Kasi Mukusintha?
1. Pakuti vinthu vikusintha mu caru, kasi tikwenera kucita vici?
1 Pa 1 Ŵakorinte 7:31, Baibolo likuyaniska caru na pa luŵaza la seŵero apo pakuseŵera ŵanthu ŵakupambanapambana. Vyakucitika vya caru vikusintha. Ntheura, nase tikwenera kusintha nthowa zakupharazgira, ndondomeko yithu, na umo tingayowoyera na munthu. Kasi mukusintha?
2. Cifukwa wuli tikwenera kusintha kuti tenderenge lumoza na gulu?
2 Nthowa Zakupharazgira: Kwambira kale, vinthu vikusintha mu mpingo Wacikhristu. Pakwamba, Yesu wakaphalira ŵasambiri ŵake kuti ŵaleke kuyegha cakurya panji ndalama mu tuvikwama twawo. (Mat. 10:9, 10) Kweni mukuluta kwa nyengo wakasintha na kuŵapa ulongozgi unyake. Wakacita nthena cifukwa cakuti wakamanya kuti ŵasambiri ŵake ŵazamutinkhika, kweniso kuti mulimo wakupharazga wamufika ku vigaŵa vinyake. (Luka 22:36) Kwa vyaka vyakujumpha 100, gulu la Yehova layezga nthowa zakupambanapambana zakupharazgira. Layezga kupharazgira makadi, wayilesi, na galimoto zakuŵa na vyakukuzgira mazgu. Pakuti mazuŵa ghano ŵanthu ŵakusangika viŵi yayi pa nyumba, tikupharazga palipose apo mwaŵi wasangika, m’malo mwa kupharazga kunyumba na nyumba pera. Kweniso tikuciskika kupharazga kunyumba na nyumba ca kumise para ŵanthu mbanchito. Apo galeta la Yehova likusintha, kasi namwe mukwenda nalo lumoza?—Ezek. 1:20, 21.
3. Kasi kusintha kungatovwira wuli kuti tipharazgenge mwakucontha mtima mu cigaŵa cithu?
3 Ivyo Mungayowoya: Kasi ŵanthu mu cigaŵa cinu ŵakwenjerwa na vici? Ndalama? Mbumba? Cakurya? Nchakuzirwa kumanya ivyo ŵanthu ŵakwenjerwa navyo mu cigaŵa cithu kuti tinozgekere ivyo tamuyowoya. (1 Kor. 9:20-23) Usange munthu wayowoya maghanoghano ghake, m’malo mwakudumbiskana nayo ivyo tanozgekera, vingaŵa makora kusintha nkhani na kudumbiskana ivyo wakwenjerwa.
4. Cifukwa wuli tikwenera kusintha mwaluŵiro?
4 Sonosono apa “vyakucitika vya caru” ici vimalenge, ndipo suzgo yikuru yambenge. “Nyengo yakukhalako yafupiskika.” (1 Kor. 7:29) Ipo nchakuzirwa comene kusintha mwaluŵiro kuti tifiske vinandi pa nyengo yicoko iyo yakhalako!