LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • w20 Meyi pp. 8-11
  • Mathemba Ghaŵiri Agho Ghakulimbana mu Nyengo Yaumaliro

Vidiyo palije.

Phepani, pali suzgo linyake.

  • Mathemba Ghaŵiri Agho Ghakulimbana mu Nyengo Yaumaliro
  • Gongwe la Mulinda Likupharazga Ufumu wa Yehova (Lakusambira)—2020
  • Nkhani Zakuyanako na Iyi
  • “Themba Lakumpoto” mu Mazuŵa Ghaumaliro
    Gongwe la Mulinda Likupharazga Ufumu wa Yehova (Lakusambira)—2020
  • Yehova Wakuvumbura Vinthu Ivyo Vicitikenge Sonosono
    Gongwe la Mulinda Likupharazga Ufumu wa Yehova—2012
  • Kasi “Themba Lakumpoto” Ni Njani Mazuŵa Ghano?
    Gongwe la Mulinda Likupharazga Ufumu wa Yehova (Lakusambira)—2020
  • Kasi Buku la Chivumbuzi Likuti Ntchivichi Chizamuchitikira Ŵalwani ŵa Chiuta?
    Gongwe la Mulinda Likupharazga Ufumu wa Yehova (Lakusambira)—2022
Wonani Vinyake
Gongwe la Mulinda Likupharazga Ufumu wa Yehova (Lakusambira)—2020
w20 Meyi pp. 8-11

Mathemba Ghaŵiri Agho Ghakulimbana mu Nyengo Yaumaliro

Mauchimi ghanyake agho ghakuyowoyeka mu tchati ichi ghakulongosora vyakuchitika ivyo vikachitika pa nyengo zakuyana. Ghose ghakulongora kuti tili mu “nyengo yaumaliro.”​—Dan. 12:4.

Tchati yakulongora mauchimi kweniso themba la kumpoto na themba lakumwera kwamba mu 1870 m’paka mu nyengo yithu.
  • Tchati 1, yikulongora mauchimi agho ghakanjilirana kufuma cha m’ma 1870 m’paka 1918. Kwamba mu 1914 kuya munthazi ni vyaka vya nyengo yaumaliro. Uchimi 1: Chikoko cha mitu 7 icho chikuwoneka kuti ntchikari ndicho chalongoreka kukwambilira pa tchati ichi. Panyengo ya Nkhondo Yakwamba ya pa Charu Chose, mutu wa 7 wa chikoko ukapwetekeka. Kwamba mu 1917, mutu wa 7 ukachira ndipo chikoko chikaŵaso cha nkhongono. Uchimi 2: Themba lakumpoto na themba lakumwera ghakambaso kumanyikwa mu 1870. Themba lakumpoto likawonekeraso 1871 uyo ni Germany. Themba lakumwera kwakanyengo kachoko waka likaŵa Great Britain, kweni mu 1917 Ufumu wa pa Charu Chose wa Britain na America ndiwo ukanjira mu m’malo mwake. Uchimi 3: Kwamba mu m’ma 1870, Charles T. Russell na ŵabali ŵanyake ndiwo ŵakaŵa ‘thenga.’ Kukwambilira kwa m’ma 1880, Zion’s Watch Tower yikachiska awo ŵakaŵazganga magazini iyi kuti ŵapharazgenge makani ghawemi. Uchimi 4: Kwamba mu 1914, kuvuna. duru wakafumiskikako ku tirigu. Uchimi 5: Kufuma mu 1917, vikandiro vya chisulo na dongo vikamanyikwa. Chati ichi chikulongoraso: Vyakuchitika kwamba mu 1914 m’paka 1918, Nkhondo Yakwamba ya pa Charu Chose. Vyakuchitika ivyo vikakhwaska ŵanthu ŵa Yehova: Kufuma mu 1914 m’paka 1918, Ŵasambiri ŵa Baibolo ku Britain na Germany ŵakajalirika. Mu 1918, ŵabali ŵa ku ofesi yithu yikuru ku United States ŵakajalirika.
    Uchimi 1.

    Malemba Chivu. 11:7; 12:13, 17; 13:1-8, 12

    Uchimi “Chikoko” chawusa ŵanthu pa charu chapasi vyaka vyakujumpha 3,000. Mu nyengo yaumaliro, mutu wake wa nambara 7 ukapwetekeka. Pamanyuma, mutu uwu ukachira ndipo “charu chose chapasi” chakalondezga chikoko. Satana wakugwiliskira ntchito chikoko ichi kurwa “nkhondo na ŵakukhalapo ŵa mphapu.”

