“Ogasiti Uzamuŵa Mwezi Wambura Kuluwika!”

1. Kasi tizamucita vici pa caru cose apo tili pafupi kukwaniska vyaka 100 kufuma apo Ufumu wa Ciuta ukambira kuwusa?

¹ Tili pafupi kukwaniska vyaka 100 kufuma apo Ufumu wa Ciuta ukambira kuwusa. Ntheura nchakwenelera kuti ticindike Yehova mwakucita upharazgi wapadera. Mu Ogasiti tizamugaŵira thirakiti liphya lakuti Ni Nkhu Uko Tingasanga Mazgoro gha Mafumbo Ghakuzirwa Agho Tikujifumba? Thirakiti ili likuciska ŵanthu kuti ŵapenjenge mazgoro mu Baibolo kweniso likulongosora umo Webusayiti ya jw.org yingaŵawovwilira.

2. Kasi tingacita vici kuti nase tizakacemerezgeko pakulumba Yehova mu Ogasiti?

² Nchemerezgo Yikuru ya Kulumba Yehova: Awo ŵakukhumba kusazgirako uteŵeti, ŵangacitako upayiniya wakanyengo mu mwezi wa Ogasiti. Mu mwezi uwu, ŵapharazgi ŵakubapatizika ŵangazakacita upayiniya wakanyengo wa maora 30. Ŵapharazgi awo ŵakugwira nchito panji kusambira sukulu ŵangazakacitako upayiniya wakanyengo mu Ogasiti, cifukwa mwezi uwu wuli na mazuŵa 5 gha Cinkhondi, Cisulo, na Sabata. Usange uyo mukusambira nayo panji mwana winu wakucita makora mwauzimu wakukhumba kuŵa mupharazgi, phalirani mulaŵiliri wa milimo ya wupu wa ŵalara. Cizamuŵa cakukhozga kuŵa na ŵapharazgi ŵaphya mu mwezi uwu. Ŵapayiniya ŵanyengozose ŵanandi ŵakupumura mu Ogasiti para ŵafiska maora agho ghakukhumbikwa pa caka. Kweni cingaŵa ciwemi kuti ŵasinthe ndondomeko yawo usange ŵangakwaniska kuti ŵaciteko upharazgi wapadera uwu. Sono ndiyo ni nyengo yiwemi kuti mbumba yidumbiskane ivyo yingacita kuti wose ŵazakacemerezgeko pakucindika, panji kuti kulumba Yehova.—Ezra 3:11; Zintharika 15:22.

3. Kasi tili na cigomezgo wuli na upharazgi wapadera uwu?

³ Nangauli tacitapo upharazgi wapadera kanandi waka kumasinda uku, kweni tikugomezga kuti uwu uzamuŵa wambura kuluwika. Kasi mu Ogasiti tingazakaŵa na ciŵelengero cikuru ca maora, ŵapharazgi, na ŵapayiniya ŵakanyengo kuluska kumasinda? Apo tikumalizga caka ca uteŵeti ca 2014, mphanyi Yehova watumbika ivyo ŵanthu ŵake ŵakucita pa caru cose mwakuti ŵacite vinandi mu uteŵeti mu mwezi wa Ogasiti kuluska kumasinda kose!—Mateyu 24:14.