Yezgani Zintchimi—Nahumu
1. Kasi mu buku la Nahumu tikusambiramo vichi?
1 Nyumba zakugumuka izo zili apo pakaŵa msumba wa Nineve mbukaboni wakuti Yehova wakuwezgera nduzga ŵalwani ŵake. Kweniso, nga umo Nahumu wakayowoyera, mbukaboni wakuti palije uyo wangimako kwa Yehova. (Nah. 1:2, 6) Buku la Nahumu likutisambizga umo tingachitira uteŵeti withu.
2. Kasi ŵanthu tikwenera kuŵaphalira uthenga wuli?
2 Likutipembuzga na Kutipa Chigomezgo: Pakwamba, munthu wangawona nga buku la Nahumu likuyowoya waka vya uthenga wakwimikana na Nineve, uwo ukaŵa msumba ukuru wa Asiriya. (Nah. 1:1; 3:7) Kweni uwu ukaŵa uthenga uwemi ku ŵanthu ŵa Chiuta. Zina lakuti Nahumu, ilo likung’anamura “Chipembuzgo,” likawovwira Ŵayuda kumanya kuti ŵalwani ŵawo ŵazamuŵakoso yayi. Nahumu wakati Yehova ni “linga lakukhora mu zuŵa la suzgo.” (Nah. 1:7) Para tikupharazga, nase tikwenera kuphalira ŵanthu makani ghawemi na kuŵachiska kuti ŵagomezge Yehova.—Nah. 1:15.
3. Kasi tingamuyezga wuli Nahumu pa nkhani ya kusambizga na viyezgelero ndiposo ntharika?
3 Viyezgelero na Ntharika: Kwizira mwa Nahumu, Yehova wakayaniska kuparanyika kwa msumba wa Nineve na wa Thebesi ku Eguputo, uwo ukaparanyika na Ŵaasiriya. (Nah. 3:8-10) Para tikuphalira ŵanyithu kuti charu chiheni ichi chizamuparanyika, tingayowoyapo mauchimi agho Yehova wali kufiska, kulongora kuti mazgu ghake ghakuwa pawaka yayi. Mwachiyelezgero, Ŵababuloni na Ŵamedi ŵati ŵawukira msumba wa Nineve mu 632 B.C.E; mlonga wa Tigris ukazura chifukwa cha vula yikuru iyo yikawa na kuwiska viliŵa vya msumba uwu. Lekani msumba wa Nineve ukaparanyika luŵiro umo Yehova wakayowoyera.—Nah. 1:8; 2:6.
4. Kasi tingachita wuli kuti ŵanthu ŵapulikiske ivyo tikuyowoya mu upharazgi?
4 Yowoyani Ivyo Ŵanthu Ŵangapulikiska: Ivyo Nahumu wakalembanga wakavilongosoranga makora. Fundo zake zikaŵa zakusuzga yayi kupulika. (Nah. 1:14; 3:1) Nase tikwenera kuyowoya mazgu ghapusu agho ŵanthu ŵangaghapulikiska makora. (1 Kor. 14:9) Usange takumana na munthu kakwamba, tikwenera kumulongosolera makora chifukwa icho tizira. Para tikusambira Baibolo na ŵanthu, tikwenera kuŵawovwira kuti ŵaŵe na chipulikano mwa Yehova na Mazgu ghake. Tikweneraso kuŵawovwira umo ŵangachitira na ivyo ŵakusambira.—Rom. 10:14.
5. Kasi tikupembuzgika wuli na buku la Nahumu?
5 Buku la Nahumu likulongora kuti ntchimi iyi yikagomezganga kuti mazgu gha Yehova ghafiskikenge kwambura kutondeka. Apo mgonezi wa Satana uli pafupi kumara, tikupembuzgika na mazgu gha Chiuta agha: “Suzgo lizamuwukaso kachiŵiri chara.”—Nah. 1:9, NW.