    Kufiskika Chigumula chikati chajumpha, maboma agho ghakasuskanga muwuso wa Yehova ndigho ghakamba kuwusa ŵanthu. Vyaka vyakujumpha 3,000 vikati vyajumphapo, mu nyengo ya Nkhondo Yakwamba ya pa Charu Chose, Ufumu wa Britain ukachepa nkhongono. Ukaŵaso wankhongono wati wasazgana na United States. Mu nyengo yaumaliro yino, Satana wakugwiliskira ntchito maboma ghose pa charu chapasi kutambuzga ŵanthu ŵa Chiuta.

  • Uchimi 2.

    Lemba Dan. 11:25-45

    Uchimi Mu nyengo yaumaliro, themba lakumpoto na themba lakumwera ghazamulimbana nkhongono.

    Kufiskika Charu cha Germany chikatimbana na charu cha Britain na United States. Mu 1945 boma la Soviet Union pamoza na vyaru ivyo likakolerananga navyo ndivyo vikaŵa themba lakumpoto. Mu 1991, boma la Soviet Union likamara, ndipo pamanyuma charu cha Russia na vyaru ivyo chikukolerana navyo ndivyo vikazgoka themba lakumpoto.

  • Uchimi 3.

    Malemba Yes. 61:1; Mal. 3:1; Luka 4:18

    Uchimi Yehova wazamutuma “thenga” kuti ‘linozge nthowa’ pambere Ufumu Waumesiya undakhazikiskike. “Thenga” ili, lizamupharazga “makani ghawemi ku ŵakuzika.”

    Kufiskika Kwamba m’ma 1870 C. T. Russell pamoza na ŵanyake ŵakamba kusambira chomene Baibolo kuti ŵamanye ivyo likusambizga nadi. Mu 1881, ŵakamba kudidimizga kuti ŵateŵeti ŵa Chiuta ŵakwenera kupharazga. Ŵakalemba nkhani za mutu wakuti “Ŵapharazgi 1,000 Ŵakukhumbikwa” na “Ŵakuphakazgika Ŵapharazgenge.”

  • Uchimi 4.

    Lemba Mat. 13:24-30, 36-43

    Uchimi Mulwani wazamuseŵa duru mu munda wa tirigu, ndipo lizamukura na kubisa tirigu m’paka pa nyengo yakuvuna. Kufuma apo, duru wazamufumiskikako ku tirigu.

    Kufiskika Kwamba m’ma 1800 mphambano yikamba kumanyikwa pakati pa Ŵakhristu ŵaunenesko na ŵatesi. Mu nyengo yaumaliro yino, Ŵakhristu ŵaunenesko ŵakuwunganyiskika, ndipo ŵakujipatura ku Ŵakhristu ŵatesi.

  • Uchimi 5.

    Lemba Dan. 2:31-33, 41-43

    Uchimi Chikozgo chakupangika na visulo vyakupambanapambana chili na vikandiro vya chisulo na dongo

    Kufiskika Dongo likwimira ŵanthu bweka awo ŵakuwusika na Britain na United States, awo ŵakususka maboma agha. Chifukwa cha ŵanthu aŵa, maboma agha ghakutondeka kugwiliskira ntchito nkhongono zawo mwakukwana.

  • Tchati 2, yikulongora mauchimi agho ghakanjilirana mu nyengo yaumaliro ndipo ghakuyowoya vya nyengo yakufuma cha m’ma 1919 m’paka 1945. Themba lakumpoto likaŵa Germany m’paka mu 1945. Themba lakumwera ni Britain na America. Uchimi 6: Mu 1919, Ŵakhristu ŵakuphakazgika ŵakawunganyiskika mu mpingo wakutozgeka. Kwamba mu 1919, mulimo wakupharazga ukalutilira kukura ndipo uchali kukura. Uchimi 7: Mu 1920, Wupu wa League of Nations ukapangika ndipo ukalutilira kuŵako m’paka apo Nkhondo Yachiŵiri ya pa Charu Chose yikati yamba. Chati ichi chikulongoraso: Uchimi 1, chikoko cha mitu 7 chikalutilira. Uchimi 5, vikandiro vya chisulo na dongo, vikalutilira. Vyakuchitika kwamba mu 1939 m’paka 1945, Nkhondo Yachiŵiri ya pa Charu Chose. Vyakuchitika ivyo vikakhwaska ŵanthu ŵa Yehova: Ku Germany kwamba 1933 m’paka 1945, Ŵakaboni ŵakujumpha 11,000 ŵakajalirika. Ku Britain kwamba 1939 m’paka 1945, Ŵakaboni pafupifupi 1,600 ŵakajalirika. Ku United States kwamba mu 1940 m’paka 1944, Ŵakaboni ŵakawukirika na ŵanthu ŵankhaza nyengo zakujumpha 2,500.
    Uchimi 6.

