Upayiniya

Tikugwiliskira ntchito makora nkhongono zithu para tili na vilato vyakuti tichiteko vinandi pakuteŵetera Yehova. (1Ko 9:26) Para tili na vilato, vikutovwira kugwiliskira ntchito makora nyengo iyo yakhalako pambere umaliro wa charu ichi undafike. (Efe 5:15, 16) Pakusopa kwa mbumba, mungachita makora kudumbiskana vilato vyauzimu ivyo mungazakachita mu chaka chiphya cha uteŵeti. Kuti timovwirani kuchita nthena, mu kabuku ka maungano aka muli nkhani izo zikuyowoya za vilato vyakupambanapambana ivyo imwe mungaghanaghanirapo, na kupempha Yehova kuti wamovwirani.—Yak 1:5.

Mwachiyelezgero, kasi mu banja linu mungawovwira yayi kuti yumoza wachiteko upayiniya wanyengozose? Para mukukayikira usange mungakwaniska maora agho ghakukhumbikwa kwa mupayiniya, fumbani mupayiniya uyo nayo wali mu mikhaliro nga yinu. (Zi 15:22) Ndipo nyengo zinyake mungafumba mupayiniya pa nyengo iyo mukuchita kusopa kwa mbumba. Kufuma apo, lembani ndondomeko iyo mungafiska kuyilondezga. Usange mukachitapo kale upayiniya kumanyuma, ghanaghaniranipo usange pasono mungambiraso.

Kasi ŵanyake mu banja linu ŵangachitako upayiniya wakanyengo kwa mwezi umoza panji yinandiko? Usange panji muli ŵakunyotwa, kweni nipera mungafiska kuchita upayiniya wakanyengo mwa kupharazga kwa nyengo yichoko waka zuŵa lililose. Para muli na nyengo yichoko yakupharazgira chifukwa cha ntchito panji sukulu, mungasankha kuchita upayiniya wakanyengo mu mwezi uwo uli na holide panji masabata ghankhondi. Pa kalendara, lembani madeti agho mukukhumba kuzakachitira upayiniya wakanyengo, kweniso lembani ndondomeko.—Zi 21:5.

WONELERANI VIDIYO YA MUTU WAKUTI, MUŴE NA CHIKANGA PAKUŴA . . . MUPAYINIYA, NDIPO PAMANYUMA ZGORANI FUMBO ILI:

• Kasi ivyo vikachitikira Mudumbu Aamand vikutisambizga vichi za umo Yehova wakutemwera kweniso kupwelelera wose awo ŵasankha kuchita upayiniya?