Tikumutemwa Chomene Yehova, Dada Withu

1-2. Chifukwa wuli Yehova wakajura nthowa kuti tiŵe mu mbumba yake? Kasi Yehova wakachita wuli kuti nase tiŵe mu mbumba yake?

YEHOVA watichema kuti tiŵe mu mbumba yake. Iyi ni ntchemo yapadera chomene. Mu mbumba iyi muli ŵanthu awo ŵali kujipatulira kwa Yehova ndipo ŵali na chipulikano mu sembe yakuwombora ya Mwana wake. Tose mu mbumba iyi ndise ŵakukondwa. Tikukondwa chifukwa tili na chilindizga chakuzakakhala na umoyo kwamuyirayira, kwali nkhuchanya panji mu Paradiso pa charu chapasi.

² Yehova ndiyo wali kujura nthowa kuti tiŵe mu mbumba yake chifukwa chakuti wakutitemwa chomene. Kweni kuti wachite nthena, Yehova wakapeleka Mwana wake kuŵa sembe yapadera chomene. (Yoh. 3:16) ‘Tikagulika na mtengo ukuru.’ (1 Kor. 6:20) Chifukwa cha sembe iyi, Yehova wapangiska kuti chiŵe chamachitiko kuti tiŵe nayo paubwezi. Tili na mwaŵi ukuru kuchema Munthu mukuru mu chilengiwa chose kuŵa Dada withu. Ndipo nga umo tikasambilira mu nkhani iyo yajumpha, Yehova ni Dada muwemi chomene.

3. Kasi tingajifumba fumbo wuli? (Wonani bokosi la mutu wakuti: “Kasi Yehova Wakuniwona Ine?”)

³ Nga ni mulembi munyake wa Baibolo, nase tingafumba kuti: “Kasi ningamuwezgera vichi Yehova pa viwemi vyose ivyo wanichitira?” (Sal. 116:12) Zgoro ndakuti palije icho tingamuwezgera Dada withu wakuchanya. Kweni chitemwa icho wali kutilongora, chikutipangiska kuti nase timutemwenge. Mpositole Yohane wakalemba kuti: “Ise tili na chitemwa chifukwa ndiyo wakamba kutitemwa.” (1 Yoh. 4:19) Kasi tingalongora wuli kuti tikuŵatemwa Adada ŵithu ŵakuchanya?

ŴANI PAUBWEZI NA YEHOVA

4. Kuyana na Yakobe 4:8, chifukwa wuli tikwenera kuyezgayezga kuti tiŵe paubwezi na Yehova?

⁴ Yehova wakukhumba kuti tiŵe ŵabwezi ŵake kweniso kuti tiyowoyeskanenge nayo. (Ŵazgani Yakobe 4:8.) Iyo wakutipempha kuti ‘tikoserenge kulomba,’ ndipo nyengo zose wakutitegherezga. (Rom. 12:12) Ngwakutangwanika chomene yayi panji kuvuka kuti watondeke kupulika malurombo ghithu. Ndipo nase tikulongora kuti tikumupulikira para tikuŵazga Mazgu ghake, Baibolo, na mabuku ghose agho ghakutovwira kuti tilipulikiske. Kweniso tikulongora kuti tikumupulikira para tikutegherezga pa maungano gha mpingo. Para ŵapapi ŵakuyowoyeskana makora nyengo zose na ŵana ŵawo vikovwira kuti ŵaŵe nawo paubwezi. Mwakuyana waka, nase para nyengo zose tikuyowoyeskana na Yehova tiŵenge nayo paubwezi.

5. Kasi tingachita wuli kuti malurombo ghithu ghaŵe ghakuzomerezgeka kwa Yehova?

⁵ Ghanaghanirani umo mukulombera kwa Yehova. Yehova wakukhumba kuti timuphalirenge maghanoghano ghithu na umo tikujipulikira mu lurombo. (Sal. 62:8) Tikwenera kujifumba kuti: ‘Kasi malurombo ghane ngapachanyapachanya waka, ngakuwerezgawerezga waka, panji ngakusunga waka pamtima?’ Tikugomezga kuti mukumutemwa chomene Yehova, ndipo mukukhumba kulutilira kuŵa nayo paubwezi wakukhora. Kweni kuti viŵe nthena, mukwenera kuyowoyeskana nayo nyengo zose. Mumuphalirenge vya mu mtima winu. Muphalirani ivyo mukukondwa navyo na ivyo mukufipa navyo mtima. Ndipo muŵenge ŵakunozgeka nyengo zose kuluta kwa iyo kupempha wovwiri.

