UMOYO WACHIKHRISTU
Lumbaninge Yehova
Umoyo ntchawanangwa chakuzirwa chomene. Ivyo tikuchita zuŵa lililose vikulongora kuti tikuwonga chawanangwa ichi panji yayi. Pakuŵa Ŵakaboni ŵa Yehova, tikuyezgayezga kugwiliskira ntchito maluso ghithu kuti tichindike Yehova uyo wali kutipa umoyo. (Sa 36:9; Chiv 4:11) Ndipouli vyenjezgo vya mu charu ichi vingatigongoweska kuŵa na vilato vyauzimu. (Mr 4:18, 19) Waliyose wakwenera kujifumba kuti: ‘Kasi nkhumupa viwemi chomene Yehova? (Ho 14:2) Kasi ntchito iyo nkhugwira yikunitimbanizga kuteŵetera Yehova? Kasi nili na vilato wuli vyauzimu? Kasi ningasazgirako wuli uteŵeti wane?’ Para mwawona kuti mukukhumbikwira kusintha vinthu vinyake, lombani Yehova kuti wamovwirani. Muŵenge ŵakukondwa kweniso ŵakukhorwa para mukulumba Yehova zuŵa lililose.—Sa 61:8.
Kasi maluso ghinu mukupeleka kwa njani?
WONELERANI VIDIYO YAKUTI GWILISKIRANI NTCHITO MALUSO GHINU PAKUTEŴETERA YEHOVA, NDIPO PAMASINDA ZGORANI MAFUMBO AGHA:
Chifukwa wuli ni mahara yayi kupeleka luso lwithu ku charu cha Satana ichi? (1Yoh 2:17)
Kasi awo ŵakumupa Yehova viwemi chomene ŵakutumbikika wuli?
Kasi mukuwona kuti maluso ghinu mungaghagwiliskira ntchito pa uteŵeti wuli?