Tapharazga Ufumu Vyaka 100
1. Kasi ŵanthu ŵa Yehova ŵakachiskika kuchitachi pafupifupi vyaka 100 ivyo vyajumpha?
1 “Wonani, Themba likuwusa! Imwe ndimwe ŵapharazgi ŵake. Ntheura pharazgani, pharazgani, pharazgani Themba na Ufumu wake.” Mazgu agha wakayowoya ni Mubali Rutherford vyaka pafupifupi 100 ivyo vyajumpha. Ŵanthu ŵa Yehova ŵakachiskika kuti ŵapharazgenge uthenga wa Ufumu palipose. Ndivyo nase tachita. Nga Mbakhristu ŵakwambilira, nase tapharazga makani ghawemi gha Ufumu “mu chilengiwa chose kusi ku mtambo.” (Kol. 1:23) Kwa vyaka 100 ivyo vyajumpha, kasi tachita vichi kuti tipharazge Ufumu wa Chiuta? Kasi tingachita wuli kuti tilutilire kupharazga Ufumu uwu apo tili pafupi kukwaniska vyaka 100 kufuma apo ukambira kuwusa?
2. Kasi mabuku ghithu ghakhozgera wuli Ufumu wa Chiuta?
2 Ivyo Tachita: Kwa vyaka vinandi, mabuku ghithu ghakhozgera Ufumu wa Chiuta. Kufuma mu 1939, Gongwe la Mulinda likamba kuŵa na mutu wakuti Gongwe la Mulinda Likupharazga Ufumu wa Yehova. Magazini agha ghakulongosora Ufumu na ivyo uzamuchita. Magazini gha Galamukani! nagho ghakulongosora kuti Ufumu wa Chiuta ndiwo uzamumazga masuzgo gha ŵanthu. Mphake kuti magazini agha ghakung’anamulika na kugaŵirika pa charu chapasi kuluska magazini ghanyake ghose.—Uvu. 14:6.
3. Kasi ni nthowa wuli zinyake izo tikupharazgira makani ghawemi?
3 Pali nthowa zinandi izo ŵanthu ŵa Yehova ŵakupharazgira Ufumu. Kale tikapharazganga uthenga wa Ufumu mwakugwiliskira ntchito wayilesi, giramu, na galimoto izo zikaŵanga na vyakukuzgira mazgu. Pakuti ŵapharazgi ŵakaŵa ŵachoko, nthowa izi zikatovwiranga kuti tipharazgire ŵanthu ŵanandi makani ghawemi. (Sal. 19:4) Mazuŵa ghano tikupharazgira ŵanthu ŵanandi na Webusayiti yithu. Webusayiti iyi, yikovwiraso ŵanthu awo ŵakukhala mu vyaru ivyo mulimo withu ngwakukanizgika.
4. Padera pa kupharazga kunyumba na nyumba, ni nthowa wuli zinyake izo tikupharazgira makani ghawemi?
4 Ŵanthu ŵa Yehova ŵasangaso nthowa ziphya zakupharazgira makani ghawemi gha Ufumu. Mu vyaka vya m’ma 1990, padera pa kupharazga kunyumba na nyumba, tikamba kupharazgaso uko ŵakwimika magalimoto na uko ŵanthu ŵakuchitira bizinesi. Ndipo sonosono apa, tamba upharazgi wapadera wa uko kukusangika ŵanthu ŵanandi pa charu chose chapasi. Mipingo yinandi yikupharazga uko kukusangika ŵanthu ŵanandi mu chigaŵa chawo mwa kuŵika mabuku pa thebulu panji pa chinthu chinyake chakuchita kukunkhuzga. Ndipouli, kupharazga kunyumba na nyumba ndiyo nthowa yikuru iyo tikupharazgira makani ghawemi.—Mil. 20:20.
5. Kasi tingachita vichi mu chaka chiphya cha uteŵeti icho tambenge mu Seputembala?
5 Ivyo Tingachita: Apo tambenge chaka chiphya cha uteŵeti mu Seputembala, ŵanandi ŵazamwamba upayiniya wanyengozose. Kasi namwe muzamuchitako? Para mungafiska yayi, kasi mungazakachitako upayiniya wakanyengo? Kwali mungafiska kuchita upayiniya, kwali yayi, Yehova wamutumbikaninge chifukwa cha vyose ivyo mukuchita kuti mupharazge Ufumu mwakukwana.—Mal. 3:10.
6. Chifukwa wuli mwezi wa Okutobala 2014 uzamuŵa wapadera?
6 Mu Okutobala 2014, Ufumu wa Chiuta ukwaniskenge vyaka 100 kufuma apo ukambira kuwusa. Mphake kuti Gongwe la Mulinda lakugaŵira la Okutobala, lizamulongosora vya Ufumu wa Chiuta. Kasi tingazakagaŵira magazini agha ku ŵanthu ŵanandi? Mphanyi tose talutilira ‘kupharazga makani ghawemi gha Ufumu wa Chiuta’ kwa wose awo ŵangategherezga.—Mil. 8:12.