Tikwenera Kuzikira mu Uteŵeti
1. Kasi Yehova walongora wuli kuzika pakucita vinthu na ŵanthu?
1 Ciuta ngwakuzika comene pakucita vinthu na ŵanthu. (Ex. 34:6; Sal. 106:41-45; 2 Pet. 3:9) Mulimo wa kupharazga Ufumu ni nthowa yimoza iyo Ciuta wakulongolera kuti ngwakuzika. Yehova wacita vinthu na ŵanthu vilimika pafupifupi 2,000, kweni wacali kuguza ŵanthu awo ŵakukhumba kuŵa ŵabwezi ŵake. (Yoh. 6:44) Kasi tingalongora wuli kuti tili ŵakuzika nga ni Yehova mu uteŵeti?
2. Tingalongora wuli kuzika para tikupharazga mu cigaŵa cithu?
2 Ku Nyumba na Nyumba: Tingalongora kuzika nga ni Yehova para tikupharazga “kwambura kuleka” mu cigaŵa ico ŵanthu mbambura kunweka. (Mil. 5:42) Tikuzizipizga nipera nangauli ŵanthu ŵatikane, kutigoska, na kutisuska mu uteŵeti. (Mrk. 13:12, 13) Tikulongoraso kuti tili ŵakuzika para tikulutilira kuthilira mbuto za unenesko, nangauli cingaŵa cakusuzga kusanga ŵakunweka pa nyumba zawo.
3. Cifukwa wuli tikwenera kuzikira pakuwelerako ku ŵakunweka na pakusambizga ŵanthu Baibolo?
3 Masambiro gha Baibolo: Para tapanda khuni, tikuzikira. Tingalipwelelera nadi, kweni tingalicicizga yayi kuti likure. (Yak. 5:7) Vikuyana waka, kuti munthu wakure mwauzimu, vikucitika pacokopacoko. (Mrk. 4:28) Awo tikusambira nawo cingaŵaŵira cinonono kuti ŵaleke kugomezga visambizgo vya cisopa cautesi na nkharo zawo ziheni. Tikwenera kuŵacicizga yayi ŵasambiri kuti ŵasinthe. Msambiri wakukhumbikwira nyengo yakukwana kuti mzimu wa Ciuta ugwire nchito mu mtima wake.—1 Kor. 3:6, 7.
4. Usange tili ŵakuzika, kasi ticitenge wuli pakovwira ŵabali ŵithu ŵakuthupi?
4 Ŵabali Ŵithu Ŵakuthupi: Nangauli tikukhumbisiska kuti ŵabali ŵithu ŵasambire unenesko, tikuzikira na kulindilira nyengo yiwemi kuti tiŵaphalire vya cigomezgo cithu, kweni kwambura kuŵaphalira vinandi pa nyengo yimoza. (Muph. 3:1, 7) Apo tikulindilira nyengo iyo, nkharo yithu yikwenera kulongora kuti ivyo tikusambizga ni vyaunenesko. Kweniso tikwenera kuŵa ŵakunozgeka nyengo zose kuyowoya vya cigomezgo cithu mwakuzika na nchindi zikuru. (1 Pet. 3:1, 15) Para tikupharazgira ŵanthu mwakuzika, tikuŵawovwira ndipo Ŵadada ŵithu ŵakucanya ŵakukondwa.