NKHANI YAKUSAMBIRA 41
Umo Tingawovwilira Ŵasambiri Ŵithu ŵa Baibolo Kuti Ŵabatizike—Chigaŵa Chakwamba
“Mukulongoreka kuti ndimwe kalata ya Khristu yakulembeka na ise pakuŵa ŵateŵeti.”—2 KOR. 3:3.
SUMU 78 “Kusambizga Mazgu gha Chiuta”
CHILATO CHA NKHANI IYIa
Palije chinthu chakukondweska ku mpingo wose kuluska kuwona msambiri wa Baibolo wakubatizika. (Wonani ndime 1)
1. Kasi lemba la 2 Ŵakorinte 3:1-3 likutovwira wuli kumanya kuti kusambizga munthu Baibolo m’paka kubatizika ni mwaŵi wapera chomene? (Wonani chithuzi cha pa chikopi.)
KASI mukujipulika wuli para mukuwona msambiri wa Baibolo wa mu chigaŵa cha mpingo winu wakubatizika? Mukwenera kuti mukukondwa chomene. (Mat. 28:19) Ndipo usange ndimwe mwasambiranga nayo, mukuŵa ŵakukondwa chomene para wakubatizika. (1 Tes. 2:19, 20) Awo ŵabatizika waka, ni “makalata ghamalumbo” kwa awo ŵakasambiranga nawo Baibolo pera yayi kweniso ku mpingo wose.—Ŵazgani 2 Ŵakorinte 3:1-3.
2. (a) Kasi ni fumbo wuli lakuzirwa ilo tikwenera kughanaghanira, ndipo chifukwa wuli? (b) Kasi Sambiro la Baibolo ni vichi? (Wonani mazgu ghamusi.)
2 Ntchakukondweska chomene kuwona kuti vyaka 4 ivyo vyajumpha, tikachitiska masambiro gha Baibolob pafupifupi 10,000,000 pa charu chose. Ndipo mu vyaka ivi, ŵanthu pafupifupi 280,000 ŵabatizikanga chaka chilichose na kuŵa Ŵakaboni ŵa Yehova kweniso ŵasambiri ŵaphya ŵa Yesu Khristu. Kasi tingawovwira wuli ŵanthu mamiliyoni ghanandi awo tikusambira nawo Baibolo kuti ŵabatizike? Yehova wachali kupeleka mwaŵi ku ŵanthu wakuti ŵaŵe Ŵakaboni ŵake. Lekani nase tikulimbikira chomene kuti tiŵawovwire kuti ŵabatizike mwaluŵiro. Nyengo yafupiskika.—1 Kor. 7:29a, 1 Pet. 4:7.
3. Kasi tiwonenge vichi mu nkhani iyi?
3 Chifukwa chakuti mulimo wakuzgora ŵanthu kuŵa ŵasambiri ngwakuzirwa chomene sono, Wupu Wakulongozga ukafumba maofesi gha munthavi, ivyo tikwenera kuchita kuti tovwire ŵanthu ŵanandi awo tikusambira nawo Baibolo kuti ŵabatizike. Mu nkhani iyi na yakulondezgapo, tiwonenge ivyo tingasambirako ku ŵapayiniya ŵaluso, ŵamishonale na ŵalaŵilira ŵa dera.c (Zinth. 11:14; 15:22) Iwo ŵakulongosora ivyo msambizgi na msambiri ŵangachita, kuti sambiro liŵenge lakovwira nadi. Mu nkhani iyi, tiwonenge vinthu 5 ivyo waliyose uyo wakusambira Baibolo wakwenera kuchita kuti wabatizike.
SAMBIRANI SABATA YILIYOSE
Pemphani sambiro linu usange lingasanga malo kuti musambilirengepo Baibolo (Wonani ndime 4-6)
4. Kasi munthu wangabatizika para tikudumbiskana nayo mwadumura fundo za mu Baibolo?
4 Ŵabali na ŵadumbu ŵithu ŵanandi ŵakusambira na ŵanthu Baibolo chakwimilira waka pawaro pa nyumba zawo. Nangauli kuchita nthena nkhuwemi kuti munthu wanweke kusambira Baibolo, kweni kanandi vidumbirano vyanthena vikuŵa vifupi ndipo nyengo zinyake vingachitika yayi sabata yiliyose. Kuti munthu wanweke chomene, ŵabali na ŵadumbu ŵanyake, ŵakupempha nambara ya munthu wakunweka ndipo ŵakukamwimbira foni panji kumutumizgira meseji na kumuphalirako fundo zinyake za mu Baibolo. Kudumbirana kwa nyengo yifupi uku panji kungachitika kwa myezi kweni kukovwira yayi kuti sambiro la Baibolo liŵenge la chandulo. Ntheura, msambirid wangajipeleka yayi na kubatizika usange wakupatura nyengo yichoko kuti wasambirenge Baibolo.
