Kasi Mukuzomera Kusambizgika na Yehova?

1. Kasi khumbo la Yehova ndakuti wuli pa nkhani ya masambiro?

¹ Yehova, uyo ni “Musambizgi” withu, wakukhumba kuti tisambizgike. (Yes. 30:20) Wakamba kusambizga wakati walenga Mwana wake wakwamba. (Yoh. 8:28) Adamu wakati wagaluka, Yehova wakaleka yayi kusambizga, kweni mwacitemwa wakalutilira kusambizga ŵanthu kufikapo.—Yes. 48:17, 18; 2 Tim. 3:14, 15.

2. Kasi ni nchito wuli ya kusambizga iyo yikucitika mazuŵa ghano?

² Mazuŵa ghano, Yehova wakulongozga mulimo ukuru wa ‘kusambizga’ ŵanthu nthowa zake. (Yes. 2:3) Mu cilimika ca uteŵeti ca 2010, Ŵakaboni ŵa Yehova ŵakamalira maora 1.6 biliyoni mu nchito ya kupharazga na kusambizga ŵanthu unenesko. Kweniso, sabata yiliyose, masambiro ghauzimu ghakupelekeka mu mipingo yakujumpha 105,000 pa caru cose. Ndipo muzga wakugomezgeka na wakucenjera wakunozga mabuku ghakusambizgira mu viyowoyero vyakujumpha 500.

3. Kasi imwe mwasanga candulo wuli na ivyo Yehova wakusambizga?

³ Sangani Candulo Mwakukwana: Tikwandula comene na masambiro ghauzimu! Tamanya kuti Ciuta wali na zina kweniso wakutipwelelera. (Sal. 83:18; 1 Pet. 5:6, 7) Tamanya mazgoro gha mafumbo ghakuzirwa agha: Cifukwa wuli tikusuzgika na kufwa? Kasi ningaŵa wuli wakukondwa? Cifukwa wuli tili ŵamoyo? Kweniso Yehova wakutisambizga umo tingakhalira, mwakuti ‘nthowa yithu yiŵenge ya mwaŵi,’ panji kuti vinthu vyendenge makora.—Josh. 1:8.

4. Kasi ŵateŵeti ŵa Yehova ŵali na mwaŵi wakuti ŵasambire sukulu wuli, ndipo cifukwa wuli tikwenera kuzomera kusambizgika na Yehova?

⁴ Kusazga apa, Yehova wanozga masambiro ghapadera kuti wawovwire ŵanthu ŵake kucita mauteŵeti ghanyake. Masukulu agho ŵanji ŵangasambirako ghalembeka pa peji 4-6. Panji tingakwaniska yayi kusambirako masukulu agha, kweni kasi tikuŵikapo mtima kuti tisange candulo na masukulu agho tingakwaniska kusambirako? Kanandi ŵawukirano ŵakucicizgika na ŵasambizgi kweniso ŵanthu ŵanji kuti ŵasambire comene. Kasi ise tikuŵaciska kuti ŵajipeleke mwakuti Yehova waŵasambizge masambiro ghapacanya comene? Usange tikuzomera kusambizgika na Yehova, tiŵenge ŵakukondwa sono, kweniso tizamuŵa ŵamoyo kwamuyirayira swi!—Sal. 119:105; Yoh. 17:3.

Masukulu Ghanyake Agho Gulu la Yehova Likunozga

Sukulu Yakusambizga Kuŵazga na Kulemba

• Cilato: Kusambizga ŵanthu kuŵazga na kulemba mwakuti ŵajiŵazgirenge ŵekha Baibolo na kusambizgako ŵanyawo unenesko.

• Utali wa Nyengo: Mpaka ŵamanye.

• Malo: Nyumba ya Ufumu.

• Awo Ŵangasambirako: Ŵapharazgi wose na ŵakunweka.

• Kulembeska: Ŵalara ŵa mpingo ŵakujura sukulu iyi usange nchakukhumbikwa, ndipo ŵakuciska wose awo ŵangawovwirika nayo kuti ŵasambirengeko.

Sukulu ya Uteŵeti wa Ciuta

• Cilato: Kovwira ŵapharazgi kuti ŵaŵe ŵasambizgi ŵaluso ŵa makani ghawemi.

