Yezgani Zinchimi—Mika
1. Kasi Mika wakwenera kuti wakajifumbanga fumbo wuli? Cifukwa wuli wakapyoka pawaka yayi?
1 ‘Kasi mgonezi uheni uwu umalenge pauli?’ Mika wakwenera kuti wakajifumbapo fumbo ili apo wakapharazganga ceruzgo ca Yehova ku Ŵaisrayeli na Ŵayuda. Ndipouli, ivyo Mika wakapharazganga vikacitika nadi. Mu 740 B.C.E., Samariya wakaparanyika umo Yehova wakayowoyera. Ivi vikacitika Mika wacali wamoyo. (Mika 1:6, 7) Ndipo mu 607 B.C.E., Yerusalemu nayo wakaparanyika. (Mika 3:12) Kasi tingamuyezga wuli Mika apo tikulindilira ceruzgo ca Yehova mazuŵa ghano?
2. Cifukwa wuli tikwenera kuŵa ŵakuzika mtima apo tikulindilira zuŵa la Yehova? Kasi tingalongora wuli kuti ndise ŵakuzika mtima?
2 Tiŵe Ŵakuzika Mtima: Mika wakalemba kuti: ‘Kweni ine, nilaŵiskenge kwa Yehova, nilindilirenge Ciuta wa ciponosko cane.’ (Mika 7:7) Ici cikung’anamura kuti wakakhalanga waka na kulindilira kuti umaliro wize yayi. Kweni wakatangwanika na mulimo uwo Yehova wakamutuma. Apo tikulindilira zuŵa la Yehova, nase tikwenera kuŵa “ŵanthu ŵa makhaliro ghatuŵa na kucita milimo ya kusopa Ciuta mwakujipeleka.” (2 Pet. 3:11, 12) Kuzika mtima kwa Yehova kukupeleka mwaŵi kwa waliyose kuti wapere. (2 Pet. 3:9) Ntheura tikuŵikapo mtima kupulikira ivyo Baibolo likuticiska kuti tiyezgenge zinchimi pa nkhani ya kuzika mtima. (Yak. 5:10)
3. Cifukwa wuli tikwenera kuŵeyelera Yehova kuti watipe mzimu utuŵa?
3 Kuthemba NKhongono za Yehova: Nangauli uteŵeti wa Mika ukaŵa wakusuzga, kweni wakathembanga Yehova kuti wamupe nkhongono. (Mika 3:8) Yehova wakumanya kuti tingamuteŵetera yayi kwambura nkhongono zake. Lekani wakuticiska kuti timulombenge kuti watipe nkhongono. Wakupeleka nkhongono ku ŵakulopwa kuti ŵafiske milimo iyo waŵapa. (Sal. 84:5, 7; Yes. 40:28-31) Kasi namwe muli kupokerapo nkhongono izi? Kasi nyengo zose mukulomba kwa Yehova kuti wamupani mzimu utuŵa?—Luka 11:13.
4. Kasi tikusambirako vici kwa Mika mazuŵa ghano?
4 Kucita khumbo la Ciuta ndico cikaŵa cinthu cakukhumbikwa comene kwa Mika. Nangauli vinthu viheni vikaŵa palipose, kweni Mika wakaŵikapo mtima kuti waŵe wakugomezgeka. Sono napo vinthu viheni vili palipose, ndipo tikuyezgeka zuŵa na zuŵa. Ipo tiŵikepo mtima kuti “tendenge mu zina la Yehova Ciuta withu muyaya na muyaya.”—Mika 4:5.