5. Kasi Yesu wakayowoya vichi pa Luka 14:27-33, ivyo tingagwiliskira ntchito kuti tovwire awo tikusambira nawo Baibolo?
5 Ulendo unyake Yesu wakalongosora ivyo munthu wakwenera kuchita usange wakukhumba kuŵa msambiri wake. Wakayowoya chiyelezgero. Wakayowoyapo za munthu uyo wakukhumba kuzenga chigongwe kweniso za themba ilo likukhumba kuluta ku nkhondo. Yesu wakati wakuzenga wakwenera “kukhala dankha pasi na kupendesera mtengo” kuti wawone usange wangachimalizga chigongwe, ndipo themba likwenera “kukhala dankha pasi na kufumbilira fundo” kuti liwone usange ŵankhondo ŵake ŵangafiska ivyo likukhumba kuchita. (Ŵazgani Luka 14:27-33.) Mwakuyana waka, Yesu wakamanya kuti munthu uyo wakukhumba kuŵa msambiri wake, wakwenera kumanya makora ivyo wakwenera kuchita kuti wamulondezge. Pa chifukwa ichi, tikwenera kuchiska awo tikusambira nawo Baibolo kuti tisambirenge sabata yiliyose. Kasi tingachita wuli nthena?
6. Kasi tikwenera kuyezga kuchita vichi kuti ŵanthu awo tikusambira nawo Baibolo ŵakure luŵiro mwauzimu?
6 Chakwamba sazgiraniko nyengo yakusambilira nawo Baibolo ŵanthu awo mukusambira nawo mwakudumura. Panji mungamba kudumbiskana nawo Malemba ghaŵiri m’malo mwa limoza ilo mukadumbiskananga. Para mweneko nyumba wazgoŵera kusambira nayo nyengo yitaliko, mufumbani usange pali malo ghanyake ghakuti mungakhala pasi na kulutilira kudumbiskana nayo. Ivyo wazgorenge vingalongora usange ngwakukhumbisiska nadi kusambira Baibolo. Kweniso kuti wakure mwauzimu mwaluŵiro, mungamupempha msambiri winu usange wangatemwa kuti musambirenge nayo kaŵiri pa sabata. Kweni pali vinandi ivyo vikukhumbikwa padera pakusambira waka nayo kamoza panji kaŵiri pa sabata.
MUNOZGEKERENGE PARA MUSAMBIZGENGE
Nozgekerani makora sambiro, ndipo wovwirani sambiro linu umo lingachitira pakunozgera (Wonani ndime 7-9)
7. Kasi msambizgi wanganozgekera wuli para wamusambira na munthu?
7 Pakuŵa msambizgi, mukwenera kunozgekera makora sambiro lililose ilo mwamusambira na munthu. Mungamba dankha kuŵerenga ivyo mwamudumbiskana na kuwona malemba agho ghalimo. Toranimo fundo zikuru. Ghanaghanirani mutu uwo mwamusambira nayo, tumitu tuchokotuchoko, mafumbo, malemba agho ŵati “ŵazgani,” vithuzi na mavidiyo agho mukuwona kuti ghangamovwirani kulongosora makora nkhani iyo mwamudumbiskana. Kufuma apo, ghanaghanirani umo mwamulongosolera mwakupulikikwa makora fundo izo, mwakuti msambiri winu wapulikiske kweniso wachitenge ivyo wakusambira.—Neh. 8:8; Zinth. 15:28a.