• Utali wa Nyengo: Yikulutilira waka.

• Malo: Nyumba ya Ufumu.

• Awo Ŵangasambirako: Ŵapharazgi wose. Ŵakunweka awo ŵakuwungana, ndipo ŵakugomezga ivyo Baibolo likusambizga na kuvilondezga mu umoyo wawo, nawo ŵangalembeska.

• Kulembeska: Phalirani Mulaŵiliri wa Sukulu ya Uteŵeti wa Ciuta.

Sukulu Yakusambizga Ciyowoyero Cinyake

• Cilato: Kovwira ŵapharazgi kuti ŵapharazgenge mu ciyowoyero cinyake.

• Utali wa Nyengo: Myezi yinayi panji yinkhondi. Kanandi yikucitika pa Cisulo mulenji, kwa ora limoza panji ghaŵiri.

• Malo: Kanandi yikucitikira pa Nyumba ya Ufumu yapafupi.

• Awo Ŵangasambirako: Ŵapharazgi awo ŵakucita makora mwauzimu ndipo ŵakukhumba kupharazga mu ciyowoyero cinyake.

• Kulembeska: Ofesi ya munthavi ndiyo yikunozga vyakuti sukulu iyi yiŵeko usange nchakwenelera.

Kuzenga Nyumba za Ufumu

• Cilato: Kuzenga na kunozga Nyumba za Ufumu. Iyi ni sukulu yayi, kweni awo ŵajipeleka kovwira pa mulimo uwu ŵakusambizgika maluso mwakuti ŵawovwire pa mulimo wa kuzenga.

• Utali wa Nyengo: Umo munthu wakhumbira.

• Malo: Kulikose uko Komiti ya Vyakuzenga yikugwira nchito. Nyengo zinyake, awo ŵajipeleka ŵakucemeka kukawovwira uko kwacitika masoka, nanga kuŵe kutali.

• Awo Ŵangacitako: Ŵabali na ŵadumbu ŵakubapatizika awo ŵazomerezgeka na wupu wa ŵalara. Ŵangaŵa ŵakumanya nchito panji yayi.

• Kulembeska: Lembani Fomu Yofunsirapo Ntchito Yodzipereka Yomanga Nyumba za Ufumu. (S-82) Fumbani ŵalara ŵa mpingo kuti ŵamupani fomu iyi.

Sukulu ya Uteŵeti wa Upayiniya

• Cilato: Kovwira ŵapayiniya kuti ‘ŵafiske uteŵeti wawo mwakukwana.’—2 Tim. 4:5.

• Utali wa Nyengo: Masabata ghaŵiri.

• Malo: Ofesi ya munthavi ndiyo yikunozga sukulu iyi ndipo kanandi yikucitikira pa Nyumba ya Ufumu yapafupi.

• Awo Ŵangasambirako: Ŵapayiniya ŵanyengozose awo ŵamara cilimika cimoza panji kujumpha apa.

• Kulembeska: Ŵapayiniya ŵanyengozose awo mbakwenelera kusambirako sukulu iyi ŵazamuphalirika na mulembi wa mpingo wawo.

Sukulu ya Awo Ŵiza Sono pa Beteli

• Cilato: Sukulu iyi cilato cake nkhusambizga awo ŵiza sono pa Beteli kuti ŵateŵetere makora.

• Utali wa Nyengo: Ora limoza sabata yiliyose kwa masabata 16.

• Malo: Ku Beteli.

• Awo Ŵangasambirako: Munthu wakwenera kuŵa wa pa Beteli panji muteŵeti wakujipeleka uyo waŵenge pa Beteli cilimika cimoza panji kujumpha.

• Kulembeska: Muteŵeti wa pa Beteli waliyose uyo ngwakwenelera sukulu iyi wakusambirako.

Sukulu ya Uteŵeti wa Ufumu

• Cilato: Kusambizga ŵalara na ŵateŵeti ŵakovwira kuti ŵacitenge makora milimo yawo ya kulaŵilira na kwendeska vinthu mu mpingo. (Mil. 20:28) Wupu Wakulongozga ukunozga sukulu iyi para pajumpha vilimika vicoko waka.

