“Ungweru Winu Uŵale”
1. Kasi tili kupika mwaŵi kuti ticite vici?
1 Kufuma mulenji mpaka mise, tikuwona ungweru wakutowa uwo ukulumba Yehova Ciuta. Ndipouli, pali ungweru unyake uwo Yesu wakaphalira ŵasambiri ŵake kuti ŵakwenera kuŵa nawo. Uwu ni “ungweru wa umoyo.” (Yoh. 8:12) Kumanya ungweru wauzimu ni mwaŵi wapadera uwo tili kupika na Yehova ndipo tili na mulimo wakuzirwa wakuti ticite. Kuti ŵanji ŵasange candulo, Yesu wakati: “Ungweru winu uŵale panthazi pa ŵanthu.” (Mat. 5:16) Caru cili mu cisi cauzimu, ntheura ungweru uwu ukwenera kuŵala ku ŵanthu ndipo mbanandi awo ŵakukhumbikwira ungweru. Nga ni Khristu, kasi tingacita wuli kuti ungweru withu uŵale?
2. Kasi Yesu wakalongora wuli kuzirwa kwa kungweluska ŵanthu mwauzimu?
2 Tipharazgenge: Yesu wakagwiliskira nchito makora nyengo yake, nkhongono, kweniso cilicose ico wakaŵa naco kuti ŵanthu ŵamanye unenesko. Wakapharazganga kulikose uko ŵanthu ŵakasangikanga; mu nyumba zawo, mu maluŵaza gha misumba, ndiposo mu mapiri. Yesu wakamanya kuzirwa kwa kungweluska ŵanthu mwauzimu. (Yoh. 12:46) Kuti wafikire ŵanthu ŵanandi, Yesu wakaphalira ŵasambiri ŵake kuti ŵaŵe “ungweru wa caru.” (Mat. 5:14) Ŵakaŵaliska ungweru wawo apo ŵakacitanga vinthu viwemi ku ŵanyawo na kuŵaphalirako unenesko.
3. Kasi tingalongora wuli kuti ungweru wa unenesko ngwakuzirwa?
3 Ŵanthu ŵa Ciuta ŵakuwona kuti nchakuzirwa comene “kwenda nga mbana ŵa ungweru” nyengo zose na kupharazgira ŵanthu kulikose uko ŵangasangika. (Efe. 5:8) Para tili ku nchito panji ku sukulu, tingamba kudumbiskana na ŵanthu vya mu Malemba usange tikuŵazga Baibolo panji mabuku ghithu pa malo agho ŵanthu ŵangatiwona. Ivi vikawovwira mudumbu munyake muwukirano kusanga sambiro la Baibolo na kugaŵira mabuku ku ŵanyake 12 awo wakasambiranga nawo!
4. Cifukwa wuli tikwenera kuŵa na nkharo yiwemi apo ‘tikuŵaliska ungweru withu’?
4 Nkharo Yiwemi: Nthowa yinyake iyo tikuŵaliskira ungweru ni nkharo yithu yiwemi. (Efe. 5:9) Ku nchito, ku sukulu, na kulikose uko tikuŵa na ŵanthu, nkharo yithu yikuŵa yakupambanako na ya ŵanji, ntheura mwaŵi ukujulika kuti tiphalireko ŵanji unenesko. (1 Pet. 2:12) Cifukwa ca nkharo yiwemi ya msepuka wa vilimika 5, msambizgi wake wakacema ŵapapi ŵake. Wakati, “Nindawonepo mwana wankharo nga ni uyu!” Kupharazga ndiposo nkharo yiwemi vikuguzira ŵanthu ku “ungweru wa umoyo” ndipo Ciuta wakulumbika.