Yezgani Zinchimi—Zefaniya
1. Kasi vinthu vikaŵa wuli apo Zefaniya wakaŵa nchimi, ndipo tikusambirapo vici?
1 Ca m’ma 600 B.C.E., Ŵayuda ŵakasopanga Baala pakweru. Amoni, Fumu yiheni, wakaŵa kuti wakomeka waka, ndipo Yosiya ndiyo wakawusanga. (2 Mid. 33:21–34:1) Pa nyengo iyi, Yehova wakatuma Zefaniya kuti wapharazge uthenga wa ceruzgo. Nangauli Zefaniya wakaŵa wa mu nyumba yacifumu ku Yuda, kweni wakayowoya mwambura kubisa uthenga wa Yehova wakususka mafumu gha Ciyuda. (Zef. 1:1; 3:1-4) Nase tili ŵacikanga nga ni Zefaniya, ndipo tikukana kuti ŵabali ŵithu ŵatitondeske kusopa Yehova. (Mat. 10:34-37) Kasi Zefaniya wakapharazga uthenga wuli, ndipo cikacitika nchivici?
2. Kasi tikwenera kucitaci kuti tizakabisike pa zuŵa la ukali wa Yehova?
2 Penjani Yehova: Ni Yehova pera uyo wangatiponoska pa zuŵa la ukali wake. Lekani Zefaniya wakaciska Ŵayuda kuti ŵapenje Yehova, urunji, na kuzika pambere nyengo yindamare. (Zef. 2:2, 3) Ndimo viliri mazuŵa ghano. Nga umo Zefaniya wakacitiranga, tikuciska ŵanthu kuti ŵapenje Yehova. Kweni nase tikwenera kucitapo kanthu. Tikwenera kufwilirapo kuti tileke “kuwelera nyuma kufumako kwa Yehova.” (Zef. 1:6) M’malo mwake, tikupenja Yehova mwa kusambira Mazgu ghake na kumulomba kuti watilongozge. Tikupenja urunji para tikuŵa na nkharo yiwemi. Tikupenja kuzika para tikupulikira na kulondezga ulongozgi wakufuma ku gulu la Yehova.
3. Cifukwa wuli tikwenera kuŵa na maghanoghano ghawemi para tikupharazga?
3 Ŵanji Ŵakapulikira: Ŵanji ŵakacitapo kanthu ŵati ŵapulika uthenga wa Zefaniya. Yumoza wawo wakaŵa Yosiya uyo wakamba kupenja Yehova wacali msepuka. Wakawuskamo vikozgo mu caru. (2 Mid. 34:2-5) Nangauli mazuŵa ghano mbuto za Ufumu zikuseŵeka mumphepete mwa nthowa, pa malo gha jalawe, panji pakati pa minga, kweni zinyake zikuseŵeka pa dongo liwemi na kupambika vipambi. (Mat. 13:18-23) Tili na cigomezgo kuti Yehova walutilirenge kutitumbika apo tikulutilira kuseŵa mbuto za Ufumu.—Sal. 126:6.
4. Cifukwa wuli tikwenera ‘kulindilira Yehova’?
4 Ŵayuda ŵanyake ŵakaghanaghananga kuti Yehova wacitengepo cilicose yayi. Kweni Yehova wakati zuŵa lake likaŵa pafupi. (Zef. 1:12, 14) Ŵekha awo ŵakamugomezganga ndiwo ŵakapona. (Zef. 3:12, 17) Apo ‘tikulindilira Yehova,’ mphanyi tateŵetera Ciuta mwakukondwa na Ŵakhristu ŵanyithu.—Zef. 3:8, 9.