6. Kasi tikwenera kuchita wuli kuti tiŵe paubwezi na Adada ŵithu ŵakuchanya?

⁶ Kuti tiŵe paubwezi na Adada ŵithu ŵakuchanya, tikwenera kuŵawonga nyengo zose. Nase tingakolerana nayo wamasalimo uyo wakalemba kuti: “Mwachita vinthu vinandi chomene, A Yehova Chiuta wane, milimo yinu yakuzizwiska na ivyo mukutighanaghanira. Palije uyo wangayana namwe. Usange ningayezga kuviphara na kuviyowoya, viŵenge vinandi chomene, vingapendeka yayi!” (Sal. 40:5) Tikwenera kuchita vinandi kujumpha kujipulika waka kuti tikuwonga; tikwenera kulongora kuti tikumuwonga Yehova kwizira mu vyakuchita vithu na ivyo tikuyowoya. Para tichitenge nthena, tilongorenge kuti tikupambana na ŵanthu ŵanandi mazuŵa ghano. Tikukhala mu nyengo iyo ŵanthu mbambura kuwonga pa vyose ivyo Chiuta wakuŵachitira. Nakuti fundo yinyake iyo yikulongora kuti tikukhala mu “mazuŵa ghaumaliro” njakuti ŵanthu mbambura kuwonga. (2 Tim. 3:1, 2) Kweni ise tikwenera kuŵa nthena yayi.

7. Kasi Yehova wakukhumba kuti tichitenge vichi, ndipo chifukwa wuli?

⁷ Ŵapapi ŵakukhumba yayi kuti ŵana ŵawo ŵakanganenge kweni ŵakukhumba kuti ŵatemwanenge. Mwakuyana waka, Yehova wakukhumba kuti ŵateŵeti ŵake wose ŵatemwanenge. Nakuti chitemwa icho chili pakati pithu ntchilongolero chakuti ndise Ŵakhristu ŵaunenesko. (Yoh. 13:35) Tikukolerana nayo wamasalimo uyo wakalemba kuti: “Wonani! Ntchiwemi na chakukondweska nadi kuti ŵabali ŵakukhala pamoza mwakukolerana.” (Sal. 133:1) Para tikutemwa ŵabali na ŵadumbu ŵithu, tikulongora kuti tikumutemwa nadi Yehova. (1 Yoh. 4:20) Ntchakukondweska chomene kuŵa mu mbumba ya ŵabali na ŵadumbu awo ‘mbalusungu kweniso mbachiwuravi.’—Efe. 4:32.

MUPULIKIRANI KUTI MULONGORE KUTI MUKUMUTEMWA

8. Kuyana na 1 Yohane 5:3, kasi ntchifukwa wuli chikuru icho tikupulikira Yehova?

⁸ Yehova wakukhumba kuti ŵana ŵapulikirenge ŵapapi ŵawo, ndipo wakukhumba kuti nase timupulikirenge. (Efe. 6:1) Chifukwa wuli? Chifukwa ntchakuti ni Mlengi withu, ndipo ndiyo wakutisunga kuti tiŵe na umoyo. Kweniso ngwamahara chomene kujumpha ŵapapi wose. Kweni chifukwa chikuru icho tikupulikira Yehova ntchakuti tikumutemwa. (Ŵazgani 1 Yohane 5:3.) Nangauli pali vifukwa vinandi ivyo tikwenera kupulikira Yehova, kweni wakutichichizga yayi kuti timupulikirenge. Yehova wali kutipa wanangwa wakusankha, ntheura wakukondwa chomene para tikumupulikira chifukwa chakuti tikumutemwa.

9-10. Chifukwa wuli ntchakuzirwa kumanya malango gha Yehova na kupulikira?

⁹ Ŵapapi ŵakukhumba kuti ŵana ŵawo ŵaŵenge ŵakuvikilirika. Lekani ŵakupanga malango kuti ŵavikilire ŵana ŵawo. Para ŵana ŵakupulikira malango agha, ŵakulongora kuti ŵakuŵagomezga ŵapapi ŵawo ndiposo ŵakuŵachindika. Ntheura ntchakuzirwa chomene kumanya malango na fundo za Adada ŵithu ŵakuchanya na kupulikira. Para tachita nthena, tikulongora kuti tikumutemwa Yehova na kumuchindika ndipo tikusanga chandulo. (Yes. 48:17, 18) Kweni awo ŵakumukana Yehova na malango ghake ŵakujipweteka ŵekha.—Gal. 6:7, 8.

¹⁰ Para tikuchita vinthu nga umo Yehova wakukhumbira, tikuŵa ŵakuvikilirika mwakuthupi, mu maghanoghano, ndiposo mwauzimu. Yehova wakumanya icho ntchakuzirwa chomene kwa ise. Aurora uyo wakukhala ku United States wakuti, “Nkhumanya kuti para tikupulikira Yehova, nyengo zose tikuŵa na umoyo uwemi chomene.” Uwu mbunenesko kwa waliyose wa ise. Kasi imwe muli kusangapo chandulo na ulongozgi uwo Yehova wakupeleka?

11. Kasi lurombo lukutovwira wuli?

¹¹ Lurombo lukutovwira kuti tiŵenge ŵakupulikira nanga chingaŵa chakusuzga kuchita nthena. Nyengo zinyake ntchakusuzga kupulikira Yehova chifukwa chakuti ndise ŵakwananga, kweni tikwenera kuyezgayezga kuti nyengo zose timupulikirenge. Wamasalimo wakapempha Chiuta kuti: “Ŵikani mwa ine khumbo la kumupulikirani.” (Sal. 51:12) Denise, uyo ni mupayiniya wanyengozose wakayowoya kuti: “Para nawona kuti ntchakusuzga kupulikira malango gha Yehova, nkhulomba nkhongono kuti nichite icho ntchiwemi.” Tikugomezga kuti Yehova wakuzgora malurombo gha nthena.—Luka 11:9-13.

