Vikilira Njuŵi Yako
1. Kasi mutu wa ungano wapadera wa cilimika ca uteŵeti ca 2013, ngwakuti wuli, ndipo cilato cake nchivici?
1 Dazi lililose tikukumana na vinthu ivyo vingananga njuŵi yithu. Pa cifukwa ici, ungano wapadera wa cilimika ca uteŵeti ca 2013, ico cambenge pa Seputembala 1, 2012, ngwa mutu wakuti “Vikilira Njuŵi Yako.” (1 Tim. 1:19) Cilato ca ungano uwu nchakuti utovwire kuwona umo tikucitira na njuŵi yithu, cawanangwa ciwemi ico Ciuta wali kutipa.
2. Kasi ni mafumbo wuli agho ghamuzgoreka pa ungano uwu?
2 Muzakakhazge fundo izi: Ungano uwu, uzamuzgora mafumbo ghankhondi na ghaŵiri ghakukhwaskana na njuŵi:
• Ni vinthu wuli vingananga njuŵi yithu?
• Kasi tingayisambizga wuli njuŵi?
• Kasi vingacitika wuli kuti tileke kuŵa na mulandu wa ndopa za ŵanthu wose?
• Usange tikughanaghanirapo na kucita ivyo tikusambira mu Baibolo, tikulongora kuti tili ŵanthu mbu?
• Pa nkhani izo munthu wakwenera kwendera njuŵi yake, tingacita wuli kuti tileke kupweteka ŵanyithu?
• Imwe ŵawukirano, kasi mungacita wuli para ŵanyinu ŵakukhumba kumupuluskani?
• Kasi pakuŵa uwemi wuli usange tikulondezga ivyo njuŵi yithu yituŵa yikutiphalira?
3. Kasi tingacita wuli kuti tizakasange candulo na ungano wapadera?
3 Satana wakuyezgayezga kuti wanange njuŵi yithu, kweni na wovwiri wa Yehova tingatonda. Kwizira mu Mazgu gha Ciuta na gulu lake, Dada withu wakucanya wakutiphalira kuti: “Iyi ndiyo nthowa, endaninge mwa iyi.” (Yes. 30:21) Ungano uwu ni nthowa yimoza iyo Yehova wakutilongozgera. Mwantheura, nozgekerani kuti mukaŵepo zuŵa lose. Mukategherezge comene na kuwona umo imwe pamwekha mungalondezgera fundo izo mwamusambira. Mukadumbiskane fundo izi na mbumba yinu. Para tikucita ivyo tikusambira, tikuŵa na “njuŵi yiwemi,” ndipo tikukhalilira pa nthowa iyo Ciuta wakuti tendengemo. Kweniso, tikupuluskika yayi na vyakusanguluska vya caru ca Satana.—1 Pet. 3:16.