Ivyo Vingatovwira Kuti Tiŵe Ŵaluso mu Uteŵeti—Kupharazga ku Malo gha Bizinesi

Chifukwa wuli Nkhwakuzirwa? Pakuti ŵanthu ŵanandi ŵakugwira ntchito nyengo yitali, tikwenera kuluta ku malo agho ŵakugwilira ntchito kuti tikaŵapharazgire. Upharazgi ungenda makora ku malo gha bizinesi chifukwa kukusangika ŵanthu awo panyumba pawo ŵakusangika yayi. Kweniso awo ŵakugwira ntchito ŵangatipokelera makora chifukwa ŵangawona nga ndise makasitomala. Kuti tipharazge makora, tikwenera kuchita vinthu mwamahara, kweniso tikwenera kuvwara na kujitozga mwakwenelera. (2 Kor. 6:3) Ntheura mulaŵiliri wa uteŵeti wakwenera kuwona umo upharazgi ukwendera ku malo gha bizinesi kweniso na awo ŵakupharazgako.

Umo Tingachitira:

Nozgekerani umo mwamupharazgira mwakudumura. Chifukwa para tadumbiskana nawo nyengo yitali, zuŵa linyake ŵangazakatikanira kuti tiŵapharazgireso.
Tilutenge nyengo iyo kukuŵavya makasitomala ghanandi. Tingaluta panyengo iyo ŵakwambira waka bizinesi zawo.
Tikwenera kudumbiskana dankha na uyo wakulaŵilira pa malo agho. Muŵenge ŵakufwatuka. Mungayowoya kuti: “Tikuchezga na ŵanyithu mwakudumura uko ŵakugwilira ntchito chifukwa ŵakusangika yayi kunyumba kwawo.” Mupharazgirani mwakudumura na kumugaŵira thirakiti, magazini panji buku linyake lililose. Kuyowoya yayi kuti ŵangapelekapo ndalama, pekha para ŵatifumba.
Para uyo wakulaŵilira ngwakufwatuka, tingamupempha kuti tichezgeko na ŵantchito ŵake kwa nyengo yichoko. Ku malo ghanyake gha bizinesi, ntchiwemi kupempha kuti tiŵalekere mabuku pa malo ghakulyera.
Tikwenera kuchita vinthu mwamahara ndipo tisinthenge upharazgi. Mwachiyelezgero, tikwenera kulekezga dankha panji kulindilira usange uyo tikukhumba kumupharazgira wali na kasitomala panji watangwanika na vinthu vinyake.

Yezgani Sachizgo Ili Mwezi Uno:

Pa nyengo yakusopera ya mbumba, yezgelerani mwakudumura umo mungapharazgira para mwapempheka kuti mukapharazge ku malo gha bizinesi.