WOVWIRANI ŴANJI KUTEMWA YEHOVA

12. Kuyana na Ŵaefeso 5:1, kasi tikwenera kuchita vichi?

¹² Ŵazgani Ŵaefeso 5:1. Pakuti ndise “ŵana ŵakutemweka” ŵa Yehova, tikuchita chilichose kuti timuyezge iyo. Tikumuyezga para tili ŵachitemwa, ŵalusungu ndiposo ŵakugowokera. Awo ŵakumumanya yayi Yehova para ŵakuwona nkharo yithu yiwemi ŵangakopeka, ndipo nawo ŵangamba kukhumba kumanya vinandi vyakukhwaskana na iyo. (1 Pet. 2:12) Ŵapapi Ŵachikhristu ŵakwenera kuchita vinthu na ŵana ŵawo nga umo Yehova wakuchitira na ise. Para ŵakuchita nthena, ŵana ŵawo nawo ŵakhumbenge kuŵa paubwezi na Yehova.

13. Kasi ni vichi ivyo vitovwirenge kuti tiŵe na chikanga?

¹³ Ŵana ŵachoko kanandi ŵakutemwa chomene adada ŵawo ndipo ŵakukondwa kuyowoya vyakukhwaskana na adada ŵawo. Mwakuyana waka, nase tikumutemwa chomene Dada withu wakuchanya Yehova, ndipo tikukhumba kuti ŵanji nawo ŵamumanye. Mu mtima withu, nase tikujipulika nga umo likajipulikira Themba Davide ilo likalemba kuti: “Nithumbwenge mwa Yehova.” (Sal. 34:2) Kweni nyengo zinyake tingachita wofi kuyowoya vya Yehova. Kasi tingachita wuli kuti tiŵe na chikanga? Tikuŵa na chikanga para taghanaghanira umo Yehova wakukondwera para tikuyowoya vya iyo kweniso umo ŵanji ŵakusangira chandulo para ŵakusambira vya iyo. Yehova watipenge chikanga icho tikukhumbikwira. Wakawovwira Ŵakhristu ŵanyithu mu nyengo yakale kuti ŵaŵe na chikanga, ndipo nase watovwirenge.—1 Tes. 2:2.

14. Chifukwa wuli ntchakuzirwa kuchitako mulimo wakuzgora ŵanthu kuŵa ŵasambiri?

¹⁴ Yehova ngwakutemwera yayi, ndipo wakukondwa para wakuwona kuti tikutemwa ŵanyithu, mwambura kughanaghanira uko ŵakufumira. (Mil. 10:34, 35) Nthowa yiwemi chomene iyo tingalongolera kuti tikuŵatemwa ni para tikuŵapharazgira makani ghawemi. (Mat. 28:19, 20) Kasi mulimo uwu ungaŵawovwira wuli? Awo ŵakutitegherezga ŵangasintha umoyo wawo, ndipo ŵangaŵa na chilindizga chakuzakaŵa na umoyo wamuyirayira mu Paradiso.—1 Tim. 4:16.

TEMWANI YEHOVA NA KUŴA ŴAKUKONDWA

15-16. Kasi tili na vifukwa wuli vyakuŵira ŵakukondwa?

¹⁵ Yehova ni mupapi wachitemwa, ntheura wakukhumba kuti mbumba yake yikondwenge. (Yes. 65:14) Pali vifukwa vinandi ivyo tingaŵira ŵakukondwa sono nangauli tikusangana na masuzgo ghanandi. Mwachiyelezgero, tikugomezga kuti Adada ŵithu ŵakuchanya ŵakutitemwa chomene. Tikulimanya makora Baibolo. (Yer. 15:16) Ndipo tili mu mbumba yapadera iyo muli ŵanthu awo ŵakutemwa Yehova, malango ghake, kweniso ŵakutemwana.—Sal. 106:4, 5.

¹⁶ Tingaŵa ŵakukondwa nyengo zose para tikugomezga kuti umoyo uzamuŵa uwemi chomene munthazi. Tikumanya kuti sonosono apa Yehova wawuskengepo viheni vyose ndipo kwizira mu Ufumu wake, wazgorenge charu chose chapasi kuŵa Paradiso. Kweniso tili na chigomezgo chakupembuzga chomene chakuti wose awo ŵali kufwa ŵazamuwuka ndipo ŵazamuwonanaso na ŵakutemweka ŵawo. (Yoh. 5:28, 29) Iyi yizamuŵa nyengo yakukondweska chomene. Ndipo chakuzirwa chomene ntchakuti tikugomezga kuti sonosono apa waliyose kuchanya na pa charu chapasi wazamupeleka ntchindi, malumbo, kweniso wazamusopa Yehova pera.