Kasi Tingachita Wuli Kuti Tichonthenge Mtima wa Awo Tikuŵasambizga?

1. Kasi ŵanthu ŵakachitanga wuli na umo Yesu wakaŵasambizgiranga?

¹ Yesu wakachonthanga mitima ya awo wakaŵasambizganga. Pa nyengo yinyake mitima ya ŵasambiri ŵake ‘yikaphyanga’ chifukwa cha umo wakalongosolera Malemba. (Luka 24:32) Pakuti munthu wakwenera kupulikira Chiuta kufumira pasi pa mtima, kasi tingachita wuli kuti tichonthe mtima wa uyo tikumusambizga kuti wasinthe umoyo wake?—Rom. 6:17.

2. Kasi chikuchitika ntchivichi para tasambizga munthu mwaluso ndiposo mwamahara?

² Sambizgani Mwaluso Ndiposo Mwamahara: Ŵanthu ŵanandi ŵangasintha yayi nkharo yawo para mungaŵaphalira waka icho ntchiwemi na icho ntchiheni. Kweniso munthu wangasoŵerathu para tingasuska waka na Malemba ghanandi visambizgo vya chisopa ivyo wakugomezga. Kuti tovwire munthu, tikwenera kumanya vigomezgo vyake kweniso chifukwa icho wakuvigomezgera. Para tingamufumba mafumbo mwaluso, vingapangiska kuti watiphalire maghanoghano ghake. (Zinth. 20:5) Para tachita nthena ndipo tingasankha makora fundo za mu Malemba izo zingamuchontha mtima. Ntheura tikwenera kulongora kuti tikumutemwa na kuŵa ŵakuzikira. (Zinth. 25:15) Kuluwa yayi kuti ŵanthu ŵakukura mwauzimu mwakupambana. Lekerani mzimu wa Yehova umovwire kusintha maghanoghano na vyakuchita vyake.—Mrk. 4:26-29.

3. Kasi tingawovwira wuli awo tikuŵasambizga kuti ŵaŵe na makhaliro ghawemi?

³ Ŵawovwirani Kuŵa na Makhaliro Ghawemi: Nkhani za mu Baibolo izo zikulongosora chitemwa na uwemi wa Yehova zingawovwira awo tikuŵasambizga kuti ŵaŵe na makhaliro ghawemi. Tingaŵaŵazgira Masalimo 139:1-4 panji Luka 12:6, 7 kuti ŵamanye kuti Yehova wakughanaghanira waliyose wa ise payekha. Para munthu wamba kumanya kuti Yehova wali na lusungu lukuru, wangamba kutemwa na kusopa Chiuta kufumira pasi pa mtima. (Rom. 5:6-8; 1 Yoh. 4:19) Kweniso usange ŵamanya kuti nkharo yawo yikumukhwaska Yehova, ŵangamba kuchita vinthu ivyo vikumukondweska na kumupa ntchindi.—Sal. 78:42; Zinth. 23:16.

4. Kasi tingachindika wuli wanangwa wa kusankha wa uyo tikumusambizga?

⁴ Yehova wakuchichizga munthu yayi kuti walondezgenge malango ghake. Kweni wakuŵaphalira waka uwemi wa kulondezga malango ghake. (Yes. 48:17, 18) Tikuyezga Yehova para tikusambizga munthu munthowa yakuti wafikengepo yekha pa fundo. Munthu wakusanga vitumbiko vyambura kumara para wamanya yekha kuti wakwenera kusintha vinthu pa umoyo wake. (Rom. 12:2) Kweniso vikumovwira kuti wasendelere chomene kwa Yehova, uyo “wakusanda mitima.”—Zinth. 17:3.