“Paulosi Wakawonga Chiuta na Kukhwima Mtima”

Mpingo wa ku Romu ukati wapulika kuti Paulosi wakwiza, ŵabali ŵanandi ŵakenda ulendo pafupifupi makilomita 64 kuti ŵakakumane nayo. Kasi Paulosi wakakhwaskika wuli na ivyo ŵabali ŵakachita apa? “Paulosi wakati waŵawona, wakawonga Chiuta na kukhwima mtima.” (Mil 28:15) Nangauli Paulosi wakamanyikwanga kuti wakakhozganga mipingo, kweni panyengo iyi apo wakaŵa mukayidi, ndiyo wakakhumbikwiranga kukhozgeka.—2Ko 13:10.

Mazuŵa ghano, ŵalaŵiliri ŵadera ŵakwenda kufuma pa mpingo unyake kuluta pa mpingo unyake kuti ŵakakhozge ŵabali na ŵadumbu. Nga umo vikuŵira na ŵateŵeti ŵa Chiuta wose, nyengo zinyake nawo ŵakuvuka, kwenjerwa, kweniso ŵanji ŵakuŵagongoweska. Pa nyengo iyo mulaŵiliri wadera na muwoli wake ŵakuchezgera mpingo winu, kasi mungachita wuli kuti muŵawovwire kuŵa na chikanga mwakuti ‘mukhwimiskane’?—Ro 1:11, 12.

• 

  Muŵengepo pa maungano ghakunozgekera uteŵeti. Mulaŵiliri wadera wakukhozgeka para ŵapharazgi ŵakujipeleka mu sabata yapadera kukapharazga. (1Te 1:2, 3; 2:20) Mungachitako upayiniya wakanyengo pa nyengo iyo mulaŵiliri wadera wakuchezgera mpingo winu. Kasi mungatemwa kuti mwendere nayo lumoza mu uteŵeti pamoza na muwoli wake panji kuluta na yumoza wa iwo ku sambiro la Baibolo? Ŵakukondwa para ŵakwenda na ŵapharazgi ŵakupambanapambana nanga ni awo ŵamba sono kupharazga panji awo ŵakuwona kuti ŵalije maluso mu uteŵeti.

• 

  Ŵapokelerani. Kasi mungatemwa kuŵapa malo ghakugona panji kuŵachemerako panyengo ya chakurya? Para mungachita nthena mulaŵiliri wadera na muwoli wake ŵakumanya kuti mukuŵatemwa. Iwo ŵakukhumba vinandi yayi.—Lu 10:38-42.

• 

  Tegherezgani na kulondezga ulongozgi uwo wamupani. Mwachitemwa, mulaŵiliri wadera wakutovwira apo tikwenera kusintha kuti tilutilire kuteŵetera Yehova. Nyengo zinyake, wangatipa ulongozgi wankhongono. (1Ko 5:1-5) Iyo wakukondwa para tikumupulikira na kujilambika.—Heb 13:17.

• 

  Ŵawongani. Muphalirani wadera na muwoli wake umo mukupindulira na ivyo ŵakuchita. Mungamuphalira pa mulomo, mungamulembera meseji, panji kalata.—Kol 3:15.