8. Kasi mazgu gha mpositole Paulosi agho ghali pa Ŵakolose 1:9, 10 ghakutisambizga vichi?
8 Kweniso pakunozgekera, mulomberani msambiri winu kwa Yehova ivyo wakukhumbikwira. Mupemphani Yehova kuti wamovwirani kuti musambizgenge ivyo vili mu Baibolo munthowa yakuti vimufikenge pamtima munthu. (Ŵazgani Ŵakolose 1:9, 10.) Jifumbani usange pali chinyake icho msambiri winu wangakatondeka kuchipulikiska makora kweniso kukolerana nacho. Kuluwa yayi kuti chilato chinu ntchakuti mumovwire kuti wabatizike.
9. Kasi msambizgi wangawovwira wuli uyo wakusambira nayo kuti wanozgekerenge sambiro? Longosorani.
9 Tikugomezga kuti msambiri withu wa Baibolo usange tikusambira nayo nyengo zose, timovwirenge kuti walongore kuwongera ivyo Yehova na Yesu ŵamuchitira, ndipo wakhumbenge kusambira vinandi. (Mat. 5:3, 6) Kuti wasange chandulo na sambiro, msambiri wakwenera kutegherezga chomene ivyo wakusambira. Kuti mumovwire kuchita nthena, mulongosolerani kuzirwa kwa kunozgera makora sambiro lililose, ndipo wanozgekerengethu pambere mundize kuzakasambira nayo kweniso waghanaghanirengepo umo wangalondezgera ivyo wakusambira. Kasi mungamovwira wuli kuti wanozgekerenge? Nozgekerani nayo pamoza kuti mumulongore umo wakwenera kuchitira.e Mulongosolerani umo wangasangira mazgoro gha mafumbo, kweniso kuti wagwarenge mazgoro kuti wazakakumbukirenge. Kufuma apo mupemphani kuti wazgorenge mu mazgu ghake na ghake. Para wazgorenge mu mazgu ghake na ghake, mumanyenge kuti wapulikiska nadi ivyo mwamusambizga. Kweni paliso chinyake icho mungamuchiska msambiri winu kuti wachitenge.
MUSAMBIZGANI KUTI WAYOWOYESKANENGE NA YEHOVA ZUŴA LILILOSE
Sambizgani msambiri winu umo wangayowoyeskerana na Yehova (Wonani ndime 10-11)
10. Chifukwa wuli ntchakuzirwa kuŵazga Baibolo zuŵa lililose, ndipo msambiri wakwenera kuchita wuli kuti wasangenge chomene chandulo?
10 Padera pakusambira Baibolo sabata yiliyose na msambizgi wake, msambiri wakwenera kuchitaso vinthu vinyake payekha zuŵa lililose kuti wapindure. Wakwenera kuyowoyeskana na Yehova. Kasi wangachita wuli? Wakwenera kupulikira Yehova na kuyowoyeskana nayo. Wangalongora kuti wakupulikira Chiuta para wakuŵerenga Baibolo zuŵa lililose. (Josh. 1:8; Sal. 1:1-3) Mulongorani “Ndondomeko Yakuŵazga Baibolo” iyo yili pa jw.org.f Kweniso kuti wasangenge chomene chandulo pakuŵazga Baibolo, muchiskani kuti waghanaghanirengepo ivyo Baibolo likumusambizga vyakukhwaskana na Yehova, kweniso umo wangachitira kuti wachitenge ivyo wakusambira pa umoyo wake.—Mil. 17:11; Yak. 1:25.
11. Kasi msambiri wangasambira wuli kulomba kufumira pasi pamtima, ndipo chifukwa wuli ntchakuzirwa kuti walombenge pafupipafupi?
11 Chiskani msambiri winu kuti wayowoyeskanenge na Yehova mu lurombo zuŵa lililose. Para mukwamba sambiro na para mukumalizga, mulombenge nayo kufumira pasi pamtima, ndipo mumuzunurenge msambiri winu mu malurombo agha. Apo wakutegherezga malurombo ghinu, nayo wasambirenge umo wangalombera kwa Yehova Chiuta kufumira pasi pamtima kwizira mu zina la Yesu Khristu. (Mat. 6:9; Yoh. 15:16) Msambiri winu wasendelerenge kwa Yehova para waŵazgenge Baibolo (kutegherezga kwa Yehova) na kulomba (kuyowoyeskana na Yehova) zuŵa lililose. (Yak. 4:8) Ndipo ivi, vimovwirenge kuti wajipeleke na kubatizika. Kasi chinyake ntchivichi icho chingamovwira?
