Zomerani Kuti Yehova Wamovwirani Kwizira mu Lurombo

Yehova ndiyo wakumezga na kukuzga mbuto yaunenesko iyo yapandika mu mtima wa munthu. (1Ko 3:6-9) Ntheura kuti tichite makora uteŵeti withu, tikwenera kuthemba Yehova kuti watovwire kweniso kuti wawovwire awo tikusambira nawo Baibolo.

Tilombenge kwa Yehova kuti wawovwire awo tikusambira nawo Baibolo kuti ŵazizipizge na kutonda masuzgo agho ŵakukumana nagho. (Fil 1:9, 10) Tizunurenge masuzgo ghawo para tikulomba. Tilombenge kuti Yehova watipe mzimu wake utuŵa kuti uvikilire maghanoghano na vyakuchita vithu. (Lu 11:13) Tiŵasambizge awo tikusambira nawo umo ŵangalombera, ndipo tiŵachiskenge kuti ŵalombenge. Tilombenge nawo kweniso para tikuŵalombera tizunurenge mazina ghawo.

WONELERANI VIDIYO YA MUTU WAKUTI, MUKONDWENGE PAKUZGORA ŴANTHU KUŴA ŴASAMBIRI—ZOMERANI KUTI YEHOVA WAMOVWIRANI—LUROMBO, NDIPO PAMANYUMA ZGORANI MAFUMBO AGHA:

• Kasi Neeta wakakumana na suzgo wuli apo wakasambiranga na Jade?

• Kasi lemba la 1 Ŵakorinte 3:6 likamovwira wuli Neeta?

• Kasi suzgo la Neeta likamara wuli?