• Utali wa Nyengo: Mazuŵa ghano, sukulu ya ŵalara yikutora zuŵa limoza na hafu, ndipo ya ŵateŵeti ŵakovwira yikutora zuŵa limoza.

• Malo: Kanandi yikucitikira pa Nyumba ya Ufumu yapafupi, panji pa Malo gha Ungano gha Ŵakaboni ŵa Yehova.

• Awo Ŵangasambirako: Ŵalara na ŵateŵeti ŵakovwira.

• Kulembeska: Ŵalara na ŵateŵeti ŵakovwira awo mbakwenelera kusambirako sukulu iyi ŵakucemeka na mulaŵiliri wa dera.

Sukulu ya Ŵalara ŵa Mpingoa

• Cilato: Kovwira ŵalara kuti ŵacitenge makora milimo yawo mu mpingo.

• Utali wa Nyengo: Mazuŵa ghankhondi.

• Malo: Ofesi ya munthavi ndiyo yikusankha malo, ndipo kanandi yikucitikira pa Nyumba ya Ufumu yapafupi panji pa Malo gha Ungano gha Ŵakaboni ŵa Yehova.

• Awo Ŵangasambirako: Ŵalara.

• Kulembeska: Ŵalara awo mbakwenelera kusambirako sukulu iyi ŵakucemeka na ofesi ya munthavi.

Sukulu ya Ŵalaŵiliri Ŵakwendakwenda na Ŵawoli Ŵawob

• Cilato: Kovwira ŵalaŵiliri ŵa vigaŵa na madera kuti ŵacitenge makora comene para ŵakwendera mipingo na para “ŵakufukafuka mu kuyowoya na kusambizga” kweniso kuliska awo ŵakulaŵilirika na iwo.—1 Tim. 5:17; 1 Pet. 5:2, 3.

• Utali wa Nyengo: Myezi yiŵiri.

• Malo: Ofesi ya munthavi ndiyo yikusankha.

• Awo Ŵangasambirako: Ŵalaŵiliri ŵa dera na ŵa cigaŵa.

• Kulembeska: Ŵalaŵiliri ŵakwendakwenda na ŵawoli ŵawo awo mbakwenelera kusambirako sukulu iyi ŵakucemeka na ofesi ya munthavi.

Sukulu Yakusambizga Baibolo ya Ŵabali Ŵambura Kutorac

• Cilato: Kovwira ŵalara na ŵateŵeti ŵakovwira ŵambura kutora kuti ŵacitenge milimo yapadera. Ŵanandi awo ŵasambira sukulu iyi ŵakutumika uko ŵangakhumbikwa mu caru cawo. Ŵacoko waka ŵakutumika ku vyaru vinyake usange ŵayowoya kuti ŵangakwaniska.

• Utali wa Nyengo: Myezi yiŵiri.

• Malo: Ofesi ya munthavi ndiyo yikusankha; kanandi yikucitikira pa Malo gha Ungano gha Ŵakaboni ŵa Yehova panji pa Nyumba ya Ufumu.

• Awo Ŵangasambirako: Ŵabali ŵambura kutora ŵa vilimika vya pakati pa 23 na 62 awo mbankhongono, ndipo ŵakunweka kuteŵetera ŵabali na kucita milimo ya Ufumu kulikose uko ŵangakhumbikwa. (Mrk. 10:29, 30) Ŵaŵe ŵalara panji ŵateŵeti ŵakovwira awo ŵateŵetera vilimika viŵiri panji kujumpha apa, kwambura kulekapo.

• Kulembeska: Usange sukulu iyi yikucitika mu caru cinu, pa ungano wa dera pakuŵa ungano wa awo ŵakukhumba kukasambira. Vinandi vikulongosoreka pa ungano uwu.

Sukulu Yakusambizga Baibolo ya Ŵakhristu Ŵakutoranad

• Cilato: Kusambizga ŵakutorana mwakuti ŵaŵe ŵakovwira comene mu gulu la Yehova. Ŵanandi awo ŵasambira sukulu iyi ŵakutumika uko wovwiri ukukhumbikwa mu caru cawo. Ŵacoko waka ŵangatumika ku caru cinyake usange ŵayowoya kuti ŵangakwaniska.

