Lutilirani Kuzgora Ŵanthu Kuŵa Ŵasambiri
1. Kasi tikwenera kuchita vichi kuti ŵanthu ŵazakapone?
1 Lipoti la uteŵeti la 2014 likulongora kuti ŵanthu ŵa Chiuta ŵakulimbikira kupharazga makani ghawemi gha Ufumu. (Mat. 24:14) Ŵanthu ŵanandi ŵakupulika uthenga wa mu Baibolo para tikupharazga kunyumba na nyumba, kuŵagaŵira mathirakiti, kupeleka tumapepara twakuchemera ŵanthu ku chikumbusko panji ku mawungano gha chigaŵa, kweniso para tikupharazga uko kukusangika ŵanthu ŵanandi. Kweni kuti ŵazakapone tikwenera kusambira nawo Baibolo kuti ŵaŵe ŵasambiri ŵa Yesu.—1 Tim. 2:4.
2. Kasi ni mafumbo wuli agho tingajifumba agho ghangatovwira kuti tambiske masambiro gha Baibolo?
2 Nozgekani Kwambiska Sambiro la Baibolo: Para munthu wakukhumba kumanya vinandi, kasi mukulemba zina lake, nambara ya foni na adiresi kuti muzakawelereko mwaluŵiro mwakuti mukambiske sambiro la Baibolo? Kasi mphawuli apo mukambiskapo sambiro la Baibolo pa ulendo wakwamba? Kasi mphawuli apo mukambiskapo sambiro la Baibolo na ŵanthu awo mukuŵapa magazini mwezi uliwose? Kasi awo mukugwira nawo ntchito, kusambira nawo sukulu, awo mukukhala nawo pafupi, ŵabali ŵinu na awo mukumanyana nawo, muli kuŵalongorapo vidiyo yakuti Chifukwa Wuli Mukwenera Kusambira Baibolo? na Kasi Ŵakaboni ŵa Yehova Ŵakuchita Wuli Pakusambizga Ŵanthu Baibolo? Para mukupharazga na shelufu ya matayala, mukwenera kuyezgayezga kuphalira ŵanthu awo ŵakwiza kuzakatora mabuku kuti mukusambira Baibolo na ŵanthu kwaulere.
3. Kasi ntchivichi chikukhumbikwa kuti tisambizge makora ŵanthu unenesko?
3 Yehova na Yesu Ŵakutovwira: Apo Yesu wakaphaliranga ŵasambiri ŵake kuti ‘lutaninge mukazgore ŵanthu kuŵa ŵasambiri,’ wakalongora kuti tikwenera kwamba ndise kuchitapo kanthu. Yesu wakalayizga kuti waŵenge nase. (Mat. 28:19, 20) Yehova nayo wali kutipa mzimu utuŵa, mabuku kweniso masukulu ivyo vikutovwira kuti tisambizge makora ŵanthu unenesko. (Zek. 4:6; 2 Kor. 4:7) Tingalomba kwa Chiuta kuti tiŵe na ‘khumbo kweniso nkhongono’ zakuchitira mulimo uwu.—Fil. 2:13.
4. Chifukwa wuli tikwenera kulutilira kuzgora ŵanthu kuŵa ŵasambiri?
4 Tikukondwa para tikupharazga makani ghawemi gha Ufumu. Kweni tikukondwa chomene para tasambizga munthu unenesko na kumovwira kuti wende pa “nthowa yakulongozgera ku umoyo.” (Mat. 7:14; 1 Tes. 2:19, 20) Ndipo chakuzirwa chomene ntchakuti para tikulutilira kuzgora ŵanthu kuŵa ŵasambiri, tikukondweska Yehova uyo ‘wakukhumba yayi kuti munyake waparanyike, kweni wakukhumba kuti wose ŵang’anamuke mtima.’—2 Pet. 3:9.