Nthengwa Mbubwezi wa Umoyo Wose

Nthengwa Zachikhristu izo zikwenda makora zikuchindika Yehova, ndipo mfumu na muwoli ŵakuŵa ŵakukondwa. (Mrk 10:9) Ŵakhristu ŵakwenera kulondezga fundo za mu Baibolo para ŵakusankha munthu wakuti ŵatorane nayo kuti ŵaŵe na nthengwa yakukhora kweniso yachimwemwe.

Mungachita makora usange mungasanga munthu wakuzakatorana nayo para ‘mwajumpha pa uwukirano,’ chifukwa pa nyengo iyi, makhumbiro ghakugonana ghakuŵa ghankhongono chomene mwakuti mungatondeka kusankha makora. (1Ko 7:36) Apo mundatore panji kutengwa, khozgani ubwezi winu na Chiuta na kuŵa na mikhaliro Yachikhristu. Para mwachita nthena, muŵenge ŵakunozgeka kuzakawovwira nthengwa yinu kuti yendenge makora.

Pambere mundapangane na munthu kuti mutorane, ŵani na nyengo yakuti mumanye makora wunthu “wakubisika wa mu mtima” wa munthu uyo. (1Pe 3:4) Para pali vinthu vinyake ivyo mukukayikira, dumbiskanani. Nga umo vikuŵira na maubwezi ghanyake, mu nthengwa mukwenera kupeleka vinandi kwa munyinu kuluska ivyo imwe mukwenera kupokera. (Fil 2:3, 4) Usange mukulondezga ulongozgi wa mu Baibolo pambere mundanjire mu nthengwa, vizamumovwirani kuti muzakaŵe na nthengwa yachimwemwe.

WONELERANI VIDIYO YA MUTU WAKUTI KUNOZGEKERA NTHENGWA—CHIGAŴA 3: “KUPENDESERA MTENGO,” NDIPO PAMANYUMA ZGORANI MAFUMBO AGHA:

• Kasi ubwezi ukamba kuŵa uli pakati pa mudumbu na Shane?

• Apo ubwezi ukalutiliranga, kasi mudumbu uyu wakamanya vichi?

• Kasi ŵapapi ŵake ŵakamovwira wuli, ndipo wakasankha wuli mwamahara?