“Chindika Awuso na Anyoko”

Apo Yesu wakaŵa pa charu chapasi, wakawerezgapo dango lakuti: “Chindika awuso na anyoko.” (Ek 20:12; Mt 15:4) Yesu wakaŵa na wanangwa wakuyowoya ivi chifukwa “wakalutilira kuŵapulikira” ŵapapi ŵake. (Lu 2:51, mazgu ghamusi) Wati wakura apo wakaŵa pafupi kufwa, wakanozga vyakuti amama ŵake, ŵapwelereke.—Yoh 19:26, 27.

Mazuŵa ghano napo, ŵawukirano awo Mbakhristu para ŵakupulikira ŵapapi ŵawo na kuyowoya nawo mwantchindi, ŵakulongora kuti ŵakuŵachindika. Nakuti dango lakuchindika ŵapapi lilije mphaka. Nanga ŵapapi ŵithu ŵangachekura, kweni tikwenera kulutilira kuŵachindika. Para tikuchita nthena ndipo tingasanga phindu na vinjeru vyawo. (Zi 23:22) Tingalongoraso kuti tikuchindika ŵapapi ŵithu para tikuŵapako ndalama na kuŵawovwira para wakusuzgika maghanoghano. (1Ti 5:8) Kwali tili ŵalara panji yayi kweni kuyowoyeskana makora na ŵapapi ŵithu ntchilongolero chakuti tikuŵachindika.

WONELERANI VIDIYO YA MUTU WAKUTI, KASI NINGAYOWOYA WULI NA ŴAPAPI ŴANE? PAMASINDA ZGORANI MAFUMBO AGHA:

• Chifukwa wuli chingaŵa chakusuzga kuyowoyeskana na ŵapapi ŵinu?

• Kasi mungalongora wuli kuti mukuyowoyeskana mwantchindi na ŵapapi ŵinu?

  

• Chifukwa wuli ntchakuzirwa kuyowoyeskana na ŵapapi ŵinu? (Zi 15:22)