Yezgani Zintchimi—Habakuku
1. Chifukwa wuli tingayowoya kuti tikuyana waka na ntchimi Habakuku?
1 Apo tikukumana na masuzgo ghanandi mu charu chiheni ichi, nase tingajipulika nga umo Habakuku wakajipulikira. Iyo wakafumba Chiuta kuti: “Chifukwa wuli mukunilongora vinthu viheni? Chifukwa wuli mukulekelera kuyuzgana?” (Hab. 1:3; 2 Tim. 3:1, 13) Para tikughanaghanirapo ivyo Habakuku wakayowoya kweniso kugomezgeka kwake, vingatovwira kuti tilutilire kuŵa ŵakugomezgeka apo tikulindilira zuŵa la cheruzgo la Yehova—2 Pet. 3:7.
2. Kasi Ŵakhristu ŵa mu nyengo zaumaliro izi ŵakwenera kugomezga vichi?
2 Kuŵa Wamoyo Chifukwa cha Kugomezgeka: M’malo mwakudandawura waka na masuzgo, Habakuku wakalutilira kuŵa maso mwauzimu. (Hab. 2:1) Yehova wakamusimikizgira Habakuku kuti wafiskenge ivyo walayizga pa nyengo yake, kweniso kuti “murunji wazamuŵa wamoyo chifukwa cha kugomezgeka kwake.” (Hab. 2:2-4) Kasi Ŵakhristu ŵa mu nyengo zaumaliro izi ŵakwenera kugomezga vichi? Chakuzirwa chomene nkhugomezga kuti umaliro wizenge, kuluska kumanya apo wizirenge. Chipulikano chikutovwira kuti tilutilire kuŵa maso kweniso kuti tiŵikenge uteŵeti withu pakwamba.—Heb. 10:38, 39.
3. Chifukwa wuli tikwenera kulutilira kuteŵetera Yehova mwachimwemwe?
3 Sekelera mwa Yehova: Chipulikano chithu chizamuyezgeka para Gogi wa Magogi wazakawukira ŵanthu ŵa Yehova. (Ezek. 38:2, 10-12) Pazamuŵa masuzgo chifukwa cha kulimbana, ndipo ŵateŵeti ŵa Chiuta nawo ŵazamusuzgika. Chakurya chizamusoŵa, katundu wazamunangika, ndipo kuzamuŵavya malo ghawemi ghakukhala. Kasi tizamuchita wuli panyengo iyi? Habakuku wakamanya kuti wakumanenge na masuzgo, kweni wakalutilira kuteŵetera Yehova mwakukondwa. (Hab. 3:16-19) Nase “Chimwemwe cha Yehova” chizamutovwira kuti tizizipizge para tazakakumana na masuzgo.—Neh. 8:10; Heb. 12:2.
4. Kasi tili na mwaŵi wuli sono, kweniso munthazi?
4 Yehova wazamulutilira kusambizga ŵanthu awo wazamuŵaponoska pa zuŵa lake la cheruzgo. (Hab. 2:14) Awo ŵazamuwuka nawo ŵazamusambira za Yehova. Nanga ni sono, tiyeni tilutilire kuyowoya za Yehova na milimo yake yakuzizwiska.—Sal. 34:1; 71:17.