• Utali wa Nyengo: Myezi yiŵiri.

• Malo: Makilasi ghakwamba ghakucitikira ku Watchtower Educational Center ku Patterson, New York, U.S.A. Kufuma apo, sukulu iyi yizamucitikanga mu malo agho ofesi ya munthavi yisankhenge; kanandi yizamucitikiranga pa Malo gha Ungano gha Ŵakaboni ŵa Yehova panji pa Nyumba ya Ufumu.

• Awo Ŵangasambirako: Ŵakutorana ŵa vilimika vya pakati pa 25 na 50, ŵankhongono, ndipo ŵangateŵetera kulikose uko wovwiri ukukhumbikwa. Kweniso waŵe na mzimu wakujipeleka wa “Ndine pano; nditumani!” (Yes. 6:8) Ŵaŵe ŵakutorana kwa vilimika viŵiri panji kujumpha apa, ndipo ŵacitapo uteŵeti wanyengozose vilimika viŵiri panji kujumpha, kwambura kulekapo.

• Kulembeska: Usange sukulu iyi yikucitika mu caru cinu, pa ungano wapadera pakuŵa ungano wa awo ŵakukhumba kukasambira. Vinandi vikulongosoreka pa ungano uwu.

Sukulu Yakusambizga Baibolo ya Giliyadi

• Cilato: Kusambizga ŵapayiniya na ŵateŵeti ŵanyengozose mulimo wa umishonale.

• Utali wa Nyengo: Myezi yinkhondi.

• Malo: Watchtower Educational Center, Patterson, New York, U.S.A.

• Awo Ŵangasambirako: Ŵakutorana ŵakwenera kuŵa na vilimika vya pakati pa 21 na 38 pa nyengo iyo ŵakupempha kakwamba kuti ŵakasambireko sukulu iyi. Ŵaŵe kuti ŵatorana kwa vilimika viŵiri, ŵacita uteŵeti wanyengozose vilimika viŵiri panji kujumpha, kwambura kulekapo ndipo ŵakuyowoya Cingelezi. Ŵakwenera kuŵa ŵankhongono. Ŵapayiniya awo ŵakuteŵetera ku caru cinyake, nanga ni awo gulu likuŵatora kuti mbamishonale; ŵalaŵiliri ŵakwendakwenda, ŵateŵeti ŵa pa Beteli; na awo ŵakasambirapo Sukulu Yakusambizga Baibolo ya Ŵabali Ŵambura Kutora, na Sukulu Yakusambizga Baibolo ya Ŵakhristu Ŵakutorana, nawo ŵangapempha kuti ŵakasambire sukulu iyi usange ŵakufiska ivyo vikukhumbikwa.

• Kulembeska: Mu vyaru vinyake, pa ungano wa cigaŵa pakuŵa ungano wa awo ŵakukhumba kukasambira sukulu iyi. Vinandi vikulongosoreka pa ungano uwu. Usange mu caru cinu ungano uwu ukuŵako yayi, mungalembera ofesi ya munthavi kuti yimuphalirani vinandi.

Sukulu ya Awo Ŵali mu Komiti ya Munthavi na Ŵawoli Ŵawo

• Cilato: Kovwira awo ŵakuteŵetera mu Komiti ya Munthavi kuti ŵacitenge makora mulimo wawo wa kulaŵilira nyumba za Beteli, milimo yakukhwaskana na uteŵeti mu mipingo, kulaŵilira madera na vigaŵa, mulimo wa kung’anamura, kusindikizga, na kutumizga mabuku kweniso madipatimenti ghakupambanapambana.—Luka 12:48b.

• Utali wa Nyengo: Myezi yiŵiri.

• Malo: Watchtower Educational Center, Patterson, New York, U.S.A.

• Awo Ŵangasambirako: Awo ŵali mu Komiti ya Munthavi panji mu Komiti ya Caru panyake awo ŵimikika kuteŵetera pa mulimo uwu.

• Kulembeska: Ŵabali awo mbakwenelera sukulu iyi pamoza na ŵawoli ŵawo ŵakucemeka na Wupu Wakulongozga.

[Mazgu ghamusi]