Tiŵe na “Mtima wa Ciwuravi”
1. Kasi ŵanthu ŵakukhumbikwira vici mazuŵa ghano?
1 Mazuŵa ghano ŵanthu ŵakukhumbikwira kuŵawovwira mwaciwuravi kuluska kumanyuma kose uku. Cifukwa ca viheni ivyo vikucitika mu caru, ŵanthu ŵanandi mbakwenjerwa ndipo ŵalije cigomezgo cakuti vinthu viŵenge makora. Ŵanthu vikwi vinandi ŵakukhumbikwira wovwiri ndipo ise nga Mbakhristu tikwenera kuŵalongora lusungu ŵazengezgani. (Mat. 22:39; Gal. 6:10) Kasi tingaŵalongora wuli lusungu?
2. Kasi ni nthowa wuli yiwemi comene iyo tingalongolera ciwuravi?
2 Mulimo Wakulongolera Ciwuravi: Kulijeso kunyake uko tingasanga cisangulusko ceneko, kweni kwa Ciuta pera. (2 Kor. 1:3, 4) Cifukwa cakuti Yehova ngwalusungu, wakukhumba kuti nase tiŵe na “mtima wa ciwuravi” ndipo watituma kuti tilute na makani ghawemi gha Ufumu ku ŵazengezgani ŵithu. (1 Pet. 3:8) Kutokatoka pa mulimo uwu ni nthowa yiwemi comene yakusanguluskira “ŵakuphyoka mtima,” cifukwa ni Ufumu wa Ciuta pera uwo ungaŵapa cigomezgo canadi ŵanthu. (Yes. 61:1) Pakuti Yehova ngwaciwuravi, sonosono apa wawuskengepo uheni wose ndipo paŵenge caru ciphya caurunji.—2 Pet. 3:13.
3. Kasi tingamuyezga wuli Yesu pa nkhani ya kughanaghanira ŵanthu?
3 Ghanaghanirani Ŵanthu nga ni Yesu: Nangauli nyengo zinyake Yesu wakapharazgiranga ŵanthu ŵanandi, wakaŵawonanga nga ni mzinda waka yayi, kweni wakaghanaghaniranga waliyose payekha. Wakawonanga kuti waliyose wakukhumbikwira kovwirika mwauzimu. Kwa iyo, ŵakaŵa nga ni mberere zambura muliska. Yesu wakakhwaskika na ivyo wakawona, ndipo wakamba kuŵasambizga mwakuzika. (Mrk. 6:34) Para tikughanaghanira ŵanthu nga ni Yesu, tilongorenge ciwuravi kwa munthu waliyose. Mazgu ghithu na cisko cithu vilongorenge kuti tili na ciwuravi ku ŵanthu. Tiwonenge mulimo wa kupharazga kuŵa wakuzirwa kuluska vyose, ndipo tisorenge mazgu ghakwenelera pakuyowoya na munthu waliyose.—1 Kor. 9:19-23.
4. Cifukwa wuli tikwenera kuvwara mtima waciwuravi?
4 Mzinda ukuru wa ŵanthu kufuma mu mitundu yose ŵakuzomera uthenga wa Ufumu ndipo ŵakukondwa na citemwa ico tikuŵalongora. Peneapo tikulutilira kuvwara ciwuravi, tikondweskenge na kucindika Yehova, Dada withu waciwuravi.—Kol. 3:12.