa Ciuta, wakasanga candulo cifukwa ca kulanguruka, ndipo nase tisangenge candulo.