Ŵabali Ŵaciwukirano, Kasi Mukunwekera?
1. Kasi mubali uyo ni muwukirano wangamba pawuli kucita ivyo vili pa 1 Timote 3:1?
1 “Usange munthu wakunwekera . . . , wakukhumba mulimo uwemi.” (1 Tim. 3:1) Mazgu agha ghakuciska ŵabali kuti ŵanwekerenge kupika milimo pa mpingo. Kasi mukwenera kukura dankha kuti mwambe kunwekera? Unenesko ngwakuti mukwenera kwamba mucali ŵacoko. Ici ciwovwirenge kuti ŵalara ŵamusambizgani milimo kuti muzakaŵe ŵakwenelera kuŵa muteŵeti wakovwira para mwakura. (1 Tim. 3:10) Usange ndimwe mubali muwukirano wakubapatizika, kasi mungacita vici kulongora kuti mukunwekera?
2. Kasi mungacita wuli kuti muŵe na mtima wakujipeleka, ndipo mungalongora wuli kuti muli na mtima uwu?
2 Kujipeleka: Mukwenera kumanya kuti mukunwekera udindo yayi, kweni mulimo uwemi. Ipo mukwenera kuŵa wakukhumbisiska kovwira ŵabali na ŵadumbu. Ico cingamovwirani kuti mucite nthena nkhuyezga Yesu. (Mat. 20:28; Yoh. 4:6, 7; 13:4, 5) Lombani kuti Yehova wamovwirani kufipira mtima ŵanyinu. (1 Kor. 10:24) Kasi mungawovwira ŵacekuru na ŵalwari mu mpingo winu? Kasi mukovwira kupupa panji kucita milimo yinyake pa Nyumba ya Ufumu? Kasi mungajipeleka kuyowoya nkhani mu Sukulu ya Uteŵeti wa Ciuta mwamabuci? Muŵenge wakukondwa comene para mujipelekenge kuti muteŵetere ŵanyinu.—Mil. 20:35.
3. Kasi kuŵa munthu ŵauzimu kuli na vyandulo wuli, ndipo mungacita wuli kuti muŵe ŵauzimu?
3 Munthu Wauzimu: Nchakuzirwa comene kuti munthu waŵe wauzimu kuluska kuti waŵe na maluso ghakuthupi. Munthu wauzimu wakuwona vinthu umo Yehova na Yesu ŵakuviwonera. (1 Kor. 2:15, 16) Wakuŵa na “vipambi vya mzimu.” (Gal. 5:22, 23) Wakulimbikira kupharazga ndipo wakuŵika vinthu vya Ufumu pakwamba. (Mat. 6:33) Namwe mungaŵa munthu wauzimu para nyengo zose mupaturenge nyengo kuti musambirenge pamwekha. Muŵazgenge Baibolo zuŵa lililose na magazini gha Gongwe la Mulinda na Galamukani! Kweniso, munozgekerenge na kwiza ku maungano. (Sal. 1:1, 2; Heb. 10:24, 25) Apo wakaciskanga Timote kuti wakure mwauzimu, Paulosi wakalemba kuti: “Uŵenge maso . . . pa cisambizgo cako.” (1 Tim. 4:15, 16) Mwantheura, mufwilirengepo comene para mwapika nkhani mu Sukulu ya Uteŵeti wa Ciuta. Munozgekerenge para munjirenge mu uteŵeti, ndipo mupharazgenge nyengo zose. Ŵani na vilato vyauzimu ndipo fwiliranipo kuti mufiske. Vilato ivi vingaŵa kucita upayiniya, kuteŵetera pa Beteli, panji kuluta ku Sukulu Yakusambizga Baibolo ya Ŵabali Ŵambura Kutora. Para muŵenge ŵauzimu ‘mucimbirengeko ku makhumbiro agho ghakwiza na uwukirano.’—2 Tim. 2:22.
4. Kasi kugomezgeka kuli na vyandulo wuli?
4 Kugomezgeka: Cifukwa cakuti ŵabali awo ŵakapika mulimo wakugaŵa vyakurya ku Ŵakhristu ŵakavu ŵakaŵa “ŵalumbiri luwemi,” ŵapositole ŵakenjerwanga yayi kuti panji mulimo uwu ucitikenge yayi. Ici cikawovwira kuti ŵaŵike mtima pa milimo yinyake yakuzirwa. (Mil. 6:1-4) Mwantheura, para mwapika mulimo pa mpingo, citani vyose ivyo mungafiska. Yezgani Nowa, uyo wakacita vyose ivyo wakaphalirika pakuzenga cingalaŵa. (Gen. 6:22) Yehova wakukhumba kuti muŵe ŵakugomezgeka ndipo para munthu ngwakugomezgeka wakulongora kuti ngwakukhwima mwauzimu.—1 Kor. 4:2; wonani bokosi lakuti “Vyandulo Ivyo Mungasanga Para Mungasambizgika Milimo.”
5. Cifukwa wuli ŵabali ŵawukirano ŵakwenera kunwekera?
5 Nga umo nchimi Yesaya yikayowoyera, Yehova wakupusumphiska mulimo wakuwunganya ŵanthu. (Yes. 60:22) Pafupifupi ŵanthu 250,000 ŵakubapatizika caka cilicose. Pakuti ŵaphya ŵanandi ŵakwiza mu gulu la Yehova, ŵanalume ŵauzimu ŵakukhumbikwa kuti ŵateŵetenge pa mpingo. Sono ndipo mu mulimo wa Yehova muli vinandi vyakuti vicitike kuluska kale. (1 Kor. 15:58) Kasi mwaŵabali ŵawukirano mukunwekera? Usange ndivyo mukucita, mukukhumba mulimo uwemi comene!
[Mazgu Ghakukhozgera pa peji 2]
Pakuti ŵaphya ŵanandi ŵakwiza mu gulu la Yehova, ŵanalume ŵauzimu ŵakukhumbikwa kuti ŵateŵetenge pa mpingo
[Bokosi pa peji 3]
Vyandulo Ivyo Mungasanga Para Mungasambizgika Milimo
Ŵabali ŵawukirano awo mbakwenelera ŵakusanga vyandulo para ŵalara ŵaŵapa milimo na kuŵasambizga. Maungano ghati ghamara, muteŵeti wa dera wakakhala kunthazi kuti wakhozge ŵapharazgi. Wakawona mubali muwukirano wimilira pafupi na iyo. Ntheura muteŵeti wa dera wakamufumba usange pali vinthu vinyake ivyo wakakhumbanga kumuphalira. Mubali muwukirano wakazgora kuti wali kupika mulimo wakunozga pa pulatifomu para maungano ghamara. Ŵapapi ŵake ŵakaweranga, kweni iyo wakakhumba yayi kuluta pambere wandacite mulimo wake. Muteŵeti wa dera wakafumapo kwambura kudandawura. Wakati: “Ŵalara ŵa mpingo uwu nyengo zose ŵakasambizganga ŵabali ŵawukirano. Ŵakaŵapanga milimo. Lekani para niza pa mpingo wawo, nkhazizwanga yayi usange ŵazomerezga mubali muwukirano kuti waŵe muteŵeti wakovwira.”