    Malemba Mat. 13:30; 24:14, 45; 28:19, 20

    Uchimi “Tirigu” wazamuwunjikika pamoza na ‘kulongeka mu nthamba’ ndipo “muzga wakugomezgeka na wavinjeru” wazamwimikika pa “ŵateŵeti ŵake ŵa pa nyumba.” “Makani ghawemi agha gha Ufumu” ghazamwamba kupharazgika pa “charu chose chapasi.”

    Kufiskika Mu 1919, muzga wakugomezgeka wakimikika pa ŵanthu ŵa Chiuta. Kwamba waka panyengo iyi, Ŵasambiri ŵa Baibolo ŵakalimbikiranga chomene kupharazga. Mazuŵa ghano, Ŵakaboni ŵa Yehova ŵakupharazga mu vyaru vyakujumpha 200, ndipo ŵakusindikizga mabuku ghakulongosora Baibolo mu viyowoyero vyakujumpha 1,000.

  • Uchimi 7.

    Malemba Dan. 12:11; Chivu. 13:11, 14, 15

    Uchimi Chikoko cha masengwe ghaŵiri chizamuphalira ŵanthu pa charu chapasi kuti ŵapange “chikozgo cha chikoko,” ndipo chikoko ichi ‘chizamupeleka mvuchi ku chikozgo cha chikoko.’

    Kufiskika Ufumu wa Britain na United States ndiwo ukambiska wupu wa League of Nations. Vyaru vinyake navyo vikanjira mu wupu uwu. Pamanyuma, themba lakumpoto nalo likanjira mu wupu uwu, nangauli likakhalamo waka kwamba mu 1926 m’paka 1933. Ŵanthu ŵakagomezganga kuti wupu wa League of Nations ungiziska mtende pa charu chapasi, apo ni Ufumu wa Chiuta pera ndiwo ungiziska mtende. Mazuŵa ghano napo ŵanthu ŵakugomezga kuti wupu wa United Nations (UN) ungiziska mtende.

  • Tchati 3, yikulongora mauchimi agho ghakanjilirana mu nyengo yaumaliro ndipo ghakuyowoya vya nyengo yakufuma 1945 m’paka 1991. Themba lakumpoto likaŵa Soviet Union na vyaru ivyo likakolerana navyo m’paka mu 1991, kufuma apo charu Russia na vyaru ivyo chikukolerana navyo ndilo ni themba la kumpoto. Themba lakumwera ni Ufumu wa pa Charu Chose wa Britain na America. Uchimi 8: Josi la bomba la nyukiliya, ilo likulongora umo Ufumu wa pa Charu Chose wa Britain na America ukunangira vinthu vinandi. Uchimi 9: Wupu wa United Nations ukapangika mu 1945, ndipo ndiwo ukanjira m’malo mwa wupu wa League of Nations. Tchati ichi chikulongoraso: Uchimi 1, chikoko cha mitu 7 chikalutilira. Uchimi 5, vikandiro vya chisulo na dongo vikamanyikwa. Uchimi 6, mu 1945 ŵapharazgi ŵakujumpha 156,000. Mu 1991, ŵapharazgi ŵakujumpha 4,278,000. Vyakuchitika ivyo vikakhwaska ŵanthu ŵa Yehova. Mu boma la Soviet Union kwamba mu 1945 m’paka m’ma 1950 Ŵakaboni masawuzandi ghanandi ŵakatumizgika ku Siberia.
    Uchimi8.

    Lemba Dan. 8:23, 24

    Uchimi Themba lakuwoneka mwakofya “lizamuparanya munthowa yakuzizwiska.”

    Kufiskika Ufumu wa Britain na United States wakoma ŵanthu ŵanandi kweniso wananga vinthu vinandi chomene. Mwachiyelezgero, mu nyengo ya Nkhondo Yachiŵiri ya pa Charu Chose, charu cha United States chikaponya mabomba ghaŵiri ghanyukiliya pa charu icho chikaŵa mulwani wa vyaru viŵiri ivi. Mabomba agha ghakananga chomene vinthu kuluska mabomba ghanyake agho ghakaphuliskikapo kumasinda.

  • Uchimi 9.

    Malemba Dan. 11:31; Chivu. 17:3, 7-11

    Uchimi Chikoko “chiswesi” cha masengwe 10 chizamufuma mu chizongwe ndipo chikoko ichi ni themba la 8. Buku la Daniyeli likuti themba ili ‘ntchinthu chakuseluska icho chikupasura.’

