Waliyose Wakukhumba Kuti Wazakasange Umoyo Uwemi Munthazi
Kasi imwe mukukhumba kuti vinthu vizakamuŵirani wuli munthazi? Nga umo ŵanthu ŵanandi ŵakukhumbira, tikukayika yayi kuti namwe mukukhumba kuti muzakaŵe na umoyo uwemi pamoza na ŵamubanja linu—umoyo wakukondweska, wambura kulwara, wamtende kweniso kuŵa na chilichose.
Kweni ŵanthu ŵanandi ŵakukayika usange ŵazamuŵa na umoyo uwemi nga umo ŵakukhumbira. Ŵakukayika chifukwa cha vinthu vyamabuchi ivyo vikuchitika nga ni muliri wa COVID-19, uwo wakoma ŵanthu ŵanandi kweniso wapangiska ukavu na masuzgo ghanyake. Ntheura ŵakuwona kuti vinthu viŵenge makora yayi munthazi.
Chifukwa chakuti ŵakumanya yayi vya machero, ŵanthu ŵakuyezgayezga kupenja icho chingaŵawovwira kuti ŵazakaŵe na umoyo uwemi munthazi. Ŵanyake ŵakugomezga nkhongono zambura kuwoneka, panji kuti kugomezga vyamizimu. Ŵanandi ŵakuwona kuti masambiro na usambazi, ndivyo vingaŵawovwira kusanga ivyo ŵakukhumba pa umoyo wawo. Ndipo ŵanyake ŵakuwona kuti ŵakwenera kuŵa waka munthu muwemi kuti vinthu vizakaŵayendere makora na kuŵa na umoyo uwemi.
Kasi ivyo tayowoya apa vingamovwirani kuti muzakaŵe na umoyo uwemi uwo mukukhumba? Kuti musange zgoro, mukwenera kughanaghanira mafumbo agha:
Kasi umoyo winu wamunthazi ukuthemba pa vichi?
Kasi masambiro na ndalama vingawovwira kuti muzakasange umoyo uwemi munthazi?
Kasi kuŵa waka munthu muwemi kungawovwira kuti muzakasange umoyo uwemi munthazi?
Kasi ni nkhu uko mungasanga ulongozgi wanadi uwo ungamovwirani kuti muzakasange umoyo uwemi munthazi?
Magazini iyi ya Gongwe la Mulinda, yingamovwirani kusanga mazgoro gha mafumbo agha.