Kugongowa Yayi
1. Cikanga cikukhumbikwa kuti ticite vici, ndipo cifukwa wuli?
1 Kasi muli kugongowapo kupharazga ku sukulu cifukwa ca kopa kuti ŵangamusekani? Pakukhumbikwa cikanga kuti mupharazge, comene para ndimwe ŵasoni. Kasi nchivici cingamovwirani?
2. Cifukwa wuli mahara ghakukhumbikwa kuti tipharazge para tili ku sukulu?
2 Citani Mwamahara: Sukulu mungayitora kuŵa cigaŵa cinu cakupharazgako, kweni nchakukhumbikwa viŵi yayi kupharazgira waliyose nga umo tikucitira para tikupharazga nyumba na nyumba. Mahara ghakukhumbikwa kuti muwone usange mungapharazga. (Muph. 3:1, 7) Nyengo zinyake ŵasambizgi ŵangamupani mutu wa nkhani kuti mudumbirane mu kilasi, ndipo uwu ungaŵa mwaŵi wakuti mupharazge. Panji munyinu wangamufumbani cifukwa ico mukulekera kucitako vinthu vinyake. Para sukulu zikujura, Ŵakhristu ŵanyake ŵakumanyiska ŵasambizgi ŵawo kuti Mbakaboni ŵa Yehova na kuŵapako mabuku ghithu agho ghakulongosora ivyo tikucita. Ŵanyake ŵakuŵika mabuku panji magazini pa desiki kuti panji ŵanyawo ŵanganweka kumanya vinandi.
3. Kasi munganozgekera wuli kukapharazga ku sukulu?
3 Nozgekerani: Para mwanozgekera makora, wofi ukucepa. (1 Pet. 3:15) Ghanaghanirani mafumbo agho ŵanji ŵangafumba na umo mungazgolera. (Zinth. 15:28) Para mungafiska, muŵenge na Baibolo na mabuku ghanyake nga ni buku la Kukambitsirana, Zimene Achinyamata Amafunsa, na ghanyake ghakulongosora vya cilengiwa kuti ghamovwiraninge pakuzgora mafumbo. Pemphani ŵapapi kuti pa Nyengo Yakusopera muyezgelerenge umo mungazgolera.
4. Cifukwa wuli mukwenera kulutilira kupharazga para muli ku sukulu?
4 Wofi Yayi: Nchiwemi yayi kughanaghana kuti ŵana ŵanyinu pa sukulu ŵamusekaninge para mukuyowoya unenesko. Cifukwa ca cikanga ico mukulongora, ŵanyake ŵangatemwa kutegherezga. Kweni mungagongowanga yayi para ŵakusulako ivyo mukuyowoya. Yehova wakukondwa na ivyo mukucita. (Heb. 13:15, 16) Nyengo zose lombani Yehova kuti ‘mulutilire kuyowoya na cikanga cose.’ (Mil. 4:29; 2 Tim. 1:7, 8) Ghanaghanirani cimwemwe ico mungaŵa naco para munthu uyo mwamupharazgira wangapulika unenesko. Mwamanya wuli! panji munthu uyo wangazgoka na kwamba kuteŵetera Yehova pamoza na imwe!