“Kucitira Ukaboni Mwakukwana vya Ufumu wa Ciuta”

1. Kasi tizamusambira buku wuli pa Sambiro la Baibolo la Mpingo mu sabata yakwambira pa Janyuwale 23?

¹ Sabata yakwambira pa Janyuwale 23, 2012, pa Sambiro la Baibolo la Mpingo, tizamwamba kusambira buku la “Kucitira Ukaboni Mwakukwana vya Ufumu wa Ciuta.” Buku ili likulongosora ivyo vili kulembeka mu buku la Milimo munthowa yakuti uyo wakuŵazga wakukhwaskika mu mtima. M’malo mwa kulongosora vesi lililose palekha, buku la Kucitira Ukaboni likulongosora fundo zakuzirwa izo tikusambiramo mu buku la Milimo, na umo ise patekha tingacitira kuti zitovwire.—Rom. 15:4.

2. Kasi mu buku ili muli vici?

² Ivyo Vili mu Buku Ili: Pa peji laciŵiri pali malonje kufuma ku Wupu Wakulongozga. Ŵabali aŵa ŵakulongosora cilato cawo kuti tisange candulo na buku ili. Apo pakwambira cipaturo cilicose pali mazgu ghakulongosora ivyo vili mu cipaturo na lemba ilo pafuma nkhani. Vipaturo vinyake vili na mabokosi agho ghakulongosora za ŵanthu, malo na vyakucitika vinyake. Mumphepete muli malo ghasani agho mungalembamo fundo zinu. Muliso vithuzithuzi vinandi vyakovwira kuwona ivyo vikacitikanga mu nyengo ya ŵapositole, ndipo pa peji laumaliro pali cilongolero ca vithuzithuzi ivyo vili mukati na mazgu ghakulongosora ivyo vikucitika. Ku cikopi cakwamba na caumaliro kuli mapu agho ghakutovwira kuwona umo Ŵakhristu ŵakwambilira ŵakenderanga apo ŵakapharazganga makani ghawemi “ku vigaŵa vyakutali comene vya caru capasi.”—Mil. 1:8.

3. Ni mafumbo wuli agho ghakuzgoreka mu buku la Milimo?

³ Mafumbo Ghakuzirwa Agho Likuzgora: Buku la Milimo litovwirenge kumanya makora mazgoro gha mafumbo ghakuzirwa comene ghakukhwaskana na uteŵeti withu. Mwaciyelezgero, kasi ŵasambiri ŵaunenesko ŵa Khristu ŵakumanyikwa na mulimo wuli? Ndipo ŵakupharazga uthenga wuli? Ni njani wakulongozga mulimo wakupharazga pa caru cose, ndipo mwawuli? Kasi ni mwaŵi wuli uwo ukujulika para ŵapharazgi ŵakutambuzgika? Kasi mzimu utuŵa ukutovwira wuli pakupharazga?

4. Ni mwawuli umo tingasangira candulo na buku ili?

⁴ Kuti tisange candulo, tikwenera kulisambira buku ili na kunozgekera kukazgorapo ku maungano. Nyengo zose tiŵengepo pa sambiro na kutorapo fundo izo zingatovwira mu uteŵeti withu. Tili na cigomezgo cose kuti buku ili liticiskenge kucitira ukaboni mwakukwana vya ufumu wa Ciuta!—Mil. 28:23.