Yezgani Zinchimi—Yona
1. Kasi Yona wakaŵa na mikhaliro wuli yiwemi?
1 Kasi mu maghanoghano ghinu mukwiza vici para mwapulika vya Yona? Ŵanji ŵakughanaghana kuti wakaŵa wawofi panji munonono mtima. Kweni Baibolo likulongora kuti wakaŵa wakujiyuyura, wacikanga, kweniso wakujipeleka. Kasi tingamuyezga wuli Yona?—Yak. 5:10.
2. Kasi tingamuyezga wuli Yona pa nkhani ya kujiyuyura?
2 Kujiyuyura: Pakwamba Yona wakagwentha mulimo wake. Tikuzizwa yayi cifukwa Ŵaasiriya ŵakaŵa ŵanthu ŵankhaza, ndipo msumba wa Nineve ukacemekanga “muzi wa ndopa.” (Nah. 3:1-3) Kweni Yehova wakamucenya Yona, ndipo wakajiyuyura na kuzomera wati waphalirika kaciŵiri kuti walute uko wakatumika pakwamba. (Zinth. 24:32; Yona 3:1-3) Nangauli Yona wakagwentha, kweni wakacita khumbo la Ciuta. (Mat. 21:28-31) Kasi nase tikuŵikapo mtima kupharazga makani ghawemi para tacenyeka panji para cigaŵa cithu nchakusuzga?
3. Kasi mphawuli apo tingakhumbikwira kulongora cikanga na kujipeleka?
3 Cikanga na Kujipeleka: Yona wati wawona kuti ŵanthu awo ŵakaŵa mu ngalaŵa ŵafwenge cifukwa ca ivyo wakacita, wakajipeleka kuti wafwe. (Yona 1:3, 4, 12) Kweniso, wati wafika ku Nineve, wakanjira mpaka mukati mu msumba, panyake kuti wasange malo ghawemi ghakuti wakhalepo pakupharazga ceruzgo ca Yehova. Ivyo wakacita vikulongora kuti wakaŵa wawofi yayi, kweni wacikanga. (Yona 3:3, 4) Ise ke? Cikanga nchakukhumbikwa kuti tipharazge makani ghawemi kwambura wofi para ŵanthu ŵakutisuska. (Mil. 4:29, 31) Kweniso kujipeleka nkhwakukhumbikwa kuti timalire nyengo na cuma cithu kukhozgera uteŵeti.—Mil. 20:24.
4. Cifukwa wuli tikwenera kughanaghanirapo ivyo nchimi za Yehova zikacita?
4 Para mukuŵazga ivyo zinchimi za Yehova zikacita, musangenge candulo para mukughanaghanirapo. Jifumbani kuti: ‘Kasi niŵenge ine mphanyi nkhacita wuli? Kasi ningalondezga wuli mikhaliro yake yiwemi mu umoyo wane?’ (Heb. 6:11, 12) Mu nkhani za kunthazi mu Uteŵeti Withu Waufumu, tizamudumbiskana vinthu vinyake ivyo tikusambirako ku zinchimi zakugomezgeka za Yehova.