MOVWIRANI KUTI WAŴE PAUBWEZI NA YEHOVA
12. Kasi msambizgi wangawovwira wuli msambiri wake kuŵa paubwezi na Yehova?
12 Tikukhumba kuti awo tikusambira nawo Baibolo ŵamanye vinandi vya Yehova. Kweni ivyo ŵakusambira vikweneraso kuŵafika pamtima. Ivi viwovwirenge kuti ŵachitenge ivyo ŵakusambira. Yesu wakasambizga ŵanthu vinthu vinandi ndipo ŵanthu ŵakatemwanga kusambira kwa iyo. Kweni ŵanthu ŵakamulondezganga chifukwa chakuti ivyo wakasambizganga vikaŵafikanga pamtima. (Luka 24:15, 27, 32) Msambiri winu wakwenera kuwona kuti Yehova ngwanadi, wangaŵa nayo paubwezi, na kumuwona kuŵa Dada wake, Chiuta wake, na Mubwezi wake. (Sal. 25:4, 5) Panyengo yakusambira, movwirani msambiri winu kuwona mikhaliro yiwemi iyo Chiuta wali nayo. (Eks. 34:5, 6; 1 Pet. 5:6, 7) Muchitenge ivi pa mutu uliwose uwo mukusambira nayo. Movwirani kupulikiska mikhaliro ya Yehova nga ntchitemwa, lusungu na chiwuravi. Yesu wakati “dango likuru chomene na lakwamba” ndakuti “utemwenge Yehova Chiuta wako.” (Mat. 22:37, 38) Wovwirani msambiri winu kuti watemwenge chomene Yehova.
13. Kasi mungawovwilira wuli msambiri winu kusambira mikhaliro yiwemi ya Yehova? Pelekani chiyelezgero.
13 Para mukudumbiskana na msambiri winu, longosorani chifukwa icho mukumutemwera chomene Yehova. Ivi vingamovwira msambiri winu kuŵa paubwezi na Yehova na kusambira kumutemwa chomene. (Sal. 73:28) Mwachiyelezgero, kasi mu ndime iyo mukudumbiskana muli mazgu agho ghakuyowoya fundo yinyake yakukhwaskana na chitemwa cha Yehova, vinjeru, urunji, panji nkhongono, iyo yikumufikani pamtima? Usange ni nthena, muphaliraniko msambiri winu, ndipo mumanyiskani kuti fundo iyo njimoza mwa vifukwa ivyo vikumupangiskani kuti mutemwenge chomene Adada ŵinu ŵakuchanya. Paliso chinyake icho msambiri waliyose wa Baibolo wakwenera kuchita kuti wabatizike.
MUCHISKANI KUTI WALUTENGE KU MAUNGANO GHA MPINGO
Chiskani msambiri winu kuti wambe kwiza ku maungano mwaluŵiro (Wonani ndime 14-15)
14. Kasi lemba la Ŵahebere 10:24, 25 likutiphalira vichi vyakukhwaskana na maungano ivyo vingawovwira msambiri withu wa Baibolo kuluta panthazi?
14 Tose tikukhumba kuti awo tikusambira nawo Baibolo ŵabatizike. Nthowa yiwemi chomene iyo tingaŵawovwilira ni para tikuŵachiska kuti ŵalutenge ku maungano gha mpingo. Ŵapharazgi awo ŵali na luso pakusambizga, ŵakuyowoya kuti ŵasambiri awo ŵakwiza ku maungano ŵakuluta panthazi mwaluŵiro chomene. (Sal. 111:1) Ŵanyake ŵakuphalira awo ŵakusambira nawo Baibolo kuti hafu ya ivyo ŵasambirenge, ŵasambirenge na msambizgi wawo, hafu yinyake ŵamusambira ku maungano. Ŵazgani Ŵahebere 10:24, 25 na msambiri winu, na kumulongosolera uwemi wakwiza ku maungano. Mulongorani vidiyo ya mutu wakuti Kasi pa Nyumba ya Ufumu Pakuchitika Vichi?g Movwirani msambiri winu kuti waŵikengepo mtima kuwungana nyengo zose.