    Kufiskika Wupu wa League of Nations ukaleka kugwira ntchito mu nyengo ya Nkhondo Yachiŵiri ya pa Charu Chose. Nkhondo iyi yati yamara, wupu wa UN ukanjira m’malo mwa wupu wa League of Nations. Nga umo vikaŵira na wupu wa League of Nations, wupu wa UN nawo ukuti ungiziska mtende pa charu chapasi apo ni Ufumu wa Chiuta pera uwo ungachita ivi. Wupu wa UN uzamuwukira chisopa chautesi.

  • Tchati 4, chikulongora mauchimi agho ghakunjilirana mu nyengo yaumaliro ndiposo vyakuchitika vya mu nyengo yithu yino m’paka pa Aramagedoni. Themba lakumpoto ni charu cha Russia na vyaru ivyo chikukolerana navyo. Themba lakumwera ni Ufumu wa pa Charu Chose wa Britain na America. Uchimi 10: Ŵalongozgi ŵa ndyali ŵachemerezga kuti ‘bata na mtende.’ Pamanyuma, suzgo yikuru yikwamba. Uchimi 11: Mitundu yikuparanya mawupu gha visopa. Uchimi 12: Maboma ghawukira ŵanthu ŵa Chiuta. Ŵakuphakazgika awo ŵachali pa charu chapasi ŵawunganyiskika kuti ŵalute kuchanya. Uchimi 13: Aramagedoni. Uyo wakhala pa hachi lituŵa wakumalizga kutonda kwake. Chikoko cha mitu 7 chikuparanyika; vikandiro vyachisulo na dongo vya chikozgo chikuru vikuteketeka. Tchati ichi chikulongoraso: Uchimi 1, chikoko cha mitu 7 chikulutilira m’paka pa Aramagedoni. Uchimi 5, vikandiro vya chisulo na dongo vikulutilira kuŵapo m’paka pa nkhondo ya Aramagedoni. Uchimi 6, mazuŵa ghano, ŵapharazgi ŵakujumpha 8,580,000. Vyakuchitika iyo vikukhwaska ŵanthu ŵa Yehova: Mu 2017, ŵalara ŵa boma ku Russian ŵakakaka Ŵakaboni na kupoka ofesi yithu ya munthavi.
    Uchimi 10 na 11.

    Malemba 1 Tes. 5:3; Chivu. 17:16

    Uchimi Mitundu yizamuchemerezga kuti “bata na mtende,” ndipo “masengwe 10” na “chikoko” vizamuwukira “muhule” na kumuparanya. Pamanyuma, mitundu yizamuparanyika.

    Kufiskika Mitundu yizamuti yafiska chilato chake chakuti pa charu chose chapasi paŵe bata na mtende. Pamanyuma, vyaru ivyo vili mu UN vizamuparanya mawupu ghose gha chisopa chautesi. Uku kuzamuŵa kwamba kwa suzgo yikuru. Suzgo yikuru yizamumara para Yesu waparanya charu chose cha Satana pa nkhondo ya Aramagedoni.

  • Uchimi 12.

    Malemba Ezek. 38:11, 14-17; Mat. 24:31

    Uchimi Gogi wazamuwukira charu cha ŵanthu ŵa Chiuta. Kufuma apo, ŵangelo ŵazamuwunganya “ŵakusoleka.”

    Kufiskika Themba lakumpoto pamoza na maboma ghanyake ghazamuwukira ŵanthu ŵa Chiuta. Para ŵanthu ŵa Chiuta ŵamba kuwukilika, ŵakuphakazgika awo ŵachali pa charu chapasi ŵazamuwunganyiskika na kuluta kuchanya.

  • Uchimi 13.

    Malemba Ezek. 38:18-23; Dan. 2:34, 35, 44, 45; Chivu. 6:2; 16:14, 16; 17:14; 19:20

    Uchimi ‘Uyo wakhala’ pa “hachi lituŵa” wazamumalizga “kuthereska” pakuparanya Gogi na ŵankhondo ŵake. “Chikoko” chizamuponyeka “mu nyanja ya moto iyo yikugolera na sulefure,” ndipo chikozgo chikuru chizamuteketeka.

    Kufiskika Yesu, uyo ni Fumu mu Ufumu wa Chiuta, wazamuponoska ŵanthu ŵa Chiuta. Iyo pamoza na ŵa 144,000 kweniso ŵangelo ŵake, wazamuparanya mitundu yose iyo yizamuwukira ŵanthu ŵa Chiuta. Uwu uzamuŵa umaliro wa charu cha Satana ichi.

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani