UMOYO WACHIKRISTU
Maungano gha pa Chaka Ghakutipa Mwaŵi Wakulongolera Chitemwa
Chifukwa wuli tikukondwa chomene na maungano agha? Nga umo vikaŵira na Ŵaisrayeli kale, mazuŵa ghano napo maungano ghakuru ghakutipa mwaŵi wakusopa Yehova pamoza na ŵasopi ŵanyithu ŵanandi. Tikukondwa na chakurya chinandi chauzimu. Kweniso tikukondwa kuchezga na ŵabali na ŵabwezi ŵithu. Chifukwa chakuti tikuwonga kufumira pasi pamtima, lekani tikukhumba kukaŵapo mazuŵa ghose ghatatu.
Para tiwunganenge pamoza tikwenera kughanaghanira phindu ilo ise tisangenge kweniso umo tingalongolera chitemwa ku ŵanyithu. (Ga 6:10; Heb 10:24, 25) Para mubali panji mudumbu tingamukolerako chijaro kuti wajumphe, panji kusunga malo ghekha agho ngakukhumbikwa, tingalongora kuti tikulaŵiskaso pa vyakukhumba vya ŵanyithu. (Fil 2:3, 4) Maungano ghakutipa mwaŵi uwemi chomene wakusanga ŵabwezi ŵaphya. Pambere ungano undambe, para wamara panji pa nyengo yakupumura, tikwenera kusanga nyengo yakuti timanyane na munthu munyake uyo tamumanyanga yayi. (2Ko 6:13) Ubwezi uwo tingapanga na ŵanji pa nyengo iyi ungaŵa waumoyo wose. Chakuzirwa chomene ntchakuti ŵanthu awo ŵakuwona chitemwa chithu nawo ŵangamba kuteŵetera Yehova.—Yoh 13:35.
WONELERANI VIDIYO YAKUTI MAUNGANO GHA MITUNDU YOSE GHA MUTU WAKUTI “CHITEMWA CHIKUMARA YAYI”!, NDIPO PAMANYUMA ZGORANI MAFUMBO AGHA:
Kasi ŵabali ŵakalongora wuli chitemwa ku ŵalendo awo ŵakiza ku ungano wa mitundu yose wa 2019?
Chifukwa wuli kutemwana kweniso kukolerana pakati pa ŵanthu ŵa Yehova nkhwapadera?
Kasi ŵabali ŵa mu Wupu Wakulongozga, ŵakalongora wuli chitemwa ku Ŵakhristu ŵanyawo?
Kasi mungachita wuli kuti mulongore chitemwa para muli pa maungano ghakurughakuru?
Kasi chitemwa chikawovwira wuli ŵabali ŵithu ku Germany na South Korea kuti ŵaŵe ŵakukolerana?
Kasi tikwenera kuŵikapo mtima kuchitachi?