15. Kasi tingamuchiska wuli msambiri withu wa Baibolo kuti walutenge ku maungano nyengo zose?
15 Kasi mungachita wuli para uyo mukusambira nayo Baibolo wandizeko ku maungano panji wakwizako viŵi yayi? Mwakukondwa muphaliraniko fundo yinyake iyo mwasambira pa maungano mwasonosono. Para wawona umo mukujipulikira na maungano, nayo wangiza. Mupani Gongwe la Mulinda ilo mukusambira pa nyengo iyo pa maungano, panji kabuku ka Uteŵeti na Umoyo Wachikhristu. Mulongorani ivyo mwamusambira pa maungano ghakulondezgapo, ndipo mufumbani nkhani iyo wakuwona kuti njakukondweska kwa iyo. Ivyo msambiri winu wangawona na kupulika pa ungano wakwamba kuwungana nase, vyamumuŵira viwemi chomene kuluska vyose ivyo wali kupulikapo ku matchalitchi ghanyake ghose. (1 Kor. 14:24, 25) Wamukumana na ŵanji ŵachiyelezgero chiwemi awo wangaŵayezga, ndipo ŵangamovwira kuti wafike pakubatizika.
16. Kasi tikwenera kuchita vichi kuti tovwire ŵanthu awo tikusambira nawo Baibolo kuti ŵafike pa kubatizika, ndipo tizamusambira vichi mu nkhani yakulondezgapo?
16 Kasi tingawovwira wuli ŵanthu awo tikusambira nawo Baibolo kuti ŵafike pakubatizika? Munthu waliyose uyo tikusambira nayo Baibolo tikwenera kumovwira kuti wawonenge kuti sambiro ndakuzirwa. Tikwenera kumuchiska kuti wasambirenge nase sabata yiliyose kweniso wanozgekerenge sambiro lililose. Tikweneraso kumuchiska kuti wayowoyeskanenge na Yehova zuŵa lililose na kuŵa nayo paubwezi. Timovwireso msambiri withu kuti wasangikenge pa maungano. (Wonani bokosi la mutu wakuti “Ivyo Msambiri wa Baibolo Wakwenera Kuchita Kuti Wabatizike.”) Ndipouli, nga umo nkhani yakulondezgapo yilongosolerenge, pali vinthu vinyake 5 ivyo awo ŵakusambizga ŵanji Baibolo ŵakwenera kuchita kuti ŵawovwire msambiri kufika pa kubatizika.
SUMU 76 Kasi Mukujipulika Wuli?
a Kusambizga munthu chikung’anamura kumovwira kuti wambe kughanaghana, kuwona vinthu, na kuchita vinthu mu nthowa yinyake yiphya. Lemba la chaka cha 2020 la Mateyu 28:19, likutikumbuska za kuzirwa kwa kusambizga ŵanthu Baibolo, na kuŵawovwira umo ŵangachitira kuti ŵaŵe ŵasambiri ŵa Yesu Khristu ŵakubatizika. Mu nkhani iyi na yakulondezgapo, tiwonenge ivyo tingachita kuti tiŵe ŵaluso pakuchita ntchito yakuzirwa chomene iyi.
b MAZGU GHALONGOSOREKA: Para nyengo zose mukudumbiskana nkhani za mu Baibolo na munthu kweni mundondomeko, ndikuti mukuchitiska sambiro la Baibolo. Mungamba kupelekera lipoti sambiro usange mwasambirapo kaŵiri na munthu kufuma apo mukamulongolera umo sambiro la Baibolo likuchitikira, ndipo mukugomezga kuti lilutilirenge.
c Mu nkhani iyi muliso masachizgo ghakovwira chomene ghakufuma mu nkhani za mutu wakuti “Kuchitiska Masambiro gha Baibolo Ghakuluta Panthazi” za mu Uteŵeti Withu wa Ufumu wa Julayi 2004 m’paka Meyi 2005.
d Msambiri mwanakazi panji mwanalume wose ŵakwenera kusambira vyakuyana waka.
e Wonelerani vidiyo ya maminiti 4 ya mutu wakuti Musambizgani Msambiri Winu Kunozgekera. Pa JW Library®, lutani pa MEDIA > OUR MEETINGS AND MINISTRY > IMPROVING OUR SKILLS.
f Lutani pa IVYO BAIBOLO LIKUSAMBIZGA > VINTHU VYAKOVWIRA PAKUSAMBIRA BAIBOLO.
g Pa JW Library®, lutani pa MEDIA > OUR MEETINGS AND MINISTRY > TOOLS FOR THE MINISTRY.